அமெரிக்காவில் அடுத்தடுத்து குண்டு வெடிப்பு: சிறுவன் உட்பட மூவர் பலி: 140 பேர் படுகாயம்

அமெரிக்காவின் பொஸ்டன் நகரில் அடுத்தடுத்து இடம்பெற்ற இரு குண்டு வெடிப்புச் சம்பவங்களில் மூன்று பேர் பலியாகியுள்ளனர். மேலும் 140 க்கும் அதிகமானோர் படுகாயம் அடைந்துள்ளனர். குண்டுவெடிப்பை அடுத்து அமெரிக்கா எங்கும் பாதுகாப்பு உஷார்படுத்தப்பட்டுள்ள நிலையில் தீவிரவாத தாக்குதல் கோணத்தில் அமெரிக்க புலனாய்வுத் துறையான எப். பி. ஐ. விசாரணைகளை முடக்கிவிட்டுள்ளது. பொஸ்டன் பொலிஸாரின் விடுமுறைகள் அனைத்தும் ரத்துச் செய்யப்பட்டு அனைவரும் பணிக்கு திரும்புமாறு அறிவிக்கப்பட்டுள்ளது. காயமடைந்தோரில் 17 பேரின் நிலை கவலைக்கிடமாக உள்ளது.

பலியானோரில் 8 வயது சிறுவன் ஒருவனும் உள்ளடங்குவதாக அமெரிக்க ஊடகங்கள் செய்தி வெளியிட்டுள்ளன. தொலைக்காட்சியூடே நாட்டு மக்களுக்கு உரையாற்றிய அமெரிக்க ஜனாதிபதி பராக் ஒபாமா தாக்கதலின் பின்னணியில் உள்ளவர்கள் நீதிக்கு முன் நிறுத்தப்படு வார்கள் என வலியுறுத்தியுள்ளார்.

“அதனைச் செய்தது யார் என்பதை நாம் கண்டு பிடிப்போம். அவர்கள் ஏன் இதனைச் செய்தார்கள் என்பதையும் கண்டுபிடிப்போம். இதற்குப் பொறுப்பான தனி நபர்கள், குழுக்கள் நிச்சயம் நீதிக்கு முன் நிறுத்தப்படுவார்கள்” என்று ஒபாமா தனது உரையில் கூறியிருந்தார்.

எவ்வாறாயினும் ஒபாமாவின் உரையில் “தீவிரவாதம்” என்ற வார்த்தை பயன்படுத்தப்படவில்லை என்பது குறிப்பிடத்தக்கது. எனினும் வெள்ளை மாளிகை பின்னர் வெளியிட்ட அறிவிப்பில், “ஒன்றுக்கும் மேற்பட்ட குண்டுத் தாக்குதல் சம்பவம் தீவிரவாத செயல் என்பது தெளிவாகிறது. எனவே தீவிரவாத செயல் என்ற கோணத்திலேயே நடவடிக்கை எடுக்கப்படும்” என கூறப்பட்டது.

அடுத்தடுத்து வெடிப்பு

ஆண்டுதோறும் நடைபெறும் உலகின் மிகப் பழைமையான மரதன் போட்டி 117 ஆம் தடவையாக பொஸ்டனில் நேற்று முன்தினம் நடைபெற்றது. போட்டியாளர்கள் இறுதிக்கட்டத்தை நெருங்கிக் கொண்டிருக்கும் போது ஓடுதளத்தின் அருகிலேயே பயங்கர சத்தத்துடன் குண்டு வெடித்தது. இதனால் பார்வையாளர்கள் மற்றும் போட்டியாளர்கள் அலறியடித்து ஓட்டம் பிடித்தனர்.

இந்நிலையில் குண்டு வெடிப்பு இடம்பெற்ற பகுதியில் காயத்துக்குள் ளானோரை மீட்கும் நோக்கில் பொலிஸார் அந்தப் பகுதியை நோக்கி ஓட ஆரம்பித்தனர். இதனிடையே முதல் குண்டு வெடித்த இடத்திலிருந்து சற்று தூரத்தில் மக்கள் கூடியிருக்கும் மற்றொரு இடத்தில் இரண்டாவது குண்டு வெடித்தது.

இந்த குண்டு 50 முதல் 100 மீற்றருக்கு அப்பாலேயே வெடித்தது.

சம்பவ இடத்திற்கு விரைந்த மீட்புப் படையினர் காயமடைந்தவர்களை மீட்டு மருத்துவமனையில் சேர்த்தனர். வீதிகள் எங்கும் குண்டு வெடிப்பின் சிதறல்கள் பரவிக் கிடப்பதை தொலைக்காட்சிகள் ஒளிபரப்பின. குண்டுவெடிப்பில் குறைந்தது 140 பேர் காயமடைந்ததாக மருத்துவ அதிகாரிகள் உறுதி செய்துள்ளனர். இதில் பலரது கை, கால்கள் துண்டிக்கப்பட்டிருப்பதாகவும், வெட்டுக்காயங்கள், கீறல்களுக்கு உள்ளானோரும் இருப்பதாகவும் குறிப்பிடப்பட்டுள்ளது.

குண்டு வெடிப்பு குறித்து பொஸ்டன் பொலிஸ் ஆணையாளர் எட்வட் டேவிஸ் ஊடக மாநாட்டில் கூறும் போது, இந்த அசம்பாவிதம் குறித்து முன்கூட்டியே எந்த உளவு தகவலும் கிடைக்கவில்லை என்றார். அனைவரும் வீடுகளில் இருக்கும்படியும் கூட்டம் கூடுவதை தவிர்க்கும்படியும் பொஸ்டன் மக்களுக்கு அவர் கோரிக்கை விடுத்தார்.

இதனைத் தொடர்ந்து நேற்று அவர் இரண்டாவது முறை நடத்திய ஊடக மாநாட்டில் குண்டுத் தாக்குதலுடன் தொடர்புடைய சந்தேக நபர்கள் கைது செய்யப்பட்டிருப்பதாகக் குறிப்பிட்டார். இந்த சம்பவம் தொடர்பிலான விரிவான விசாரணைகள் ஆரம்பிக்கப்பட்டிருப்பதாக பொஸ்டன் ஊடகங்கள் குறிப்பிட்டுள்ளன. விசாரணை தொடர்பில் சோதனைகள் மேற்கொள்வதற்கான நீதிமன்ற அனுமதி கிடைக்கப்பெற்றிருப்பதாக பொலிஸார் குறிப்பிட்டுள்ளனர்.

8 வயது சிறுவன் பலி

குண்டு வெடிப்பில் பலியானோர் விபரம் உத்தியோகபூர்வமாக உறுதிப்படுத்தப் படாவிட்டாலும் கொல்லப்பட்டோரில் எட்டு வயது சிறுவனும் உள்ளடங்குவதாக செய்தி வெளியாகியுள்ளது. மார்டின் ரிச்சட் என்ற சிறுவனே கொல்லப்பட்டுள்ளான். சிறுவனின் தாய் மற்றும் சகோதரியும் காயமடைந்து மருத்துவமனையில் சிகிச்சை பெற்று வருகிறார்கள். சிறுவன் மற்றும் அவனது குடும்பத்தினர் தனது தந்தை மரதன் போட்டியை நிறைவுசெய்யும் வரை காத்து நின்றுள்ளனர்.

மரதன் போட்டியுடன் தொடர்புடைய வீடியோ மற்றும் புகைப்பட ஆதாரங்களை பொலிஸார் சோதனையிட ஆரம்பித்து ள்ளனர். இதில் குறித்த பகுதியில் வெடிக்காத இரு குண்டுகளும் மீட்கப்பட்டதாக உறுதிப்படுத்தப்படாத தகவல்கள் தெரிவிக்கின்றன.

இந்த மரதன் போட்டியில் பங்கேற்ற மாநில பொலிஸ் அதிகாரி ரூபன் பஸ்டஜியான் சம்பவம் குறித்து கூறும் போது, “எனது ஓட்டத்திற்கு மத்தியில் குண்டு வெடிப்புச் சத்தம் கேட்டது. அனைத்துப் பக்கமும் மக்கள் தரையில் விழுந்து கிடந்தார்கள்.

குறைந்தது 25, 30 பேரது ஒரு கால் அல்லது கணுக்கால் அல்லது இரு கால்களும் இல்லாமல் இருந்தது” என்றார். எவ்வாறாயினும் பொஸ்டன் தாக்குதலுடன் தொடர்புபட்டவர்கள் வெளிநாட்டு தீவிரவாதிகளா அல்லது உள்நாட்டினரா என்பது குறித்து கண்டறிவதற்கு கால அவகாசம் போதாது என்று வெள்ளை மாளிகை மற்றும் விசாரணை அதிகாரிகள் சுட்டிக்காட்டி யுள்ளனர்.

18 ஆண்டுகளின் பின் தாக்குதல்

கடந்த 1995 ஆம் ஆண்டு ஒக்லஹாமா நகரில் தீவிர வலதுசாரி ஆயுதக்குழுவைச் சேர்ந்த அமெரிக்க பிரஜை டிமொதி மக்விக் நடத்திய குண்டுத் தாக்குதலில் 168 பேர் கொல்லப்பட்டனர். இதற்கு இரண்டு ஆண்டுகளுக்குப் பின் இஸ்லாமிய ஆயுததாரிகள் இரட்டை கோபுரத்தின் மீது நடத்திய குண்டுத் தாக்குதலில் 6 பேர் கொல்லப்பட்டதோடு, 1000க்கும் அதிகமானோர் காயமடைந்தனர்.

இந்த சம்பவங்களுக்குப் பின்னர் அமெரிக்க மண்ணில் இடம்பெறும் மிகப்பெரிய குண்டு வெடிப்புச் சம்பவம் இதுவாகும். குண்டுவெடிப்பைத் தொடர்ந்து அமெரிக்கா எங்கும் பாதுகாப்பு பலப்படுத்தப்பட்டது.

அமெரிக்க உள்நாட்டு விமானங்கள் கீழாகப் பறக்க தடை செய்யப்பட்டு ள்ளதோடு பிரதான நகரங்களான வொஷிங்டன், நியூயோர்க் நகரங்களிலும் பாதுகாப்பு பலப்படுத்தப்பட்டது. பொஸ்டன் குண்டு வெடிப்பு இடம்பெற்று ஒரு சில நிமிடங்களில் பொஸ்டனில் இருக்கும் ஜோன் எப் கென்னடி நூலகத்திலும் வெடிப்புச் சம்பவம் ஒன்று ஏற்பட்டுள்ளது. இந்த வெடிப்புக்கு மூட்டும் சாதனம் ஒன்றே காரணம் தீ என பொலிஸார் குறிப்பிட்டுள்ளனர்.

எனினும் பொஸ்டன் குண்டு வெடிப்புடன் இச் சம்பவம் தொடர்புபட்டதா என்பது குறித்து உறுதிப்படுத்தப்படவில்லை.

ஆண்டுதோறும் நடக்கும் பொஸ்டன் மரதன் ஓட்டப் போட்டியில் 23,000 போட்டியாளர்கள் அளவு பங்கேற்கின் றனர். ஆயிரக்கணக்கான பார்வை யாளர்கள் இந்நிகழ்வில் கலந்துகொள் கின்றனர்.

இந்நிலையில் எதிர்வரும் ஞாயிற்றுக் கிழமை இடம்பெறவுள்ள லண்டன் மரதன் போட்டியின் பாதுகாப்பை பிரிட்டன் பொலிஸார் பலப்படுத்தி யுள்ளனர்.