பொஸ்டன் குண்டுவெடிப்பு சந்தேக நபர்களின் விபரம் அறிய அமெரிக்க அதிகாரிகள் டஜஸ்தான் பயணம்

பொஸ்டன் மரதன் குண்டுத் தாக்குதல் சந்தேக நபர்களான இரு சகோதரர்களினதும் பெற்றோரிடம் அமெரிக்க அதிகாரிகள் விசாரணை நடத்தியுள்ளனர். ரஷ்யாவின் டஜஸ்தான் பிராந்தியத்திற்கு சென்றே அவர்களிடம் விசாரணை நடத்தப்பட்டுள்ளது. சந்தேக நபர்களான சொகர் சர்னெவ் மற்றும் தமர்லன் சர்னெவ் ஆகியோர் அமெரிக்காவுக்கு புலம்பெயரும் முன்னர் டஜஸ்தான் பிராந்தியத்திலேயே வாழ்ந்து வந்தனர். இதில் பொலிஸாருடனான துப்பாக்கிச் சண்டையில் கொல்லப்பட்ட தமர்லன் கடந்த 2012 இல் அங்கு சென்று நீண்ட காலம் தங்கி இருந்துள்ளார். இந்நிலையில் குண்டு தாக்குதல் தொடர்பில் மேலும் தகவல்களை திரட்டும் நோக்கில் டஜஸ்தான் பிராந்தியத்திற்கு அமெரிக்க அதிகாரிகள் சென்று விசாரணைகளை நடத்தி வருகின்றனர். இதில் சந்தேக நபர்கள் கடும்போக்கு கொள்கைகளை பின்பற்றியதற்கான ஆதராங்கள் மற்றும் தொடர்புகளை திரட்ட அமெரிக்க அதிகாரிகள் முயற்சித்து வருகின்றனர்.

இதில் 19 வயதான சொகர் சர்னெவ் கடும்காயங்களுடன் மருத்துவமனையில் சிகிச்சை பெற்று வருகிறார். அவர் மீது அரச வழக்கறிஞர்கள் பேரழிவு ஏற்படுத்தும் ஆயுதங்களை பயன்படுத்தியது, உயிர்ச் சேதங்கள் மற்றும் சொத்துக்களுக்கு இழப்பை ஏற்படுத்தியதாக குற்றப்பத்திரம் தாக்கல் செய்யப்பட்டுள்ளது. இந்த குற்றச்சாட்டு நிரூபிக்கப்பட்டால் அவர் மீது மரண தண்டனை விதிக்க முடியும் என்பது குறிப்பிடத்தக்கது.

பொஸ்டன் மரதன் போட்டியின் போது இடம்பெற்ற இரட்டை குண்டு வெடிப்பில் மூன்று பேர் கொல்லப்பட்டதோடு 200க்கும் அதிகமானவர்கள் காயமடைந்தனர். சர்னெவ் சகோதரர்கள் ரஷ்யாவின் முஸ்லிம் பிராந்தியமான செச்னியாவை பூர்விகமாக கொண்டவர்களாவர். செச்சினியா பாரிய யுத்தத்தை எதிர்நோக்கிய பிராந்தியமாகும். எனினும் கடந்த ஒரு தசாப்தமாக சர்னெவ் சகோதரர்கள் அமெரிக்காவிலேயே வாழ்ந்து வந்தனர். இதில் தமர்லன் 2012 ஆம் ஆண்டு ரஷ்யா சென்று நீண்ட நாள் இருந்துள்ளார். இதன் போது அவர் டஜஸ்தான், செச்னிய எல்லையில் ஆறு மாதங்களை கழித்துள்ளார்.

ரஷ்யாவின் மற்றொரு முஸ்லிம் பிராந்தியமான டஜஸ்தானில் இஸ்லாமிய போராளிகளின் செயற்பாடு தீவிரமாக உள்ளது. எனினும் இந்த குண்டுத்தாக்குதல் சம்பவத்தில் தமது மகன்கள் அப்பாவிகள் என சர்னெவ் சகோதரர்களின் பெற்றோரான அன்சோர் மற்றும் சுபைதத் சர்னெவ் குறிப்பிட்டுள்ளனர். இது அமெரிக்க பாதுகாப்புப் படையினர் இட்டுக்கட்டியது எனவும் அவர்கள் குற்றம்சாட்டினர்.

இந்நிலையில் கடந்த செவ்வாய்க்கிழமை மொஸ்கோவிலிருக்கும் அமெரிக்க தூதரகத்திலிருந்து டஜஸ்தான் பிராந்தியத்திற்கு அமெரிக்க அதிகாரிகள் சென்றுள்ளனர். அங்கு அவர்கள் சர்னெவ் சகோதரர்களின் பெற்றோரை சந்தித்து விபரம் அறிந்துள்ளனர். எனினும் இந்த விசாரணையை எந்த அமெரிக்க அதிகாரிகள் நடத்தினார்கள் என்பது தெளிவில்லை என அங்கிருக்கும் பி.பி.சி. செய்தியாளர் குறிப்பிட்டுள்ளார்.

எனினும் ரஷ்யாவுக்கான அமெரிக்க தூதரக அதிகாரி ஒருவர் ஏ.எப்.பி. செய்திச் சேவைக்கு தகவல் அளிக்கும் போது, அமெரிக்க உளவுப் பிரிவான எப்.பி.ஐ. பொஸ்டன் குண்டு வெடிப்பு விவகாரத்தில் ரஷ்யாவின் உதவியை பெற்றுள்ளது என்றார். டஜஸ்தான் பிராந்தியத்தினூடாகவே சந்தேக நபர்கள் கடும்போக்கு சிந்தனையை பெற்றதாக கூறும் தகவலை தஜஸ்தான் பிராந்திய உள்துறை அமைச்சர் முற்றாக மறுத்துள்ளார். இது குற்றச்சாட்டை வேறு பக்கம் திசை திருப்பும் முயற்சி என உள்துறை அமைச்சர் அப்துரஷித் மகொவ்மடொவ் ரஷ்யாவின் இன்டர்பக்ஸ் செய்திச் சேவைக்கு கூறினார்.

மறுபுறத்தில் பொஸ்டன் குண்டு வெடிப்பு குறித்து அமெரிக்க பாதுகாப்புத் துறையினர் போதிய அவதானம் செலுத்தவில்லை என்பது தொடர்பில் விமர்சனத்திற்கு உள்ளாகியுள்ளது. கொல்லப்பட்ட தமர்லன் தீவிரவாத போக்குடையவர் என ரஷ்யா, அமெரிக்க உளவுப் பிரிவான எப்.பி.ஐ.யிற்கு ஏற்கனவே அச்சுறுத்தல் விடுத்த போதும் அது குறித்து எப்.பி.ஐ. பொடுபோக்காக இருந்ததாக குற்றச்சாட்டு எழுந்துள்ளது.

இது தொடர்பில் எப்.பி.ஐ. 2011 ஆம் ஆண்டில் தமர்லனிடம் விசாரணை நடத்திய போதும் அவர்களால் எந்த ஆதாரமும் பெற முடியவில்லை. இந்நிலையில் செனட் சபையின் உளவுக்குழு செவ்வாய்க்கிழமை மூடிய அறையில் நடத்திய ஆலோசனையில் அமெரிக்க உளவுப் பிரிவுகளுக்கு இடையிலான தகவல் பரிமாற்றம் மேம்படுத்தப்பட வேண்டும் என வலியுறுத்தப்பட்டுள்ளது.

இந்த கூட்டத்தில் பங்கேற்ற குடியரசு கட்சி செனட் உறுப்பினர் சுசான் கொலின்ஸ் ஏ.பி. செய்திச் சேவைக்கு கூறும் போது, “சிக்கலான விசாரணைகள் தொடர்பில் உளவுப் பிரிவுகளுக்கு இடையில் தகவல் பரிமாற்றம் இடம்பெறுவதில் சிக்கல் நிலவி வருகிறது. இது உளவு பிரிவுகளுக்கு மாத்திரம் அல்லாமல் ஒரே உளவுப்பிரிவைச் சேர்ந்தவர்களுக்கு இடையிலும் குழப்பம் உள்ளது” என்றார்.

இதனிடையே தொண்டை பகுதியில் துப்பாக்கிக் குண்டு பாய்ந்து பேச முடியாத நிலையில் சிகிச்சை பெற்று வரும் சொகர் எழுத்து மூலம் அளித்த வாக்குமூலத்தில் பொஸ்டன் தாக்குதலுக்கு ஜிஹாத் சிந்தனை அடிப்படையாக இருப்பதாக அதிகாரிகள் குறிப்பிட்டுள்ளனர். எனினும் இது ஆரம்பகட்ட விசாரணை என்றும் மேலும் உறுதிப்படுத்தப்பட வேண்டும் எனவும் அவர்கள் வலியுறுத்தியுள்ளனர்.