சீனா,ரஷ்யாவை எதிர்த்து நிற்பதற்கு போதிய பலமற்றவர் பான் கீ மூன்

இலங்கையின் போர்க் குற்றச்சாட்டுகள் தொடர்பாக விசாரணையை மேற்கொள்வதில் தோல்வி கண்டுள்ளதாக ஐ.நா. செயலாளர் நாயகம் பான் கீ மூன் கடுமையான விமர்சனங்களுக்கு இலக்காகியிருக்கும் நிலையில்,இந்த விடயத்தில் ரஷ்யா மற்றும் சீனாவை எதிர்த்து நிற்பதற்கான வலுவில்லாதவராக பான் கீ மூன் இருக்கின்றாரென்று ஐ.நா. வின் முன்னாள் பிரதிச் செயலாளர் நாயகம் ஒருவர் "சனல்4 நியூஸ்' தொலைக்காட்சி சேவைக்கு தெரிவித்துள்ளார். இலங்கை யுத்தத்தின் இறுதிக்கட்டத்தின்போது பொதுமக்கள் இழப்புகள் அதிகளவு இடம்பெற்றதாகத் தெரிவிக்கப்படும் குற்றச்சாட்டுகளை விசாரணை செய்வதற்கு தனிப்பட்ட முறையில் உத்தரவிடுவதற்கு தனக்கு அதிகாரம் போதாமலிருப்பதாக பான் கீ மூன் கூறியிருந்தார்.
ஐ.நா. பாதுகாப்புச் சபையின் ஆதரவு இல்லாமல் சர்வதேச விசாரணைக்கு பான் கீ மூன் ஏற்பாடு செய்ய முடியுமென மனித உரிமைகள் கண்காணிப்பகம் கூறுகின்றது. ஆனால், சீனாவையும் ரஷ்யாவையும் எதிர்த்து நிற்பதற்கு பான் கீ மூன் தயங்குவதாக விமர்சகர்கள் கூறுகின்றனர். இலங்கை மோதல் தொடர்பாக விசாரணை நடத்துவதற்கு ஐ.நா. பாதுகாப்புச் சபையின் வீட்டோ அதிகாரமுடைய நிரந்தர உறுப்பினர்களாக சீனாவும் ரஷ்யாவும் உள்ளன.

ஐ.நா. வின் செயலாளர் நாயகம் பதவிக்கு மீண்டும் தேர்தலில் நிற்பதை பான் கீ மூன் நோக்கமாகக் கொண்டுள்ளாரெனவும் சீனா மற்றும் ரஷ்யாவின் ஆதரவு அதற்குத் தேவைப்படுவதாகவும் விமர்சகர்கள் கூறுகின்றனர். 2006 இல் முன்னாள் செயலாளர் நாயகம் கொபி அனானின் கீழ் பிரதிச் செயலாளர் நாயகமாகப் பதவி வகித்தவர் மார்க் மல்லோ பிறவுண் ஆவார். மனித உரிமைகள் தொடர்பாக சீனா மற்றும் ரஷ்யாவுடன் மோதும் விடயத்தில் மேற்குலக தாராளவாதக் கொள்கையுடையவர்கள் "புதிய கெடுபிடி யுத்த'ச் சிந்தனைகளைக் கொண்டிருப்பதால் சாத்தியமற்ற நிலைப்பாட்டை பான் கீ மூன் கொண்டிருப்பதாக மல்லோ பிறவுண் சனல்4 செய்திச் சேவைக்குக் கூறியுள்ளார்.

திரும்பத் தேர்தலுக்கு முகங்கொடுக்கும் எந்தவொரு செயலாளர் நாயகமும் அரசியல் கண்ணிவெடி வயலில் நடந்துகொண்டிருக்கின்றனரென்பது தெளிவானதென ஜோன் ஜே மெற்ஸ்லர் கூறியுள்ளார். ஐ.நா. நிபுணர் குழுவின் அறிக்கையானது மனித உரிமைக் குழுக்கள் மற்றும் புலம்பெயர்ந்த தமிழர்களின் புலி ஆதரவு உறுப்பினர்களிடமிருந்து பெற்றுக்கொண்ட தவறான குற்றச்சாட்டுகளை அடிப்படையாகக் கொண்டதென அரசாங்கம் கூறுகிறது. சர்வதேச விசாரணைக்கு இலங்கை அரசாங்கத்தின் ஆதரவு தேவையென பான் கீ மூன் கூறியுள்ளார். இந்த விடயம் ஏற்கனவே நிராகரிக்கப்பட்டுள்ளது. ஐ.நா. பாதுகாப்புச் சபையிலும் இந்த விடயம் சீனா மற்றும் ரஷ்யாவினால் வீட்டோ செய்யப்படும் சாத்தியமுள்ளது.

கடந்த வாரம் ரஷ்யாவுக்கு பான் கீ மூன் விஜயம் மேற்கொண்டிருந்தார். இந்த வருட முடிவில் ஐ.நா. வின் இரண்டாவது பதவிக் காலத்துக்கு ஆதரவு கோருவதற்கான பயணமாக ரஷ்ய விஜயம் அமையுமென எதிர்பார்க்கப்பட்டது. தனிப்பட்ட ஆதரவை பான் கீ மூன் கேட்டிருந்தாரென்பதை அவரின் பேச்சாளர் மறுத்துள்ளார். பிரதான விடயங்கள் தொடர்பான ஐ.நா. வின் பணிகளுக்கு ரஷ்யாவின் முழு அளவிலான ஆதரவையே பான் கீ மூன் கேட்டிருந்தாரென்று அவரின் பேச்சாளர் தெரிவித்துள்ளார்.

தென்கொரியாவின் முன்னாள் வெளிவிவகார அமைச்சரான பான் கீ மூன் செயலாளர் நாயகம் பதவிக்கு மீண்டும் போட்டியிடுவது குறித்து பகிரங்கமாக அறிவித்திருக்கவில்லை. ஆனால், தனது விருப்பத்தை தனிப்பட்ட முறையில் அவர் நாடியிருக்கக்கூடுமென இராஜதந்திரிகள் கூறுகின்றனர். இரண்டாவது பதவிக் காலமான ஐந்து வருடங்களுக்கு அவருக்கு ஆதரவை வழங்குவதற்கு அமெரிக்கா மற்றும் ஐ.நா. பாதுகாப்புச் சபையின் முக்கிய உறுப்பினர்கள் பூர்வாங்க உறுதிமொழிகளை வழங்கியிருப்பதாக இராஜதந்திரிகள் கூறுகின்றனர்.

அவர் மீண்டும் தேர்தலை நாடுகிறாரென்பதை நான் நம்புகிறேன். அவ்வாறு செய்வதற்கான தனது உரிமைகளின் மட்டத்துக்குள் நின்று அவர் நிச்சயம் அதனைச் செய்வாரென நினைக்கிறேன் என்று ஐ.நா. வின் நிருபரும் நியூயோர்க்கிலுள்ள சென்.ஜோன்ஸ் பல்கலைக்கழகத்தில் ஆசிய கற்கைகளுக்கான விரிவுரையாளருமான ஜோன் ஜே மெற்ஸ்லர் கூறியுள்ளார். பாதுகாப்புச் சபையிலுள்ள ஐந்து நிரந்தர உறுப்பினர்களின் நலன்களை அவர் சமனாகக் கொண்டிருத்தல் அவசியமாகும். மனிதாபிமான விவகாரங்கள் முன்வரும்போது அவர் மிகமிகக் கவனமாகச் செயற்படுவது அவசியம்.

எந்தவொரு செயலாளர் நாயகமும் மீளத் தேர்தலை எதிர்கொள்ளும்போது அரசியல் கண்ணிவெடி வயலில் நடந்து கொண்டிருப்பார். விசேடமாக மனித உரிமை மீறல் விவகாரங்கள் வரும்போது அவ்வாறு செயற்பட்டுக் கொண்டிருப்பார். இந்த மாதிரியான பல அரசாங்கங்கள் நாங்கள் இறைமையுள்ள அரசு, உங்களை இங்கு வருமாறு நாங்கள் அழைத்திருக்கவில்லையென்று கூறப்போகின்றனர். வெள்ளப்பெருக்கு ஏற்பட்ட பின்னர் ஹெய்டியிலும் பாகிஸ்தானிலும் மனிதாபிமானப் பணிகளை மேற்கொள்வதில் மிக சுறுசுறுப்பாக அவர் ஈடுபட்டிருந்தார். இலங்கையோ அல்லது டார்பரோ சம்பந்தப்பட்ட சில விடயங்கள் மேலெழுந்துவரும்போது அவர்கள் பின்சென்று விடுவார்கள். அந்த விடயங்கள் அரசியல் ரீதியானவையானவையாகவும் மிகவும் எச்சரிக்கையான விடயங்களாகவும் உருவாகிவிடும் என்று ஜோன் ஜே மெற்ஸ்லர் கூறியுள்ளார்.

வயலைச் சூழவர யானைகளின் காலடிச் சத்தம் கேட்கும்போது அதன் நடுவில் அவர் நின்று கொண்டிருப்பது மிகக் கடுமையானதொன்று என்று மார்க் மல்லோ பிறவுண் கூறியுள்ளார். சிறுபான்மையினர்களின் உரிமைகளுக்கு அதிகளவு மதிப்பளிக்கப்பட வேண்டுமென மேற்குலக தாராளவாத ஜனநாயகங்கள் அழைப்பு விடுத்துக் கொண்டிருக்கின்றன. இது புதிய கெடுபிடி யுத்தச் சிந்தனைகளாகும். இந்தச் சிந்தனைகள் மற்றும் சீனா போன்றவற்றுடன் மோதிக்கொண்டிருக்கின்றன. தேசிய இறைமை தொடர்பாக சர்வதேச கண்காணிப்பை அதிகளவுக்கு மேற்கொள்வதை ரஷ்யா,சீனா போன்றவை நிராகரிக்கின்றன என்று மல்லோ பிறவுண் தெரிவித்திருக்கிறார்.

சர்வதேச சமூகத்தின் ஆதரவை பான் கீ மூன் கொண்டிருக்காவிடின் மற்றும் தற்போது போன்று கடுமையான நிலைப்பாட்டை இலங்கையர்கள் தொடர்ந்தும் கொண்டிருந்தால் எந்தவொரு விசாரணையையும் பான் கீ மூன் பூரணப்படுத்துவது அநேகமாக சாத்தியமற்றதென்று மல்லோ பிறவுண் தெரிவித்துள்ளார். மனித உரிமைகள் வேலியின் முன்னால் பான் கீ மூன் விழுந்துவிடக்கூடும். ஆனால், இந்த விடயமானது பிரயோசனமான விதத்தில் அவருக்கு ஏதோவொரு விதத்திலும் வெற்றியைத் தேடித்தரக்கூடியதொன்றல்ல.

தனது சொந்த அரசியல் அனுகூலத்திற்காக ஐ.நா. வின் அதிகாரத்தைப் பயன்படுத்தும் எவரையும் இலங்கையானது அதியுயர்தரத்தை வழங்க முடியும். இந்த விவகாரமானது புதிய கிழக்கையும் மேற்கையும் பிரிக்கும் விடயமாகும். கிழக்கு மிகவும் முக்கியமானதென்ற கருத்துணர்வை இலங்கை கொண்டிருக்கின்றது. அரபுலகத்தில் என்ன நடந்து கொண்டிருக்கின்றதென்பதிலும் பார்க்க இது அதிகளவுக்கு முக்கியமானதாகும் என்று அவர் மேலும் கூறியுள்ளார்.

ஒவ்வொரு வருடமும் உள்நாட்டு புலனாய்வுத் தலைவர்களின் சந்திப்பு இடம்பெறுகிறது. அவ்வாறொன்று இடம்பெற்ற பின்னர் இலங்கையில் தமிழர்களுக்கு என்ன நடந்தது? இராணுவத் தீர்வாகவே இருக்க முடியுமென்பதை இலங்கையர்கள் நிரூபித்து விட்டதாக அங்கு அபிப்பிராயம் உள்ளது. இந்நிலையில், இதனை மேற்குலகின் தோல்வியடைந்த சிந்தனையாக நீங்கள் பின்பற்ற வேண்டியதில்லை.பயங்கரவாதிகளுடன் விடயங்களை கையாளுகிறீர்கள் என்றே அவர்கள் பார்க்கின்றார்கள். செச்சினியாவிலும் இராணுவத் தீர்வு என்ற கருத்தையே ரஷ்யர்கள் கொண்டிருப்பதாகத் தென்படுகிறதென்று மல்லோ பிறவுண் கூறியுள்ளார்.