நம்பியார் தொடர்பான கேள்விக்கு பதிலளிப்பதை தவிர்த்துக்கொண்ட பான் கீ மூன்

ஐ.நா. இலங்கையின் பதிலளிக்கும் கடப்பாடு தொடர்பான ஐ.நா. நிபுணர் குழுவின் அறிக்கையை செயலாளர் நாயகம் பான் கீ மூன் ஐ.நா. பாதுகாப்புச் சபைக்கு அமைதியான முறையில் சமர்ப்பித்துள்ள நிலையில் அந்த அறிக்கை தொடர்பாக பான் கீ மூனிடம் நியூயோர்க்கை தளமாகக் கொண்ட இன்னர் சிற்றி பிரஸ் இரு கேள்விகளைக் கேட்டது. மோதலின் போது இழப்புகளின் எண்ணிக்கையை ஐ.நா. வெளியிடாமல் வைத்திருந்தது என்று அறிக்கையில் தெரிவிக்கப்பட்டுள்ள குற்றச்சாட்டை பான் கீ மூன் பகிரங்கமாக ஏற்றுக்கொண்டுள்ளார் என்று இன்னர் சிற்றி பிரஸின் நிருபர் மத்யூ ரஸல் லீ நேற்று முன்தினம் செவ்வாய்க்கிழமை தெரிவித்திருக்கிறார்.

இது தொடர்பாக அவர் மேலும் தெரிவித்திருப்பதாவது; பொதுமக்களைப் பாதுகாப்பதற்கான உதவியை வழங்க யுத்தத்தின் இறுதிக் கட்டங்களின் போது ஐ.நா. தவறிவிட்டதாக அறிக்கையில் தெரிவிக்கப்பட்டுள்ள விடயங்கள் குறித்த விமர்சனங்களுக்கு பதிலளிக்குமாறு பான் கீ மூனிடம் கேட்கப்பட்டது. உண்மையான இழப்புகளின் புள்ளிவிபரங்களை வெளியிடாமல் வைத்திருந்தது உட்பட பொதுமக்களைப் பாதுகாக்கத் தவறிவிட்டமை தொடர்பான விமர்சனங்கள் பற்றி அவரிடம் கேட்கப்பட்டது. ஐ.நா. பணியாளர்களின் பாதுகாப்புக்கு தங்களால் உத்தரவாதமளிக்க முடியாதென இலங்கை அதிகாரிகள் கூறியதாக பான் கீ மூன் தெரிவித்துள்ளார்.

ஆதலால் ஐ.நா. பணியாளர்களை துவக்கு முனையில் வைத்திருப்பதற்கு பான் கீ மூன் இடமளித்திருக்கிறாரா? உண்மைகளை வெளியிடாமல் பான் கீ மூனின் ஐ.நா. வைத்திருந்தது. இந்நிலையில் எத்தனை பொதுமக்கள் கொல்லப்பட்டனர். அச்சமயம் ஐ.நா. மட்டத்திலிருந்து இன்னர் சிற்றி பிரஸுக்கு இழப்புகளின் எண்ணிக்கை தொடர்பான விபரம் வழங்கப்பட்டது. மனிதாபிமான விவகாரங்களுக்கான ஒருங்கிணைப்புக் குழுவின் ஐ.நா. அலுவலகம் இந்த விபரத்தை வழங்கியிருந்தது. அதனை நியூயோர்க்கிலுள்ள ஐ.நா. உறுதிப்படுத்த மறுத்திருந்தது. அதனை இன்னர் சிற்றி பிரஸ் பிரசுரித்த பின்னரும் கூட விபரத்தை உறுதிப்படுத்த நியூயோர்க்கிலுள்ள ஐ.நா. மறுத்துவிட்டது.

வெள்ளைக் கொடி விவகாரத்தில் பான் கீ மூனின் சிரேஷ்ட ஆலோசகர் விஜே நம்பியாரின் பங்களிப்பு குறித்து அவரிடம் கேட்கப்பட்டது. அக் கேள்வியை பான் கீ மூன் தவிர்த்துக் கொண்டார். ஐ.நா. செயற்பாடுகள் தொடர்பாக மீளாய்வுக்குத் தான் ஏற்பாடு செய்வார் என்று பான் கீ மூன் கூறினார். தனது சிரேஷ்ட ஆலோசகர்களுடன் கலந்து ஆலோசனை மேற்கொண்ட பின் அதனைச் செய்வார் என பான் கீ மூன் கூறுகிறார் அது நம்பியாருடனா?
"இலங்கையில் இருந்த ஐ.நா.தூதுக்குழுக்களின் செயற்பாடுகள் மற்றும் பணிகளை மீளாய்வு செய்ய நான் முயற்சிப்பேன். நான் எனது சிரேஷ்ட ஆலோசகர்களுடன் இந்த விடயம் தொடர்பாக கலந்தாலோசனை செய்யவுள்ளேன்' என்று பான் கீ மூன் கூறியுள்ளார்.  நிபுணர் குழுவின் அறிக்கையின் முகவுரைக் கடிதத்தில் "விசாரணைப் பொறிமுறையொன்றுக்கு, (பான் கீ மூன்) ஆலோசனை வழங்கப்பட்டது. சம்பந்தப்பட்ட நாட்டின் இணக்கப்பாடு அல்லது பொருத்தமான அரசாங்கங்களுக்கிடையிலான அமைப்பின் ஊடாக உறுப்பு நாடுகளின் தீர்மானம் இதற்குத் தேவைப்படும்' என்று அறிக்கை முகவுரைக் கடிதத்தில் குறிப்பிடப்பட்டுள்ளது.

இந்த விடயம் தொடர்பாக அவருக்கு எவர் ஆலோசனை கூறியிருந்தார்கள் என்று இன்னர் சிற்றி பிரஸ் பான் கீ மூனைக் கேட்டது. அத்துடன் இலங்கைக்கு நிபுணர் குழு உறுப்பினர்கள் பயணம் மேற்கொள்ள முடியுமென மூன்று தடவைகள் பான் கீ மூன் கூறியிருந்தார். ஆனால், அவர்கள் பயணம் செய்திருக்கவில்லை. ஏன் என்பது குறித்தும் இன்னர் சிற்றி பிரஸ் கேட்டது.  தனக்கு யார் ஆலோசனை வழங்கினார் என்பது குறித்து பான் கீ மூன் கூறவில்லை. அரசாங்கங்களுக்கிடையிலான அமைப்பில் உறுப்பு நாடுகள் ஆணையை வழங்கினால் தான் வரவேற்பார் என பான் கீ மூன் கூறினார்.

"எதிர்கால நடவடிக்கைக்கான காரணம் பற்றி அதாவது சர்வதேச சுயாதீன விசாரணை ஆணைக்குழுவை நான் அமைக்க விரும்பினால் இலங்கை அரசாங்கத்தின் இணக்கம் அல்லது அரசாங்கங்களுக்கிடையிலான அமைப்பின் தெளிவான ஆணை எனக்குத் தேவைப்படும் என்பது உண்மையான விடயம்' என்று பான் கீ மூன் கூறியுள்ளார். இந்த விடயத்தை எடுத்துக் கொள்ளுமாறும் விசாரணையை ஆரம்பிக்க ஆணை வழங்குமாறும் பாதுகாப்புச் சபையை அவர் கேட்டிருந்தாரா என்று கேட்கப்பட்டபோது, சகல உறுப்பினர்களும் அறிக்கையை வைத்திருக்கிறார்கள் என அவர் கூறினார். ஆதலால் அவர் அதனைக் கேட்கவில்லை.

இந்த விடயமானது பாதுகாப்புச் சபையின் ஏப்ரல் மாத தலைவரான கொலம்பியாவின் தூதுவர் நெஸ்டோ ஒசோரியோவினால் உறுதிப்படுத்தப்பட்டுள்ளது. பாதுகாப்புச் சபையில் வாக்கெடுப்பிற்கான கோரிக்கையை பான் கீ மூன் கேட்டிருந்தாரா என்று அவரிடம் இன்னர் சிற்றி பிரஸ் வினா எழுப்பியிருந்தது. நாங்கள் இப்போது தான் அறிக்கை பற்றி குறிப்பெடுத்துள்ளோம் என்று அவர் பதிலளித்தார். இது நீதி சம்பந்தமான  வழமையான விடயமென அவர் கூறினார். ஆனால், ஆணையில்லாமல் விசாரணை மேற்கொள்ள முடியாதென பான் கீ மூன் கூறுகிறார். தனக்கு இந்த ஆலோசனையை யார் வழங்கினார்கள் என்பதைத் தெரிவிப்பதற்கு அவர் மறுத்துவிட்டார்.

இலங்கைக்கு நிபுணர் குழு பயணம் மேற்கொள்ள முடியுமென மூன்று தடவைகள் பான் கீ மூன் தெரிவித்திருந்தமை குறித்து விபரிக்குமாறு இன்னர் சிற்றி பிரஸ் அவரைக் கேட்டது. அவர்கள் அங்கு செல்வதற்கு அனுமதியளிக்கப்படவில்லையென்பதே விடயமாகும். அவர்கள் மிகக் கடுமையாக முயற்சித்ததாக பான் கீ மூன் கூறினார். பின்னர் நிபுணர் குழுவுடன் சட்டமா அதிபர் மொஹான் பீரிஸ் சந்தித்த விடயம் பற்றி குறிப்பிட்டார். நிபுணர் குழு பயணம் மேற்கொள்வதற்கு இலங்கை அரசாங்கத்திடமிருந்து (அனுமதி) பெற நாங்கள் கடுமையாக முயற்சித்தோம். நிபுணர் குழுவை வரவேற்பதற்கு அவர்கள் மிகவும் தயக்கத்தைக் கொண்டிருந்தனர். இறுதியில் அவர்கள் உயர்மட்ட அதிகாரிகளை அனுப்பியிருந்தனர். அந்த அதிகாரிகள் நிபுணர் குழுவைச் சந்தித்தனர் என்று பான் கீ மூன் தெரிவித்துள்ளார்.