புலம் பெயர் தமிழர்களும் இனி தொல்லைகளுக்கு ஆளாகும் காலம் தொடங்கிவிட்டது.

(ஸ்ரனிஸ்)

இலங்கையில் ஆட்களைச்சுடும் கலாச்சாரம் ஓய்ந்து அது தற்போது தமிழர்கள் புலம் பெயர்ந்து வாழும் இடங்களிலும் வியாபித்து நிற்கிறது. புலம் பெயர்ந்த நாடுகளில் இந்த கலாச்சாரத்தை தொடங்கி வைத்தவர்கள் விடுதலைப்புலிகள் தான் என்பதை சிலர் தெரிந்திருந்தும் இப்படிப்பட்ட கொலைகள் மீண்டும் மீண்டும் நடப்பதற்கு ஏதுவாக அவர்களது அறிக்கைகள் இருப்பது ஆபத்தாக உள்ளது. 1981. இல் சென்னை பாண்டிபஜாரில் உமா - பிரபா துப்பாக்கி சூடு நடந்து இதுதான் வெளிச்சத்துக்கு வந்த முதல் புலம்பெயர் துப்பாக்கி சண்டை. புலிகள்தான் 1990 இல் ஈ.பி.ஆர்.எல்எப் செயலாளர் நாயகம் பத்மநாபா அவர்களையும் அவரது தோழர்கள் பன்னிருவரையும்  சென்னை கோடம்பாக்கத்தில் வைத்து சுட்டுகொன்றார்கள் என்பது இந்த உலகத்திற்கு தெரிந்திருந்தும் அதற்கும் வியாக்கியானங்களும் அறிக்கைகளும் வெளியிட்டு புலிகளின் இச் செயலை பலர் ஊக்கப்படுத்தினார்கள்.

இவர்களது ஊக்கத்தால் 1991 இல் ராஜீவ்காந்தி அவர்கள் அதே சென்னையின் ஸ்ரீபெரும்புத்தூரில் வைத்து புலிகளின் மனித வெடிகுண்டுக்கு பலியானார்.1994 இல் சபாலிங்கம் அவர்கள் புலிகளால் பிரான்சில் வைத்து சுட்டுக் கொல்லப்பட்டார்.1996 இல் புலிகளின் உள்ளக முரன்பாடு காரணமாக புலிகளின் மூத்த உறுப்பினர்கள் கஜன், நாதன் என்பவர்கள் பிரான்சில் வைத்து சுட்டுக் கொல்லப்பட்டனர். 2012 புலிகளின் மூத்த உறுப்பினர் பரிதி என்பவர் பிரான்சில் வைத்து சுட்டுக்கொல்லப்பட்டுள்ளார்.இந்த கொலை தொடர்பாக பல கருத்துக்கள் வந்த வண்ணம் உள்ளன. இதில் உள்ளக முரண்பாடே இந்த கொலைக்கு காரணம் என பலரால் நம்பப்படுகிறது.

தமிழகத்தில் வைத்து பத்மநாபா அவர்கள் கொலை செய்யப்பட்டபோதும் ராஜீவ்காந்தி அவர்கள் வெடிகுண்டுக்கு பலியானபோதும் தமிழகத்தில் உள்ள இலங்கைத் தமிழர்கள் விசாரணை, கைது என அலைக்கழிக்கபட்ட செய்திகள் வெளிவந்தன.

புலத்தில் இந்த நிலைமைகள் வருவதற்கான சாத்தியங்கள் வெகுவிரைவில் உள்ளன. துப்பாக்கி சூடு அதனால் கொலை ஆட்கடத்தல் என நடைபெற்றால் அங்கு வாழும் இலங்கைத் தமிழர்கள் தொல்லைக்கு ஆட்படுவார்கள்.

புலிகளை விமர்சிக்க வேண்டிய தருணத்திலும், அவர்களை கண்டிக்க வேண்டிய சந்தர்ப்பங்களிலும் இதனை செய்ய பலர் தவறியகாரணங்களால் தான் அவர்கள் மேலும் மேலும் பல பயங்கரவாத செயல்களை செய்ய முனைகிறார்கள்.

புலிகள் ஆதரவு சக்திகள் புலிகளை தட்டிக்கேட்க முடியாது என்ற ஒரு காரணம் இருந்தது உண்மைதான். ஆனால் அது தற்போது இல்லை என்பதை இவர்கள் இன்னும் புரியாமல் கிணற்று தவளை போல் இருப்பது ஆபத்தானது.

தற்போது கூட அவர்களது செயற்பாடுகள் புலம்பெயர் நாடுகளில் இல்லாமல் இல்லை  அவர்கள் அங்கு வாழும் தமிழர்களின் நிம்மதியை கெடுக்க காத்தகிடக்கிறர்கள். என்பதை அவர்களுக்காக அனுதாப்பட்டு அறிக்கைவிடும் தமிழக கட்சிகள், இலங்கைகட்சிகள், அவர்களது செயல்களை ஊதி பெரிசுபடுத்தும் ஊடகங்கள் சிந்திக்க வேண்டும்.