பரந்தளவிலான கருத்தொருமைப்பாட்டுக்கு தமிழ்த்தேசிய கூட்டமைப்புடன் கலந்துரையாடல்

பரந்தளவிலான கருத்தொருமைப்பாட்டை அடைவதற்கு தமிழ் தேசிய கூட்டமைப்புடன் கலந்துரையாடலை நடத்துவது எனத் தீர்மானிக்கப்பட்டது. இனப் பிரச்சினை தீர்வு தொடர்பாக தமிழ் அரசியல் கட்சிகளிடையே பொதுவான இணக்கப்பாட்டை ஏற்படுத்தும் பொருட்டு நடைபெற்ற சந்திப்புக்கள் குரோதங்களையும் மனக்கிலேசங்களையும் விட்டு திறந்த மனதுடன் செயற்படுவதற்கும் வழி சமைத்திருப்பதாக பத்மநாபா ஈழ மக்கள் புரட்சிகர விடுதலை முன்னணியின் பொதுச் செயலாளர் தி. ஸ்ரீதரன் தினகரன் வார மஞ்சரிக்கு தெரிவித்தார்.

னப் பிரச்சினைத் தீர்வு தொடர்பில் தமிழ் அரசியல் கட்சிகளிடையே கருத்தொருமைப்பாட்டிற்கான கலந்துரையாடல் நான்காவது தடவையாக கடந்த 28 ஆம் திகதியன்று தமிழீழ மக்கள் விடுதலை கழக கொழும்பு காரியாலயத்தில் நடைபெற்றது. இது தொடர்பாக அவரிடம் தொடர்பு கொண்டு கேட்டபோதே இவ்வாறு தெரிவித்தார். கடந்த கூட்டங்களில் கலந்துரையாடப்பட்ட விடயங்களை முன்னெடுப்பது மற்றும் பரந்தளவிலான ஐக்கியத்தை கட்டியெழுப்புவது பற்றி விவாதிக்கப்பட்டது. ஜுலை 07 ஆம் திகதி நடைபெற்ற கூட்டத்தில் எடுக்கப்பட்ட தீர்மானங்கள் கலந்து கொண்ட கட்சிகளின் தலைவர்கள், பிரதிநிதிகளுக்கு வழங்கப்பட்டது.

தமிழ் மக்களின் பிரச்சினைகளுக்கு தீர்வு காண்பதில் தமிழ் கட்சிகளிடையே ஒருமித்த நிலைப்பாட்டை எட்டுதல், அரசியல் அபிலாஷைகளை வென்றெடுத்தல், மற்றும் மலையக மக்கள் உட்பட தமிழ் பேசும் மக்களின் நீதியான அரசியல் அபிலாஷைகளை வென்றெடுத்தல், இந்த அபிலாஷைகளை எய்துவதற்கு தென்னிலங்கையில் உள்ள முற்போக்கு சக்திகள் மற்றும் சமூக அமைப்புக்களின் ஆதரவையும், ஒத்துழைப்பையும் பெற்றுக் கொள்ளல். இந்த நோக்கங்களை அடைவதற்கு இலங்கையிலும், வெளிநாடுகளிலும் வாழும் தமிழ் பேசும் மக்கள் மத்தியில் செயற்படும் அமைப்புக்களிடமிருந்து ஆலோசனைகளையும், பங்களிப்பையும் பெற்றுக் கொள்ளுதல்.

ஒற்றுமையான அரசியல் செயல் திட்டத்தினை உருவாக்கி நடைமுறைப்படுத்தல் ஆகிய விடயங்கள் குறித்து கலந்துரையாடப்பட்டது.

கடந்த 28 ஆம் திகதி நடைபெற்ற கூட்டத்தில் நீண்டகாலமாக நிலவும் இனப்பிரச்சினைக்கு தீர்வு காண்பதற்கும், உடனடி பிரச்சினைகளில் உதவுவதற்கும் பரந்தளவிலான கருத்தொருமைப்பாட்டை அடைவதற்கு தமிழ் தேசிய கூட்டமைப்புடன் கலந்துரையாடலை நடத்துவது எனவும் தமிழ் கட்சிகளின் அரங்கம் சார்பில் அதில் பங்குபற்றும் அனைத்து கட்சியினரும் கையெழுத்திட்டு தமிழ் தேசிய கூட்டமைப்பிற்கு கடிதம் மூலம் அதற்கான வேண்டுகோள் விடுப்பதெனவும் தீர்மானிக்கப்பட்டது. இந்த தொடர் சந்திப்புக்கள் சுமுகமான சூழலில் நடைபெற்றது. பரஸ்பரம் நட்புறவு நிலவியது.

இத்தகைய முயற்சியானது சமகாலத்தில் மிக முக்கியத்துவம் வாய்ந்ததாகும். அனுபவங்களின் அடிப்படையில் யதார்த்தமாக குரோதங்கள் மனக்கிலேசங்களை விட்டு திறந்த மனதுடன் செயற்படுவதற்கும் வழி சமைத்திருக்கிறது என்றார் சிறீதரன்.

இக் கூட்டத்தில் தமிழர் விடுதலைக் கூட்டணியின் தலைவர் வீ. ஆனந்தசங்கரி, ஈழ மக்கள் ஜனநாயக கட்சியின் செயலாளர் நாயகமும், அமைச்சருமான டக்ளஸ் தேவானந்தா, ராஜ்குமார், ஜெயக்குமார், தமிழீழ மக்கள் விடுதலைக் கழகத்தின் தலைவர் த. சித்தார்த்தன், ராகவன், தமிழீ ழ மக்கள் விடுதலைப் புலிகளின் தலைவரும், கிழக்கு மாகாண முதலமைச்சருமான சந்திரகாந்தன், அசாத் மெளலானா, ஈழ ஏதிலியர் மறுவாழ்வு கழகத்தின் தலைவர் சந்திரஹாசன், பேரின்பநாயகம், தமிழ் தேசிய விடுதலை கூட்டமைப்பின் செயலாளர் சிவாஜிலிங்கம், ஜனநாயக மக்கள் முன்னணியின் செயலாளரும் மேல் மாகாண சபை உறுப்பினருமான குமரகுருபரன், பத்மநாபா ஈழ மக்கள் புரட்சிகர விடுதலை முன்னணியின் பொதுச் செயலாளர் தி. ஸ்ரீதரன், சிறீ  தமிழீழ விடுதலை இயக்கத்தின் தலைவர் உதயராசா, சுதேந்திரன் ஆகியோர் பங்குபற்றியிருந்தமை குறிப்பிடத்தக்கது.