பொஸ்டன் குண்டு தாக்குதலின் குறிக்கோள் குறித்து புலனாய்வுத்துறை தீவிர விசாரணை

கைது செய்யப்பட்ட பொஸ்டன் குண்டுத்தாக்குதல் சந்தேக நபர் கடும் காயங்களுடன் மருத்துவமனையில் சிகிச்சை பெற்று வரும் நிலையில் இந்த தாக்குதலுக்கான நோக்கம் குறித்து புலனாய்வுத்துறையினர் தீவிர விசாரணையை முடக்கி விட்டுள்ளனர். இதில் குண்டு தாக்குதலின் பின்னணியில் கைதான சுகர் சர்னயெவ்வும் கொல்லப்பட்ட அவரது சகோதரரும் மாத்திரமா உள்ளனர் என்பது தொடர்பிலும் விசாரணைகள் ஆரம்பிக்கப்பட்டுள்ளன. இதில் 19 வயதான சர்னயெவ் கடந்த வெள்ளிக்கிழமை பின்னேரம் அமெரிக்க பொலிஸாரிடம் சிக்கினார். அமெரிக்க சரித்திரத்தின் மிகப் பெரிய பொலிஸ் தேடுதல் வேட்டைகளில் ஒன்றாக 19 வயது சந்தேக நபர் சுகர் சர்னயெவ்வை தேடும் நடவடிக்கை அமைந்திருந்து. ஒரு வீட்டின் கொல்லைப்புறத்தில் நிறுத்தி வைக்கப்பட்டிருந்த படகில் பதுங்கியிருந்த சர்னயெவ்வை பொலிஸார் பிடித்துள்ளனர்.

கொல்லையில் ரத்தம் சிந்தியிருந்த வழியாக வீட்டின் உரிமையாளர் சென்று படகின் மீது போர்த்தியிருந்த தார்ப்பாலின் விரிப்பை தூக்கிப் பார்த்தபோது காயங்களுடன் உள்ளே சுகர் இருந்திருக்கிறார். குண்டுப் பரிமாற்றத்துக்குப் பின்னர்தான் சுகரைப் பொலிஸார் பிடிக்க முடிந்துள்ளது. செச்னியா பூர்வீகம் கொண்ட சுகருக்கு மோசமான காயங்கள் ஏற்பட்டுள்ளன. தற்போது அவருக்கு மருத்துவமனையில் சிகிச்சை அளிக்கப்படுகிறது. பொலிஸார் அவரைப் பிடித்து வாகனத்தில் கொண்டு சென்றபோது அக்கம்பக்கத்தில் இருந்தவர்கள் மகிழ்ச்சியில் ஆரவாரம் செய்தனர்.

மரதன் குண்டு வெடிப்பின் மற்றுமொரு சந்தேக நபராகிய சுகரின் அண்ணன் தமெர்லன், பொலிஸாருடன் நடந்த துப்பாக்கிச் சண்டையில் கொல்லப்பட்டிருந்தார். மரதன் போட்டிகளின் நிறைவுக் கோட்டுக்கு அருகில் சந்தேக நபர்களான இவர்கள் நிற்பது போன்ற படங்களை மத்திய புலனாய்வுப் பொலிஸார் வெளியிட்டதிலிருந்து கிடுகிடுவென பல சம்பவங்கள் நடந்துள்ளன. பலசரக்குக் கடை ஒன்றில் கொள்ளைச் சம்பவம் நடந்தபோது அந்த இடத்திலே சந்தேக நபர்களில் ஒருவர் இருந்ததை பொலிஸார் பார்த்தார்.

அந்த சம்பவத்தை விசாரிப்பதற்காக அனுப்பப்பட்ட பொலிஸ்காரர் சுட்டுக்கொல்லப்பட்டிருந்தார். சந்தேக நபர்களாகிய சகோதரர்கள் இருவரும் கார் ஒன்றை திருடிச் சென்று தப்பிக்க முயன்றனர். அவர்களுக்கும் விரட்டிச் சென்ற பொலிஸாருக்கும் இடையில் நடந்த துப்பாக்கிச் சண்டையில் தான் தமர்லென் அடிபட்டு, அகப்பட்டு பின்னர் உயிரிழந்தார். குண்டு வைத்தவர்கள் தோற்றுவிட் டார்கள் என்பது தெளிவாகிவிட்டது என ஜனாதிபதி ஒபாமா அறிக்கை ஒன்றில் குறிப்பிட்டுள்ளார்.

மரதன் போட்டிகளின்போது இரண்டு குண்டுகள் வெடித்ததில் மூன்று பேர் கொல்லப்பட்டும் நூற்றியெழுபது பேர் காயமடைந்தும் இருந்தனர். இந்நிலையில் காயத்துக்குள்ளாகியுள்ள சந்தேக நபரான சுகார் சர்னயெவ் கடும் பாதுகாப்புக்கு மத்தியில் பொஸ்டனில் இருக்கும் இஸ்ரேல் மருத்துவமனையில் சிகிச்சை பெற்று வருகிறார். எனினும் அவரது கழுத்து, கால் பகுதியில் குண்டு துளைத்த காயம் ஏற்பட்டுள்ளதோடு அதிக இரத்தமும் போயுள்ளது.

 இந்நிலையில் அவர் பேசுவதற்கு அதிக காலம் எடுக்கும் என மருத்துவ வட்டாரங்கள் குறிப்பிட்டுள்ளன. இதில் தற்கொலை முயற்சியால் சந்தேக நபரின் கழுத்தில் துப்பாக்கிக் காயம் ஏற்பட்டிருக்கும் என புலனாய்வாளர்கள் சந்தேகம் வெளியிட்டுள்ளனர்.

இந்த குண்டு தாக்குதலில் கைது செய்யப்பட்ட சந்தேக நபரும் அவரது சகோதரரும் மாத்திரமே தொடர்புபட்டிருப்பதாக வோடர் டவுன் பொலிஸ் பிரதானியை மேற்கோள்காட்டி சி.என். என். தொலைக்காட்சி செய்தி வெளியிட்டுள்ளது.

இதில் கொல்லப்பட்ட டமர்பனிடம் அமெரிக்க உளவுப் பிரிவான எப்.பி.ஐ. கடந்த 2011 ஆம் ஆண்டு விசாரணை நடத்தியுள்ளது. எனினும் அதன்போது அவரிடம் எந்த தீவிரவாத நடவடிக்கையையும் எப்.பி. ஐ. கண்டறியவில்லை. ஆனால் டமர்பன் கடந்த ஆண்டு ஜனவரியில் மொஸ்கோ சென்று 6 மாதங்கள் அங்கு கழித்துள்ளார்.

ஆனால் அவர் அங்கு என்ன செய்தார் என்பது குறித்து இன்னும் விபரம் கண்டறியப்படவில்லை. உளவுப் பிரிவினர் தரப்பில் குறிப்பிடப்பட்டுள்ளது. மறுபுறத்தில் கைது செய்யப்பட்ட சர்னயெவ் மிஸ்சுட்ஸ் பல்கலைக்கழக மாணவராவார். அவர் செவ்வாய், புதன் மற்றும் வியாழக்கிழமைகளில் பல்கலைக்கழகத்தில் இருப்பதாக பல்கலைக்கழக நிர்வாகம் குறிப்பிட்டுள்ளது.

சர்னயெவ்வின் குடும்பத்தினர் ஒரு தசாப்தத்திற்கு முன் அமெரிக்காவுக்கு புலம்பெயர்ந்துள்ளனர். இதில் மேற்படி சகோதரர்கள் தனது சிறு வயது காலத்தை மத்திய ஆசிய நாடான கிரிகிஸ்தானில் செச்னிய சமூகத்தினருடன் கழித்துள்ளனர்.

5.5 மில்லியன் மக்கள் தொகை கொண்ட கிரிகிஸ்தான் பெரும்பான்மை முஸ்லிம்களை கொண்ட நாடாகும். இந்நிலையில் சர்னயெவ் குடும்பத்தினர் 2001 ஆம் ஆண்டு தெற்கு ரஷ்ய மாநிலமான டெஜஸ்தானுக்கு இடம்பெயர்ந்துள்ளனர். பிரிவினவாதிகளின் செயற்பாடுகள் அதிகமுள்ள டெஜஸ்தானிலேயே சர்னயெவ்வின் பெற்றோர் தற்போதும் வாழ்ந்து வருகின்றனர். எனினும் தமது குழந்தைகள் குண்டு தாக்குதல் நடத்த சாத்தியமில்லை என அவர்கள் குறிப்பிட்டுள்ளனர். இதனிடையே பொஸ்டன் நகர் கடந்த சனிக்கிழமை தொடக்கம் வழமைக்கு திரும்பியுள்ளது.