திருமதி யோசேப் பரராஜசிங்கத்திற்கு கனடாவில் நாடுகடத்தல்  உத்தரவு

மறைந்த முன்னாள் தமிழ்  தேசியக் கூட்டமைப்பு பாராளுமன்ற உறுப்பினர், மாமனிதர் யோசேப் பரராஜசிங்கத்தின்  மனைவியான திருமதி சுகுணம் பரராஜசிங்கத்தின் அகதி மனுவை நிராகரித்த கனடிய  கன்சவேட்டிவ்  அரசாங்கம் அவரை நாடு கடத்த உத்தரவிட்டிருக்கிறது. திருமதி சுகுணம் பரராஜசிங்கம் அவர்கள் உண்மையான அகதி என்பதும் சிறீலங்காவில் உயிராபத்து உள்ளவர் என்பதும் அனைவரும் அறிந்ததே. 2005ம் ஆண்டு நத்தார் தின அதிகாலைப் பிரார்த்தனையின் போது மட்டக்களப்பு புனிதமரியாள் தேவாலயத்தினுள் வைத்துச் சுட்டு தமிழ் தேசியக் கூட்டமைப்பின் பாராளுமன்ற உறுப்பினர் ஜோசேப் பரராஜசிங்கம் அவர்கள் கொல்லப்பட்டபோது அவருடன் கூடவிருந்த திருமதி சுகுணம் பரராஜசிங்கம் அவர்கள் பலத்த காயத்திற்கு உள்ளாகியிருந்தார்.

தனது கணவரின் மறைவையடுத்து சிறீலங்காவில் இனித் தன்னால் இருக்க முடியாது என்ற நிலையில் 2006ம் ஆண்டு கனடா வந்த திருமதி சுகுணம் அவர்கள் அகதிக் கோரிக்கையைச் சமர்ப்பித்திருந்தார். எனினும் அந்த கோரிக்கை மிகவும் அபாண்டமான முறையில் நிராகரிப்பட்டிருந்தது.

ஜனநாயக வழியில் தேர்ந்தெடுக்கப்பட்ட ஒரு பாராளுமன்ற உறுப்பினரின் மனைவி என்ற வகையிலும், அப் பாராளுமன்ற உறுப்பினர் கொல்லப்பட்ட போது இவர் மீதும் துப்பாக்கிப்பிரயோகம் செய்யப்பட்டு படுகாயமடைந்தவர் என்ற முறையிலும் ஒரு அகதிக்கான வலுவான தகுதியை தமிழ்த் தேசியத்திற்காக இன்றுவரை உழைத்து வரும் திருமதி சுகுணம் அவர்கள் கொண்டிருந்தார்.

சிறீலங்கா அரசின் அனுசரணையுடன் இடம்பெற்ற மேற்படி கோரத்தாக்குதல், பல உலக நாடுகளினதும், சர்வதேச அமைப்புக்களினதும் கண்டனத்தைப் பெற்ற மேற்படி நத்தார்தினத் தேவாலயத் தாக்குதலில் ஐந்து குண்டுகள் பாய்ந்த இவர் உயிர் தப்பியதே பெரும் அதிசயமாக கருதப்பட்டது.

 வட-கிழக்கு மாகாணத் தேர்தலில் அதிகூடிய விருப்பு வாக்கை 1994ம் ஆண்டு பெற்ற மாமனிதர் யோசேப் பரராஜசிங்கம் அவர்கள் ஒரு பத்திரிகையாளர் என்பதும் தமிழர் விடுதலைக் கூட்டணியின் நீண்ட கால உறுப்பினர் என்பதும் குறிப்பிடத்தக்கது.

கருணா, பிள்ளையான் குழு விடுதலைப்புலிகள் அமைப்பிலிருந்து பிரிந்த பின்னரும் வட-கிழக்கு இணைவு பிரிக்க முடியாதது என்றும், வட-கிழக்கு மக்கள் ஒரு தாய் வயிற்றுப் பிள்ளைகள் என்பதையும் வலியுறுத்தியதே இவர் மீதான தாக்குதலிற்கான காரணமாக ஹேஸ்யம் கூறப்பட்டது.

தனது கணவரின் வழியிலேயே திருமதி சுகுணம் அவர்களும் வட-கிழக்கு மக்களின் துயர் துடைக்க தன்னாலியன்ற தார்மீக ஆதரவை வழங்கி வருபவர். சிறீலங்காவிற்கு சென்று வசிக்க முடியாதபடி பெரிய ஆபத்தை எதிர்  நோக்கியிருக்கும் ஒரு படுகொலை செய்யப்பட்ட பாராளுமன்ற உறுப்பினரின் மனைவியை அகதிக்  கோரிக்கைக்கு தகுதியுடையவர் அல்ல என நிராகரித்துள்ளது அகதிகள் தொடர்பான இந்த  கன்சவேட்டிவ் அரசின் கொள்கையை கேலிக்குரியதாக்கியுள்ளது.

நாடு கடத்தல் உத்தரவு என்பது குடிவரவு அமைச்சரின் கட்டுப்பாட்டில் உள்ள ஒரு  விடயம் என்பதும் அவரால் கரிசனைக்கு எடுத்து தடுத்து நிறுத்தக்கூடிய விடயம் என்ற  போதிலும் கனடிய குடிவரவு அமைச்சரான ஜேசன் கென்னி இவ் விவகாரத்தில் மிகவும்  பாராமுகமாகவே நடந்து கொண்டார் என்றே கருதப்படுகிறது. எனினும் திருமதி ஜோசேப் பரராஜசிங்கத்தின் நாடுகடந்தல் கோரிக்கையை எதிர்த்து மனுச்செய்யப் போவதாக அவரது சட்டத்தரணி ராகுல் பௌலாக்கியா தெரிவித்துள்ளார்.