நாட்டை மீண்டும் கட்டியெழுப்பும் விதத்தில் முன்னாள் போராளிகள் தொழிற்பயிற்சி பெற்றுள்ளனர்

மனித உரிமைகள் பற்றி இன்று பலரும் பேசுகின்றனர். ஆனால் இதனைப் பேசுவோருக்கு மனித உரிமைகள் என்ற அம்சத்தின் தாற்பரியங்கள் புரியாமல் இருக்கலாம். இருந்தாலும் நாம் சிறப்பான மனித நேய அடிப்படையில் கடந்த காலத்தில் எங்களுடைய நடவடிக்கைகள் மற்றும் புனர்வாழ்வு சிறைச்சாலைகள் மறுசீரமைப்பு அமைச்சர் சந்திரசிறி கஜதீர தெரிவித்தார்.

புனர்வாழ்வளிக்கப்பட்ட முன்னாள் போராளிகளில், 3 குழந்தைகளுக்கு மேல் உள்ள பெண்கள் உட்பட திருமணம் முடித்த 483 பேரை விடுவித்த நிகழ்வு வவுனியா நகரசபை கலாசார மண்டபத்தில் நேற்றுக் காலை இடம் பெற்ற போது அதில் கலந்து கொண்டு பேசுகையிலேயே இவ்வாறு தெரிவித்தார்.  இங்கு தொடர்ந்து பேசிய அமைச்சர்;  எமது அமைச்சின் கீழ் இயங்கும் 9 புனர்வாழ்வு நிலையங்களில் நீங்கள் புனர்வாழ்வு பயிற்சிகளை நிறைவு செய்துள்ளீர்கள். கடந்த இரண்டு மூன்று தசாப்தங்களாக இடம் பெற்ற யுத்தத்தின் பின்னர் எம்மிடம் சரணடைந்த அல்லது புனர்வாழ்வளிப்பதற்காக ஒப்படைக்கப்பட்டவர்கள் அதிகமாக உள்ளனர்.

பொறுப்பு வாய்ந்த அரசாங்கம் என்ற வகையில் ஜனாதிபதியால் மேற்கொள்ளப்பட்ட மனிதநேய நடவடிக்கையின் அடிப்படையில் யுத்த முடிவின்போது உங்கள் அனைவரதும் எதிர்காலத்தை தீர்மானிக்கும் பொறுப்பும் கடமையும் எமது அமைச்சுக்கு ஒப்படைக்கப்பட்டது.

12,000 பேர் வரை எமது புனர்வாழ்வு நிலையங்களில் ஒப்படைக்கப்பட்டவர்கள் மிகக்குறுகிய காலத்திற்குள் அவர்களுக்கு தேவையான எல்லாவிதமான பயிற்சிகளும் வழங்கப்பட்டதுடன் அவர்களது, வாழ்வை மீண்டும் கட்டியெழுப்பக்கூடிய விதத்தில் ஆலோசனைகள் வழங்கப்பட்டன. மிகக்குறுகிய காலத்தில் இந்த நிகழ்ச்சித் திட்டங்கள் நிறைவேற்றப்பட்டதன் காரணமாக இவர்களில் பலர் சமூகத்திடம் அல்லது உறவினர்களிடம் ஒப்படைக்கப்பட்டார்கள்.
இந்த 12 ஆயிரம் பேரில் 4700 பேர் மட்டுமே மிஞ்சியுள்ளனர். அவர்களில் 483 பேரை அவர்களின் பெற்றோரிடம் ஒப்படைக்கின்றோம். இவர்களில் விவாகமானவர்கள் அதிகமாகவுள்ளதுடன் இவர்களிலும் 3 குழந்தைகளுக்கு மேலுள்ள பெற்றோரும் உள்ளனர்.  இன்று விடுதலையானவர்கள் அவர்களது குடும்பத்தை சந்தித்தபோது குழந்தைகளை கொஞ்சி மகிழ்ந்தபோது அவர்கள் ஆனந்தக் கண்ணீர் வடித்ததைப் பார்த்து எனது நெஞ்சம் நெகிழ்ந்து போனது. மனிதாபிமான நடவடிக்கைகளுக்காகவும் உங்களின் தேவைகளுக்காகவும் புனர்வாழ்வு நிலையங்களிலே இருக்கின்றவர்களின் தேவைகளை செய்து கொடுப்பதற்காக மாதம் ஒன்றிற்கு 100 மில்லியன் ரூபாவை ஜனாதிபதி ஒதுக்கீடு செய்து அந்த நிதியுதவியினை தவறாது வழங்கி வருகின்றார்.

இன்றுள்ள புள்ளிவிபரப்படி 50 மில்லியன் ரூபாவுக்கு அதிகமாக ஒரு மாதத்திற்கு ஒதுக்கப்படுகின்றது. ஆகவே, உலகத்தில் வேறு எங்காவது யுத்தம் முடிந்ததன் பின்னர் புனர்வாழ்வுக்காக இவ்வளவு பணத்தை செலவு செய்து சிரமத்தை எதிர் கொண்டு பராமரித்த நாடு இருக்கின்றதா என்று தெரிந்தால் கூறுங்கள். எமது நாடு மிகவும் உயர்ந்த கலாசாரங்களைக்  கொண்டது. நாம் சிங்களம், தமிழ்,முஸ்லிம், பறங்கியர் என்ற வேறுபாடின்றி இணைந்து வாழ்ந்திருக்கின்றோம். அன்று பிரித்தானியர்களுக்கு எதிராக ஒன்றாக இணைந்து போராடியிருந்தோம். எனினும் பின்னர் துரதிர்ஷ்டவசமாக பிரிந்து செயலாற்ற வேண்டி ஏற்பட்டது.

நீங்கள் ஒருவருடம் அல்லது அதற்கு மேற்பட்ட காலம் புனர்வாழ்வை பெற்றீர்கள். இந்நிலையங்களில் 16 பயிற்சி நெறிகள் நடத்தப்பட்டதாக அறிகிறோம். எனவே இந்நாட்டைக் கட்டிஎழுப்பும் சக்தி உங்களுக்கு வழங்கப்பட்டுள்ளது. எனவே, ஆயுதங்களை கையில் ஏந்தாது நாட்டை வளமாக்கும் கருவிகளை ஏந்த கைகளைப் பயன்படுத்துவோம். இந்த இடத்தில் ஆயுதம் ஏந்தியவர்களும் இருப்பார்கள் ஏந்தாதவர்களும் இருப்பார்கள். ஆகவே ஆயுதம் ஏந்தியவர்கள் அவ்வாறு ஆயுதங்களை ஏந்துவதற்கு பல்வேறு காரணங்கள் இருந்தன என்பதை நான் மறுக்கவில்லை.

1977 இன் பின் அறிமுகப்படுத்தப்பட்ட திறந்த பொருளாதாரம் அல்லது பிழையான பொருளாதாரம் காரணமாக வடகிழக்கு பகுதியில் இருந்த மக்களின் விவசாயம் பாதிப்படைந்தமையால் விரக்தி அடைந்து ஆயுதம் ஏந்தினர். இது வடக்கு கிழக்கில் அல்ல தெற்கிலும் தோற்றுவிக்கப்பட்டது என்றார். இந்நிகழ்வில் அமைச்சர் ரிசாட் பதியுதீன், பாராளுமன்ற உறுப்பினர் உனைஸ் பாரூக் வன்னி கட்டளைத்தளபதி மேஜர் ஜெனரல் ஏ.கே.எஸ். பெரேரா, புனர்வாழ்வு ஆணையாளர் பிரிகேடியர் சுசந்த ரணசிங்க, புனர்வாழ்வு சிறைச்சாலைகள் மறுசீரமைப்பு அமைச்சின் செயலாளர் ஏ.திசாநாயக்க, வவுனியா அரசாங்க அதிபர் திருமதி பி.எஸ்.எம்.சாள்ஸ் உட்பட பலரும் கலந்து கொண்டனர்.