தேர்தலில் இதுவரை இல்லாத அளவு வாக்குப் பதிவு ஏன்?

இந்த தேர்தலில் இதுவரை இல்லாத அளவுக்கு வாக்குகள் பதிவானது ஏன்? என்பதற்கு முன்னாள் தமிழக தலைமை தேர்தல் அதிகாரி நரேஷ்குப்தா விளக்கம் அளித்துள்ளார். இதுதொடர்பாக அவர் மேலும் கூறியதாவது, இந்த தேர்தலில் 78 சதவீதம் வாக்குகள் பதிவாகி உள்ளன. இது கடந்த 2009ம் ஆண்டு நடந்த பாராளுமன்ற தேர்தலில் பதிவான வாக்குகளைவிட 5 சதவீதம் அதிகம். 2008ம் ஆண்டு நடைபெற்ற சட்டமன்ற தேர்தல் வக்குப் பதிவைவிட 7 சதவீதம் கூடுதல் ஆகும். தமிழகத்தில் சமீபத்தில் நடந்த இடைத் தேர்தல்களில் வாக்காளர்களுக்கு பணம் கொடுத்ததால் அதிகளவு வாக்குகள் பதிவாகின. அதைப்போல இல்லாமல், இந்த தேர்தலில் வாக்காளர்களின் ஆர்வம் மற்றும் உயர் நடுத்தர மக்கள் ஆர்வமாக வந்து வாக்களித்ததே அதிக வாக்குப் பதிவிற்கு காரணம் என்று தெரிகிறது.

கடந்த 2005ம் ஆண்டில் இருந்து 5 ஆண்டுகளாக வாக்காளர் பட்டியலை சரிபார்த்து புதிதாக பெயர் சேர்க்கப்பட்டதும் காரணமாக இருக்கலாம். கடந்த தேர்தல் களைவிட இந்த தேர்தலில் வாக்கா ளர்களுக்கு பணம் கொடுத்தது குறைவுதான்.

உள்ளூர் பொலிசாரின் செயலற்ற தன்மை, ஆள் பலம், வேட்பாளரின் செல்வாக்கு ஆகியவற்றின் அடிப்படையில் வாக்காளருக்கு பணம் கொடுப்பது தொகுதிக்கு தொகுதி வேறுபடுகிறது. இருந்தபோதிலும், தேர்தல் ஆணையம் மற்றும் மாநில தேர்தல் அலுவலகம் எடுத்த உறுதியான நடவடிக்கையால் பணம் கடத்தப்படுவதும் பண விநியோகமும் தடுக்கப்பட்டுள்ளது.

வாக்காளர் பட்டியலில் ஆண்டு திருத்தம் செய்யும் பணியை செப்டம்பர் அல்லது ஆகஸ்டு மாதம் மத்தியில் தொடங்கிவிட வேண்டும். அவ்வாறு செய்தால் வாக்காளர் பட்டியலில் பெயர் சேர்க்க விண்ணப்பித்தல், கணனியில் வாக்காளர் விவரங்களை பதிவு செய்தல், வீடு வீடாகச் சென்று விவரங்களை சரிபார்த்தல், திருத்தத்திற்கான உத்தரவு பிறப்பித்தல், வாக்காளரின் பெயர் ஒன்றுக்கு மேற்பட்ட தடவை இடம்பெறு வதை தவிர்த்தல், வாக்காளர் பட்டியலை அச்சிடுதல் ஆகிய அனைத்துப் பணிகளை யும் முடித்து வாக்காளர் பட்டியல் வெளி யிடுவதற்கு 4 அல்லது 4 1/2 மாதங்கள் கால அவகாசம் கிடைக்கும். இரண்டாவ தாக ஒன்லைனில் வாக்காளர் பட்டியலை சரிபார்க்கும் பணியையும் முன்கூட்டியே முடித்துவிட வேண்டும்.

வாக்காளர் பட்டியல் தயாரிப்பு மற்றும் சரிபார்க்கும் பணியில் குடியிருப்போர் நல சங்கத்தினர், சமூக சேவை அமைப் பினரையும் ஈடுபடுத்தினால் பயனுள்ளதாக இருக்கும். வீடு, வீடாகச் சென்று வாக்காளர் விவரங்களை சரிபார்க்கும்போது மேற்கண்ட அமைப்பை சேர்ந்தவர்கள் தங்களது பிரதிநிதிகளை அனுப்பி, வாக்காளரை அடையாளம் காணவும், விண்ணப்பத்தை வழங்கிடவும், வயது, முகவரி தொடர்பான ஆவணங்களையும், புகைப்படத்தையும் வாங்குவதற்கும் உதவியாக இருப்பார்கள். இத்தகைய தனியார் - அரசு கூட்டு முயற்சி திட்டத்தை பெங்களூர் நகரில் உள்ள ஒரு தொகுதியில் வெற்றிகரமாக செய்தது முடித்திருக்கிறார்கள்.

இவ்வாறு நரேஷ்குப்தா கூறினார்.