ரூ. 1 கோடி 19 இலட்சம் கடன் அட்டை மோசடி

போலி கடன் அட்டைகளை பயன்படுத்தி சுமார் ஒரு கோடி 19 இலட்சம் ரூபா பண மோசடியில் ஈடுபட்ட மோசடி கும்பலை குற்றப் புலனாய்வு திணைக்கள பொலிஸார் கைது செய்துள்ளனர். பாரிய அளவில் திட்டமிட்ட அடிப்படையில் மோசடியில் ஈடுபட்டு வந்த திருகோணமலை, இரத்மலானை, களுவாஞ்சிக்குடி மற்றும் பேருவளை ஆகிய பிரதேசங்களைச் சேர்ந்த நால்வரே சி.ஐ.டி. யினரால் மடக்கிப் பிடிக்கப்பட்டுள்ளனர். போலியாக தயாரிக்கப்பட்ட 15 கடன் அட்டைகள், அவற்றை தயாரிக்க பயன்படுத்திய இலத்திரனியல் இயந்திரங்கள், உண்மையான கடன் அட்டைகளின் தரவுகள் சேமித்து வைக்கப்பட்டிருந்த கணனி மற்றும் பல்வேறு வகையான உபகரணங்களையும் சீ.ஐ.டி.யினர் கைப்பற்றியுள்ளனர்.

திட்டமிட்ட அடிப்படையில் வலையமைப்பாக செயற்பட்டு வந்த இந்தக் குழுவினர் உள்நாட்டு மற்றும் வெளிநாட்டில் பயன்படுத்தும் போலி கடன் அட்டைகளை இலங்கையில் தயாரித்துள்ளமை ஆரம்பக்கட்ட விசாரணைகளிலிருந்து தெரியவந்து ள்ளது. இந்தக் குழுவினருக்கும் உள்நாடு மற்றும் வெளிநாடுகளைச் சேர்ந்த வேறு நபர்களுக்கும் தொடர்பு உள்ளனவா என்பன தொடர்பான விரிவான விசாரணைகளை சி.ஐ.டி. யினர் முடுக்கியுள்ளனர்.

தரவுகள் சட்டவிரோதமாக பதிவு செய்யப்படுதல், போலி கடன் அட்டைகள் தயாரித்தல், பண மோசடி போன்ற நடவடிக்கைகள் தொடர்ச்சியாக இடம்பெற்று வருவதாக கொமர்ஷல் வங்கி, நேஷன் ட்ரஸ்ட் மற்றும் ஹற்றன் நெஷனல் வங்கி ஆகிய மூன்று தனியார் வங்கிகளின் முகாமைத்துவம் சி.ஐ.டி.யினரிடம் முறைப்பாடுகள் செய்துள்ளன. இதனையடுத்தே சி.ஐ.டி.யினர் விசாரணைகளை ஆரம்பித்துள்ளதுடன், கண்காணிப்பு நடவடிக்கைகளை மேற்கொண்டுள்ளனர்.

கொழும்பு, இரத்மலானை, பேலியாகொடை மற்றும் ஜாஎல ஆகிய பகுதிகளிலுள்ள எரிபொருள் நிரப்பும் நிலையங்களிலேயே இதுபோன்ற மோசடி நடவடிக்கைகள் இடம்பெறுவதாக தகவல்களை பெற்றுக்கொண்ட சி.ஐ.டி. யினர் மேற்படி எரிபொருள் நிரப்பு நிலையங்களில் சிவில் உடை அணிந்த இரகசிய பொலிஸாரை கடமையில் ஈடுபடுத்தியுள்ளனர்.

கைது செய்யப்பட்ட நான்கு சந்தேக நபர்களில் ஒருவர் இரத்மலானை எரிபொருள் நிலையத்தில் எரிபொருளை நிரப்பிக்கொண்ட பின்னர் போலி கடன் அட்டையை கொடுத்துள்ளனர். திருகோணமலை பிரதேசத்தைச் சேர்ந்த இவர் மடக்கிப் பிடிக்கப்பட்டு விசாரணைக்குட்படுத்தப்பட்டபோது, அவரிடமிருந்து மறைத்து வைக்கப்பட்டிருந்த செலான், ஹற்றன் நெஷனல், ஐ.சி.ஐ.சி.ஐ. வங்கிகள் உட்பட மேலும் பல வங்கிகளின் ஆறு கடன் அட்டைகளையும், எரிபொருள் நிரப்பியமைக்கான பற்றுச் சீட்டுகளையும் கைப்பற்றியுள்ளனர். இவரிடமிருந்து கடவுச் சீட்டும் பறிமுதல் செய்யப்பட்டுள்ளது.

சந்தேக நபரின் திருகோணமலை வீட்டிலிருந்து போலி கடன் அட்டை தயாரிக்கும் இயந்திரங்களும் கண்டெடுக்கப்பட்டுள்ளன. இந்த மோசடி சம்பவத்துடன் இரண்டாவது சந்தேக நபர் களுவாஞ்சிகுடி பிரதேசத்தில் தலைமறைவாகியிருந்த நிலையிலும் மேலும் இருவர் பேருவலை பிரதேசத்தில் வைத்தும் கைது செய்யப்பட்டுள்ளனர்.

இந்தக் கும்பல் போலி கடன் அட்டைகளை எரிபொருள் நிரப்பு நிலையங்களிலேயே பயன்படுத்தியுள்ளனர். எரிபொருள் நிரப்பு நிலையத்திலுள்ள தன்னியக்க இயந்திரத்திலிருந்து பெருமளவில் பணத்தை எடுத்துள்ளனர். இந்த பணத்தை எரிபொருள் நிலைய ஊழியர்களுக்கும் பகிர்ந்துள்ளமையும் தெரிய வந்துள்ளது.

கடன் அட்டைகளை பயன்படுத்தி போலியான முறையில் பணத்தை பெற்றுக் கொண்டதில் கொமர்ஷல் வங்கிக்கு 1,05,600/= ரூபா நஷ்டமும், நேஷன் ட்ரஸ்ட் வங்கிக்கு 87,91,000/= ரூபா நஷ்டமும், ஹற்றன் நெஷனல் வங்கிக்கு 30,000,000/= ரூபா நஷ்டமும் ஏற்பட்டுள்ளது என முறைப்பாடு செய்யப்பட்டுள்ளதாக பொலிஸ் ஊடகப் பேச்சாளர் சுட்டிக்காட்டினார்.

சந்தேக நபர்கள் தடுப்பு காவலில் வைக்கப்பட்டு குற்றப் புலனாய்வு திணைக்கள பொலிஸாரினால் மேலதிக விசாரணைக்கு உட்படுத்தப்பட்டுள்ளனர் என்றும் அவர் தெரிவித்தார்.