அரசுடன்

நேற்று இணைந்த இருவருடன் மேலும் மூவர் விரைவில் சேர்வர்

அதிகாரத்தில் தொடர்ந்தும் இருப்பதற்கு இடமளிக்கும் வகையில் அரசியலமைப்பை மாற்றியமைத்து திருத்தங்களை பாராளுமன்றத்தில் நிறைவேற்றுவதற்கான பலத்தை பெற்றுக்கொள்ளும் விடயத்தில் ஜனாதிபதி மகிந்த ராஜபக்ஷ நெருங்கி வந்துள்ளார். நேற்று வியாழக்கிழமை பிரதான எதிர்க்கட்சியான ஐ.தே.க.வில் போட்டியிட்டுத் தெரிவு செய்யப்பட்ட ஜனநாயக மக்கள் முன்னணியைச் சேர்ந்த பிரபா கணேசனும் தேசிய தொழிலாளர் கட்சியைச் சேர்ந்த திகாம்பரமும் அரசாங்கத்தில் இணைந்து கொண்டதையடுத்து உத்தேச அரசியலமைப்புத் திருத்தத்துக்கான பலம் அதிகரித்திருக்கிறது.

அரசியலமைப்பில் திருத்தங்களை மேற்கொள்வதாயின் பாராளுமன்றத்தில் மூன்றில் இரண்டு பெரும்பான்மை ஆசனங்கள் தேவைப்படுகின்றன. தற்போது பாராளுமன்றத்தில் ஆளும் ஐக்கிய மக்கள் சுதந்திர முன்னணிக்கு 146 ஆசனங்கள்உள்ளன. நேற்றுடன் ஆளுங்கட்சியின் பலம் 148 ஆக அதிகரித்துள்ளது. அரசியலமைப்பில் திருத்தங்களை மேற்கொள்ள 225 எம்.பி.க்கள் கொண்ட சபையில் 151 உறுப்பினர்களின் ஆதரவு தேவையாகும். ஏற்கனவே உத்தியோகப்பற்றற்ற முறையில் மூன்று எதிரணி உறுப்பினர்கள் அரசாங்கத்துக்கு ஆதரவளித்து வருகின்றனர். அவர்கள் விரைவில் அரசுடன் உத்தியோகபூர்வமாக இணைந்துகொள்வார்களென எதிர்பார்க்கப்படுகிறது.

கடந்த ஜனவரியில் இரண்டாவது பதவிக் காலத்துக்குத் தெரிவு செய்யப்பட்டுள்ள ஜனாதிபதி மகிந்த ராஜபக்ஷவின் ஐக்கிய மக்கள் சுதந்திர முன்னணி கடந்த ஏப்ரலில் இடம்பெற்ற தேர்தலில் 146 ஆசனங்களை வென்றெடுத்திருந்தது. ஜனாதிபதியின் பதவிக்காலத்தை இரு தடவைகளுக்கு மேல் நீடிப்பதாயின் அதாவது பதவியிலிருக்கும் ஜனாதிபதி இருதடவைகளுக்கு மேல் தேர்தலில் போட்டியிட முடியாதென்ற அரசியலமைப்பு ஏற்பாட்டை மாற்றுவதாயின் மூன்றில் இரண்டு பெரும்பான்மை பலம் தேவைப்படுகிறது. இப்போது அதனை இலகுவாக நிறைவேற்றுவதற்கான பெரும்பான்மை பலத்தை ஆளும் ஐக்கிய மக்கள் சுதந்திர முன்னணி அண்மித்துள்ளது.

இதேவேளை, சிறுபான்மைத் தமிழ் மக்களுடன் அதிகாரங்களைப் பகிர்ந்துகொள்ளும் அரசியல் மறுசீரமைப்பை முன்னெடுக்குமாறு அமெரிக்கா,ஜப்பான் உட்பட இலங்கைக்கு உதவி வழங்கும் முக்கியமான நாடுகள் வலியுறுத்தி வருகின்றன. இனப் பிரச்சனைக்கான அரசியல் தீர்வைக் காண்பதற்கு இந்த மூன்றில் இரண்டு பெரும்பான்மையை இலங்கை அரசாங்கம் ஆர்வத்துடன் பயன்படுத்துமா என்பதை பொறுத்திருந்துதான் பார்க்க வேண்டும்.