ஐ.நா. அறிக்கை தொடர்பாக கருணாநிதி, ஜெயலலிதா மௌனம் டில்லியைச் சாடுகிறது இந்திய கம்யூனிஸ்ட் கட்சி

இலங்கை அரசாங்கம் போர்க் குற்றங்களை இழைத்திருப்பதாக ஐ.நா. நிபுணர்குழு குற்றச்சாட்டுத் தெரிவித்திருப்பதைத் தொடர்ந்து இந்திய அரசாங்கத்தை இந்தியகம்யூனிஸ்ட் கட்சி போன்ற பிரதான கட்சிகளும் தமிழர் சார்புக் கட்சிகளும் கடுமையாக விமர்சித்திருக்கும் நிலையில், தமிழ்நாட்டின் இரு பிரதான கட்சிகளான ஆளும் தி.மு.க. வும் எதிரணியான அ.தி.மு.க.வும் மௌனம் காத்து வருகின்றன. 2009 இல் இடம்பெற்ற பாராளுமன்றத் தேர்தலின்போது தமிழர்கள் கொல்லப்படுவதாக இந்த இரு கட்சிகளும் உரத்துக் குரல் கொடுத்திருந்ததாக டெக்கான் குரோனிக்கிள் பத்திரிகை நேற்று செவ்வாய்க்கிழமை தெரிவித்துள்ளது. யுத்தத்தின் இறுதிக்கட்டத்தின் போது இடம்பெற்ற போர்க் குற்றங்கள் மற்றும் மனிதத்துவத்திற்கு எதிரான குற்றச்சாட்டுகள் நம்பகரமானவையெனவும் அவை தொடர்பாக சுயாதீனமான விசாரணையை மேற்கொள்ளுமாறும் ஐ.நா. நிபுணர்குழு அழைப்பு விடுத்திருந்தது.

2009 தேர்தல் பிரசாரம் உக்கிரமாக இடம்பெற்ற வேளையில் முதலமைச்சர் கருணாநிதி தமிழ் மக்கள் மீது ஷெல்வீச்சை நிறுத்துமாறு வலியுறுத்தி அடையாள உண்ணாவிரதத்தில் ஈடுபட்டார். அ.தி.மு.க. செயலாளரான ஜெயலலிதா இந்திய இராணுவத்தை அனுப்பப்போவதாக சூளுரைத்திருந்தார். ஆயினும் இப்போது அவர்கள் இருவரும் மௌனமாக இருந்து வருவதாகக் கூறப்படுகிறது.

எவ்வாறாயினும் இந்திய கம்யூனிஸ்ட் கட்சியின் தேசிய செயலாளர் டி.ராஜா புதுடில்லியை கடுமையாகச் சாடியுள்ளார்.கொழும்பின் மீதான சர்வதேச அழுத்தத்தை இந்திய அரசாங்கம் நசுக்கிவிடுவதாக இப்போது குற்றஞ்சாட்டப்படுகிறது. இந்திய அரசாங்கத்தின் நிலைப்பாடு முழுமையாக வெளியாகியுள்ளது. யுத்தத்தின் இறுதிக்கட்டத்தின்போதும் அதற்குப் பின்னரும் சர்வதேச சமூகம் பங்களிப்பை வழங்க முடியாமல் தடுப்பதற்கும் பிரக்ஞையுடன் கொழும்பை நியாயப்படுத்துவதற்கும் இந்தியா செயற்பட்டு வந்ததாக ராஜா கூறியுள்ளார்.

இலங்கை விவகாரத்தை ஐக்கிய முற்போக்கு முன்னணி அரசாங்கம் கையாளும் விதம் குறித்து அவர் கடுமையாக விமர்சித்துள்ளார். தமிழர்களின் பிரச்சினைக்குத் துரோகமிழைத்த புதுடில்லியின் நிலைப்பாடு அம்பலமாகியுள்ளதாகவும் சர்வதேச விவகாரங்களில் ஈடுபடுவதற்கான தார்மீக அதிகாரத்தை டில்லி இழந்துவிட்டதாகவும் அவர் கூறியுள்ளார்.

இலங்கைக்கு இந்தியா உதவியுள்ளது.பெறுமானங்களை காற்றில் பறக்கவிட்டு அப்பாவிப் பொதுமக்கள் இழப்புகளுக்கு உதவியிருக்கிறது. போர்க் குற்றத்துக்கு புதுடில்லியானது பங்காளியாக மட்டுமன்றி, மேற்கு நாடுகளை தடை செய்வதில் முக்கிய செயற்பாட்டாளராகவும் உள்ளது. மேற்கு நாடுகள் பாதிக்கப்பட்ட தமிழர்களுக்கு ஆதரவளிப்பதை தடை செய்வதில் முக்கிய பங்களிப்பை புதுடில்லி வழங்குகிறது. தனது நிலைப்பாட்டை புதுடில்லி மாற்றிக்கொண்டு தமிழர்களிடம் மன்னிப்புக்கோர வேண்டுமென்று பெரியார் திராவிட கழகத் தலைவர் கொளத்தூர் மணி தெரிவித்துள்ளார்.