அனானின் அமைதி முயற்சியை 10 ஆம் திகதிக்குள் கடைபிடிக்க சிரியா இணக்கம்

ஐ.நா. மற்றும் அரபு லீக் விசேட பிரதிநிதி கொபி அனானில் ஆறு அம்ச அமைதி முயற்சியை எதிர்வரும் ஏப்ரல் 10 ஆம் திகதிக்குள் நடைமுறைக்கு கொண்டுவர சிரிய அரசு இணக்கம் தெரிவித்துள்ளது. கொபி அன்னானின் அமைதி கோரிக்கையின்படி, சிரியாவில் அனைத்து தரப்புகளும் ஐ. நா. மேற்பார்வையின் கீழ் யுத்த நிறுத்தத்தை கடைபிடிக்க வேண்டும். இதன் மூலம் நகரங்களில் இருந்து கனரக ஆயுதங்கள், வீரர்கள் வெளியேற வேண்டும். அத்துடன் மனிதாபிமான உதவிகளுக்கு அனுமதி அளிக்கப்படவேண்டும் என கூறப்பட்டுள்ளது. இந்நிலையில் ஐ.நா. பாதுகாப்புச் சபையில் உரையாற்றிய கொபி அனான் சிரியாவின் நிலைப்பாடு குறித்து குறிப்பிட்டார். அதில் சிரியா ஏப்ரல் 10 க்குள் தனது ஆறு அம்ச கோரிக்கையை நடைமுறைப்படுத்த இணங்கியதாக தெரிவித்தார்.

எனினும் சிரியாவில் தொடர்ந்து வன்முறைகள் நீடித்து வருகிறது. இத்லில் மற்றும் ஹோம்ஸ் நகரங்களில் தொடர்ந்து மோதல் இடம்பெறுவதாக எதிர்ப்பாளர்கள் கூறினர். சிரிய அரசு ஆறு அம்ச அமைதி முயற்சியை எதிர்வரும் செவ்வாய்க் கிழமைக்குள் நடைமுறைப்படுத்துவதற்கு பாதுகாப்புச் சபை அழுத்தம் கொடுக்க வேண்டும் என கொபி அனான் கோரிக்கை விடுத்தார். கொபி அனான் முன்வைத்த ஆறு அம்ச அமைதி முயற்சிக்கு சிரிய அரசு கடந்த வாரம் இணக்கம் தெரிவித்திருந்தது. ஆனால் பஷர் அல் அஸாத் அரசு அந்த திட்டத்தை இதுவரையில் நடைமுறைக்கு கொண்டுவரவில்லை என சர்வதேச நாடுகள் குற்றம்சாட்டியுள்ளன.

பாதுகாப்புச் சபையில் கொபி அனானின் உரைக்கு பின்னர் பேசிய ஐ. நாவுக்கான அமெரிக்க தூதுவர் சுசான் ரைஸ், ‘நாம் வாக்குறுதிகளையும் அதனை மீறுபவர்களையும் நாம் கண்டிருக்றோம். இதுபோன்ற கடந்தகால அனுபவங்களை கொண்டு சந்தேகத்துட னேயே இதனை எம்மால் பார்க்க முடிகிறது’ என்றார். எனினும் ஏப்ரல் 10 ஆம் திகதிக்குள் 6 அம்ச அமைதி முயற்சியை கடைபிடிப்பதை ஐ.நா. வுக்கான சிரிய தூதுவர் பஷர் ஜாபர் உறுதி செய்தார். ஆனால் அனான் எதிர்த்தரப்பினரையும் இதுபோன்று இணங்கச் செய்ய வேண்டும் என்றார்.

கொபி அனானின் பிரதி பிரதிநிதியான நாஸர் அல்கித்வா மேற்படி அமைதி முயற்சியை நடைமுறைப்படுத்துவதற்கு எதிர்த்தரப்பினருடன் பேச்சுவார்த்தை நடத்தி வருகிறார். இதன்படி சிரிய அரசு அமைதி முயற்சியை கடைபிடித்து 48 மணித்தியாலயங்க ளுக்குள் எதிர்த்தரப்பினர் அதனை நடைமுறைப்படுத்த அழுத்த கொடுக்கப்பட்டு வருவதாக சுசான் ரைஸ் கூறினார். எனினும் எதிர்த்தரப்பினர் தமது தாக்குதல்களை நிறுத்தும் வரை நகரங்களில் இருந்து இராணுவத்தினரையும், ஆயுதங்களையும் திருப்பிப் பெற சிரிய அரசு தயார் இல்லை என்றும் அன்னான் பாதுகாப்புச் சபை கூட்டத்தில் குறிப்பிட்டுள்ளார். இதேவேளை, சர்வதேச செஞ்சிலுவை சங்கத்தின் தலைவர் ஜகப் கெலன்வகர் டமஸ்கஸ் சென்றுள்ளார். பாதிக்கப்பட்ட பகுதிகளில் மனிதாபிமான உதவிகளை முன்னெடுப்பது மற்றும் கைதிகளுக்கான மனிதாபினமான உதவிகளுக்கு அனுமதி கோருவது குறித்து சிரிய அரசுடன் பேச்சுவார்த்தை நடத்தவுள்ளார். கெலன்வகர் இருநாள் சுற்றுப் பயணத்தின்போது மோதல்களால் பாதிக்கப்பட்ட பகுதிகளை அவர் பார்வையிடவுள்ளதாக செஞ்சிலுவை சங்கம் கூறியுள்ளது.