புலிகள் நிகழ்த்திக்காட்டிய சிறைப்படுகொலை

புலிகளின் தலைவர் பிரபாகரன் ஏக தலைவனாக முடிசூடிக் கொள்வதற்காக தனது எதேச்சாதிகாரத்திற்காக சக ஆயுதப் போராட்ட இயக்கங்கள் மீது தாக்குதல் தொடுத்து அவற்றின் செயற்பாட்டை தடுப்பதற்கு எடுத்த நடவடிக்கை தமிழர் போராட்டத்திற்கு பாதகம் மிக்கதொரு பாரிய திசை விலகலாக அமைந்தது. இந்த தாக்குதல்களை திட்டமிட்டு நடாத்திய புலிகளின் தலைமை மட்டுமல்ல புலிகளின் இந்த தாக்குதல் நடவடிக்கைகளுக்கு தூபம் போட்டவர்கள், நியாயப்படுத்தியவர்கள் அனைவருமே தமிழ் மக்களின் இன்றைய அவல நிலைக்கு காரணகர்த்தாக்கள் என்பதை மறக்கவோ, மறுக்கவோ முடியாது.

1986 ஆரம்பத்தில் ரெலோ இயக்கத்தின் மீது புலிகள் தாக்குதலை ஆரம்பித்தார்கள், அதே வருடம் இறுதிப்பகுதியில் புளொட் இயக்கம் செயற்படுவதற்கு தடை விதித்தார்கள் 1986 மார்கழியில் ஈ.பி.ஆர்.எல்.எவ் இயக்கத்தை தடைசெய்யும் தாக்குதலை தொடுத்தார்கள்.

ரெலோ, புளொட், ஈ.பி.ஆர்.எல்.எவ் ஆகிய இயக்கங்களின் செயற்பாட்டுக்கு தடைவிதித்து புலிகள் நடாத்திய தாக்குதல்களை தொடர்ந்து புலிகளால் கைது செய்யப்பட்டு தடுத்து வைக்கப்பட்ட இந்த இயக்கங்களை சேர்ந்த சுமார் 60 பேர் ஈவிரக்கமின்றி 1987 பங்குனி 30 ம் திகதி சுட்டு படுகொலை செய்யப்பட்டார்கள். இவர்களில் பொதுமக்கள் சிலரும் அடங்கியிருந்தனர். இந்த படுகொலை வெலிக்கடை சிறையில் தடுத்துவைக்கப்பட்டிருந்த தமிழ் கைதிகள் 53 பேர் 1983 இல் படுகொலை செய்யப்பட்டதையும் மிஞ்சிய கொடூரக் கொலையெனப் பேசப்பட்டது.

ஈ.பி.ஆர்.எல்.எவ் இயக்கத்தின் மீது தாக்குதல் நடத்தி மூன்று மாதங்களில் இந்த படுகொலை சம்பவம் இடம்பெற்றதால் இங்கு தடுத்து வைக்கப்பட்டவர்களில் அநேகமானவர்கள் ஈ.பி.ஆர்.எல்.எவ் இயக்கத்தை சேர்ந்தவர்களாயிருந்தார்கள். இவர்களில் புலிகளால் சிறைப்பிடிக்கப்பட்டவர்களும், புலிகளிடம் பெற்றோர்களால் ஒப்படைக்கப்பட்டவர்களும் அடங்கியிருந்தார்கள்.

புலிகளால் இந்தச் சம்பவத்தை மூடிமறைக்க முடியவில்லை. யாழ் நகரில் இந்துக்கல்லூரிக்குச் சமீபமாக குடியிருப்புக்கள் மத்தியிலிருந்த புலிகளின் சிறைக் கூடத்திலிருந்து மரண ஓலம் எழுந்ததையும், கொல்லப்பட்டவர்களின் குருதி வெள்ளமாக வாய்க்காலில் ஓடியதாகவும் அருகிலுள்ள குடியிருப்பாளர்கள் தெரிவித்தனர். தமது பிடியிலிருந்து தப்பியோட முயன்ற 18 பேரை சுட்டுக்கொன்றதாக புலிகள் மழுப்ப முயன்றனர். யாழ்ப்பாணத்திலிருந்து வெளிவந்துகொண்டிருந்த பத்திரிகை ஒன்று புலிகளின் இந்தப் புனைவுக்கு முக்கியத்துவமளித்திருந்தது.

புலிகளின் இந்த கொலை வெறித் தாக்குதலின்போது தப்பி வந்த ஈ.பி.ஆர்.எல்.எவ் உறுப்பினர்கள் மூலம் உண்மை வெளிச்சத்திற்கு வந்தது. புலிகளின் கொலைக்களத்திலிருந்து தப்பிவந்தவர்களில் இருவர் கிழக்கு மாகாணத்தைச் சேர்ந்தவர்கள். அவர்களில் ஒருவரான தோழர் தைரி தமது பிடியிலிருந்து தப்பிச்சென்ற ஒருவர் என்பதை அறியாமலே மாற்று இயக்கத்தவர்களை அழித்தொழிக்கும் புலிகளின் தொடர் நடவடிக்கையின் போது சுட்டுக்கொல்லப்பட்டார். மற்றொருவர் புலிகளின் கொலைக்கரங்களிலிருந்து சாதுரியமாகத் தப்பி இன்னும் உயிர் பிழைத்துள்ளார். அவர் கொலைக்களத்திலிருந்து தப்பிவந்து தஞ்சம் கோரிச் சென்ற மதகுரு ஒருவர் அடைக்கலம் வழங்க மறுத்து அவரை கோட்டை இராணுவ முகாமில் சரணடையுமாறு ஆலோசனை வழங்கினார்.

புலிகளின் ஆதிக்கம் எந்தளவுக்கு இருந்தது, எத்தகைய மோசமான நிலையில் மாற்று இயக்கங்களை சேர்ந்தவர்கள் தப்பிப் பிழைக்க வேண்டியிருந்தது என்பதற்கு இது சான்றாகும்.

ஆபத்தான நிலையிலிருந்தபோதும் இராணுவத்தினரிடம் சரணடையும் எண்ணம் புலிகளிடமிருந்து தப்பி வந்தவருக்கோ, அவரை மதகுருவிடம் அழைத்துச் சென்றவர்களுக்கோ இருக்கவில்லை. கீழ்நிலையிலிருந்த அதே மதத்தைச் சேர்ந்த மற்றொரு மதகுருவின் உதவியோடும் அவருக்கு ஏற்கனவே அறிமுகமான, அறிமுகம் இல்லாத பொது மக்கள் சிலர் துணிச்சலாக எடுத்த நடவடிக்கைகளாலுமே அவர் பாதுகாப்பாக தப்பிச் செல்ல முடிந்தது.

தமிழர் போராட்டத்தின் பின்னர் நடந்த பல துயர நிகழ்வுகளுக்கு புலிகள் சக இயக்கங்களின் செயற்பாட்டை தடுக்க முனைந்து மேற்கொண்ட தாக்குதல்களும், சமூகத்தின் போக்கும், இது போன்ற திட்டமிட்ட படுகொலைகளுமே அடிப்படை, மூலகாரணம் என்பதை மறந்துவிட்டே அரசியல் ஆய்வாளர்கள். அரசியல் விமர்சகர்கள் என்ற போர்வையில் பலர் கருத்துக்களைத்; தெரிவித்து வருகின்றனர்.

எனவே தான் முள்ளிவாய்க்காலில் 2009 இல் பிரபாகரன் கொல்லப்பட்ட பின்னரும், இச்சம்பவம் நடந்து சுமார் 29 வருடங்கள் கடந்த பின்னரும் இந்தச் சம்பவம் குறித்து பேச வேண்டியுள்ளது.

இந்த நாளில் இந்த சம்பவத்தில் கொல்லப்பட்ட தோழர்களையும், சக இயக்கங்களின் போராளிகளையும், பொதுமக்களையும் நினைவு கூரும் அதேவேளை தமிழ் மக்களின் போராட்டம் சீரழிந்து, சின்னாபின்னமானதற்கான காரணங்களை தெரிந்துகொள்வதும் அதற்கு மூல காரணமானவர்கள் யார் என்பதை அறிந்துகொள்வதும் தமிழ் சமூகத்தினதும், இந்த நாட்டு மக்கள் அனைவரதும் எதிர்கால நல்வாழ்விற்காக செயற்படுபவர்களுக்கு பாடமாக அமைய வேண்டும்.

அமைதி சமாதானம் ஜனநாயகம்

www.sooddram.com