ஆட்சி மாறினால் தமிழ்த் திரையுலக காட்சியும் மாறும்

தமிழ் சினிமா தயாரிப்பு துறையில் பரபரப்பாக திரையுலகில் இருந்த கேயார் தற்போது சினிமாவைவிட்டு விலகி நின்று, வேடிக்கை பார்த்து வருகிறார். சினிமா துறையில் பெருகிய அடாவடிகள், நேர்மையற்ற போக்கு போன்ற அதிருப்தி தான் இதற்கு காரணம். தமிழ் திரையுலகில் என்ன நடக்கிறது என கேட்டால், வேதனையும், கோபமும் கலந்த கலவையாய் கொந்தளிக்கிறார். அவருடனான பேட்டியில் யார் ஆட்சிக்கு வருகிறார்களோ, அவர்களுக்கு ஒத்துழைப்பதை சினிமா சங்கங்கள் தொடர்கிறதே என்ற போது சினிமா சங்கங்கள் ஆளும் கட்சிக்கு ஆதரவாக இருப்பதில் தவறில்லை. ஆனால், ஆளும் கட்சியின் கை கூலிகளாக செயல்படக் கூடாது என்றார்.

தமிழகத்தில் ஆட்சி மாற்றம் வேண்டும் என அரசியல் கட்சிகள் சொன்னால் பரவாயில்லை. ஆனால், சினிமா துறையில் உள்ள உங்களை போன்றவர்கள், ஆட்சி மாற்றம் வேண்டும் என கேட்பது வித்தியாசமாக இருக்கிறதே எனக் கேட்டபோது, பெரும்பாலான சினிமாக்காரர்கள், தமிழகத்தில் ஆட்சி மாற்றம் ஏற்பட வேண்டும் என்று நினைக்கின்றனர். ஆட்சி மாற்றம் வந்தால், அரசு மூலம் கேபிள், தொலைக்காட்சி அலைவரிசை நடத்தப்படும் என்று தேர்தல் அறிக்கையில் தெரிவிக்கப்பட்டுள்ளது.

அரசு அலைவரிசை நடத்தினால், பெரிய முதலீடுகளுடன் பலர் தொலைக்காட்சி அலைவரிசை தொடங்க தமிழகத்திற்கு வருவர். போட்டியால், அரசுக்கு ஆதாயமும் கிடைக்கும், தமிழில், தற்போது, 200 படங்கள் முழுவதுமாக முடிக்கப்பட்டு, வியாபாரம் ஆகாமல் முடங்கியுள்ளன. 300 படங்கள் அரைகுறையாக நிறுத்தப்பட்டுள்ளன. இவைகளுக்கு விடிவு காலம் கிடைக்க இதுவும் ஒரு வழியாக இருக்கும் என்றார்.

எந்த கட்சி ஆட்சிக்கு வருகிறதோ, அந்த கட்சி சார்ந்தவர்கள் முன்னிலை பெறுவது வழக்கம் தானே என்றபோது யார் பொறுப்பில் இருக்கின்றனர் என்பது முக்கியமில்லை: அவர்கள் என்ன செய்தனர் என்பது தான் முக்கியம். நலிவடைந்த நிலையில் இருந்த தயாரிப்பாளர்களை காக்க, தமிழ் திரைப்பட தயாரிப்பாளர்கள் சங்க நல அறக்கட்டளையை நான், கே. ஆர். ஜி., பாலசந்தர் ஆகியோர் தொடங்கினோம் அப்போது தூர்தர்ஷன் பணம் கொடுத்து பாடல்கள், “கிளிப்பிங்ஸ்”கள் ஒளிபரப்பி வந்தது.

இதன் மூலம் தயாரிப்பாளர்களுக்கு ஆதாயம் கிடைத்தது. இதில் கிடைத்த பங்கில், அறக்கட்டளைக்கு ஒருகோடி ரூபாய் வரை சேமிப்பும் இருந்தது. இப்போது நல்லது செய்த அறக்காவலர்களை புறக்கணிப்பதில் தான் தயாரிப்பாளர்கள் சங்க நிர்வாகிகள் குறியாக இருந்தனர் என்றார்.

திரையுலகில் அரசியல் குறுக்கீடு இருப்பதாக குற்றம் சாட்டுகிaர்கள் அப்படி என்ன குறுக்கீடு இருக்கிறது என கேட்டபோது திரையரங்குகளில் இரண்டு வாரம் ஓடக்கூடிய படம், அரசியல் செல்வாக்கால், நிறைய நாட்கள் ஓட்டப்படுகிறது. இதனால், வெளியிட தயாராக இருந்தும், சரியான நேரத்தில் வெளியிட முடியாமலும், திரையரங்குகள் கிடைக்காமலும் பல படங்கள் முடங்கும் நிலை தொடர்கிறது.

சினிமாவில் நஷ்டம் உறுதி என்பதால் பல பைனான்சியர்கள் வேறு தொழில்களுக்கு சென்றுவிட்டனர்.

தொலைக்காட்சி அலைவரிசைகள் இல்லை என்ற அளவிற்கு தொலைக்காட்சி அலைவரிசைகளில் சினிமா நிகழ்ச்சிகள் நிரந்தரமாகி, அவர்களுக்கு வருவாயை கொட்டி கொடுக்கிறது என்றார்.

இப்போது எல்லாம் படம் வெளியான அன்றே திருட்டு ‘விசிடி’ வந்து விடுகிறதே என்றபோது சிறிய பட்ஜெட் படங்களை விநிகோகஸ்தர்கள் வாங்குவதில்லை. முன்னணி நடிகர்கள் நடித்த பெரிய பட்ஜெட் படங்கள் தான் வியாபாரமாகின்றன. இதனால், இப்படங்களுக்கு கட்டணம் அதிகம் வாங்கினால் தான் கட்டுப்படியாகும் என நினைத்து, திரையரங்காளர்கள் இஷ்டத்திற்கு கட்டணத்தை உயர்த்துவதால், திரையரங்குகளுக்கு மக்கள் வருவது குறைந்துவிட்டது. இதனால், திருட்டு ‘விசிடி’ வருவது அதிகரித்துவிட்டது என்றார்.