தமிழ் நாட்டுத் தேர்தலில்

மூன்றரை இலட்சம் வாக்காளர்கள் வாக்களிக்காதது ஏன்?

தமிழக சட்டசபை தேர்தலில் வாக்காளர்களிடம் ஏற்பட்ட எழுச்சி வாக்கு சதவீதத்தை ஏகமாக உயர்த்தியது. அதே நேரத்தில் சில மாவட்டங்களில் வாக்கு சதவீதம் குறைந்தும், கூடியும் இருப்பதற்கான காரணம் தெரியாமல் குழம்பிப் போயுள்ளனர் அரசியல்வாதிகள், அந்த வகையில், திருப்பூர் மாவட்டத்தில் வாக்கு சதவீதம் குறைந்துள்ளது. அரசியல்வாதிகளை அதிக குழப்பத்தில் ஆழ்த்தியுள்ளது. திருப்பூர் மாவட்டத்தில் மூன்று இலட்சத்து 53 ஆயிரத்து 892 வாக்காளர்கள் வாக்களிக்கவில்லை. மாவட்டத்தின் தலையாய பிரச்சினையாக இருப்பது சாயத்தொழில் பிரச்சினை, கடந்த இரண்டரை மாதங்களாக சாய சலவை ஆலைகள் மூடப்பட்டுள்ளன. சாயக் கழிவு நீர் பிரச்சினையால் நேரடியாக விவசாயிகள் பாதிக்கப்பட்டனர். இன்று சாயத் தொழிலாளர்களின் வாழ்வும் கேள்விக்குறியாகி உள்ளது. பனியன் நிறுவனங்கள் மூடப்பட்டுள்ளதால், திருப்பூரை நம்பி வந்த தொழிலாளர்கள் படிப்படியாக சொந்த ஊர்களுக்கே திரும்பிச் செல்கின்றனர். இச் சட்டசபை தேர்தலில் எதிரொலித்துள்ளது.

திருப்பூர் தெற்கு தொகுதியில், 46 ஆயிரம் வாக்காளர்களும் வடக்கு தொகுதியில் 57 ஆயிரம் வாக்காளர்களும் வாக்களிக்கவில்லை. இவர்கள் வாக்களிக்காததற்கு என்ன காரணம் என அதிகாரிகள் ஆய்வு செய்ய உள்ளனர். இறந்த வாக்காளர்கள் பெயர் பட்டியலில் நீடிப்பது. ஒரே பெயர் இரண்டு முறை பதிவாகியிருப்பது, ஆண் வாக்காளருக்கு பெண் படம், பெண் வாக்காளருக்கு ஆண் படம் உள்ளிட்ட சின்னச் சின்ன குறைபாடு இருக்கலாம் அது, சொற்ப அளவே இருக்கும்.

மொத்தமுள்ள வாக்காளர்களில் 3.53 இலட்சம் வாக்காளர்கள் வாக்களிக்கவில்லை. வழக்கமான தேர்தலைக் காட்டிலும் இம்முறை வாக்கு சதவீதம் அதிகரித்துள்ளது. இத்தருணத்தில் வாக்களிக்காதவர்கள் யார் யாரெனவும் பட்டியலிட வேண்டும். அதிகமானோர் வாக்களித்ததால் வாக்களிக்காதவர்களை கண்டறிவது மிக எளிது.

திருப்பூரில் இருந்து சொந்த ஊருக்கு இடம்பெயர்ந்தவர்கள் அதிகமானோர் என ஆய்வில் தெரியவந்தால், சாய ஆலை பிரச்சனையால் வேலை இழந்து குடும்பத்துடன் சென்றுவிட்டனர் என்பதையும் அறியலாம். எனவே தேர்தல் முடிந்துவிட்டது என தேர்தல் கமிஷன் ஒதுங்காமல், ஓட்டு போடாதவர்கள் பற்றியும் ஆய்வு செய்ய வேண்டும். 100 சதவீதம் தவறில்லாத வாக்காளர் பட்டியலை தயார் செய்தால் அடுத்த உள்ளாட்சி தேர்தலில் வாக்குப் பதிவு சதமடிக்கும் என்றால் ஆச்சரியமில்லை!

படித்தவர்கள் நிறைந்த மாவட்டம் என பெயர் பெற்ற கன்னியாகுமரியில், மாநிலத்திலேயே குறைந்த வாக்கு சதவீதம் பதிவாகியுள்ளது. அரசியல் பார்வையாளர்களை மட்டுமல்ல; அதிகாரிகளையும் அதிர்ச்சி அடையச் செய்துள்ளது.

படித்தவர்கள் நிறைந்தது குமரி மாவட்டம். வாக்களிக்க வேண்டும் என்பதற்காக மாவட்ட நிர்வாகம் பல்வேறு விழிப்புணர்வு நடவடிக்கைகளை எடுத்திருந்தது. இதற்காக பல பிரசாரங்களும் மேற்கொள்ளப்பட்டன. எனினும் மாநில அளவில் குறைந்தபட்ச வாக்குப் பதிவு என்ற பெயரை இம் மாவட்டம் பெற்றுள்ளது. குமரி மாவட்டத்தைச் சேர்ந்தவர்கள் தான் பெரும்பாலான மாவட்டங்களில் ஆசிரியர்களாக உள்ளனர். சமீபத்தில் நடைபெற்ற நியமனங்களில் கூட, குமரி மாவட்டத்தைச் சேர்ந்த ஆயிரக் கணக்கானோர் வேலை பெற்றனர். இவர்கள் தேர்தல் பணிகளில் நியமிக்கப்பட்டதால், ஊருக்கு வர முடியாத நிலை ஏற்பட்டது. இதுபோல வெளிமாவட்ட அரசு பணிகளில் உள்ள குமரி மாவட்டத்தவர், குடும்பத்துடன் ஊர் திரும்ப முடியாத நிலை ஏற்பட்டது.