நல்லிணக்கத்துக்குத் தடையான விடயங்களை கண்டறிவதில் கவனம் செலுத்துவது அவசியம் புலிகளிடம் அடிமைத்தனமாகச் செயற்பட்டார் ரணில், ஆணைக்குழு முன்பாக ரஜீவ

நல்லிணக்கத்தினை ஏற்படுத்துவதற்கான திட்டங்கள், அமைதியை நிலைநாட்டுவதற்குரிய அடுத்த தெரிவு மற்றும் நல்லிணக்கத்திற்கு தடையாக உள்ள விடயங்களையே கற்றறிந்த பாடங்கள் மற்றும் நல்லிணக்க ஆணைக்குழு கவனத்தில் கொள்ளவேண்டுமென பாராளுமன்ற உறுப்பினர் பேராசிரியர் ரஜீவ விஜேசிங்க தெரிவித்தார்.

கற்றறிந்த பாடங்கள் மற்றும் நல்லிணக்க ஆணைக்குழுவின் விசாரணைகள் லக்ஷ்மன் கதிர்காமர் சர்வதேச தொடர்புகள் மற்றும் இராஜதந்திர உறவுகள் நிலையத்தில் நடைபெற்றபோது கருத்துத் தெரிவிக்கையிலேயே பேராசிரியர் ரஜீவ விஜேசிங்க இவ்வாறு தெரிவித்தார்.

அங்கு அவர் தொடர்ந்து தெரிவிக்கையில்; கற்றறிந்த பாடங்கள் மற்றும் நல்லிணக்க ஆணைக்குழுவின் பணி, நல்லிணக்கத்தை ஏற்படுத்துவதற்கு செய்யப்பட வேண்டிய முக்கிய பணிகள் குறித்த நிர்ணயம், அமைதி முயற்சி தோல்வி அடைந்தமைக்கு காரணமானவையும் அமைதியை ஏற்படுத்துவதற்குரிய அடுத்த தெரிவு மற்றும் நல்லிணக்கத்துக்கு தடையாக உள்ள காரணிகளை கண்டறிதல் ஆகிய மூன்று விடயங்களில் கவனம் செலுத்த வேண்டும்.

இதில் நல்லிணக்கத்தினை எட்டப்படுவதற்கான காரணிகளை கண்டறிவது மிகவும் முக்கியமானது. நாட்டின் அபிவிருத்தியானது சமாந்தரமற்ற நிலையில் இருந்தமையே பகைமையுணர்வுக்கும் பிரிவினைக்குமான முக்கிய காரணி ஆகும். முதலீட்டினை இலக்காகக் கொண்டு உட்கட்டமைப்பில் ஏற்பட்டுள்ள அபிவிருத்தியானது சகலருக்கும் சமவாய்ப்பினை பெற்றுத்தருவதற்கு அரசு மேற்கொண்டுள்ள முயற்சிகளை உறுதிப்படுத்தியுள்ளது.

அதேவேளை, மனிதவளங்களின் அபிவிருத்தியும் இதற்கு சமாந்தரமாகச் செல்வதை உறுதிப்படுத்தவேண்டும். அத்துடன் சமத்துவ அடிப்படையில் மக்கள் மத்தியிலான ஒருமைப்பாட்டினையும் நாம் உறுதிப்படுத்தவேண்டிய தேவை உள்ளது. இதற்காக ஆங்கில மொழி பாடசாலைகள் நாடளாவிய ரீதியில் ஆரம்பிக்கப்படல், கண்டு பிடிப்பாளர்கள் ஊக்குவிக்கப்படல், கலாசார நிலையங்கள் அமைத்தல், அரச திணைக்களங்களுக்குப் படைத்தரப்பிற்கும் சிறுபான்மையினத்தவரை இணைத்துக் கொள்வது அதிகரிக்கப்படல், அரச அதிகாரிக்கு பிற மொழிப்பயிற்சி, பாதிக்கப்பட்டவர்களை பராமரிக்கும் முறைசாரா திட்ட அபிவிருத்தி ஆகிய விடயங்கள் கவனத்தில் கொள்ளப்படவேண்டும். இவ்வாறாக நல்லிணக்கத்தினை ஏற்படுத்துவதற்குரிய நடவடிக்கைகள் முன்னெடுக்கும் போது கடந்தகால விடயங்கள் அசட்டை செய்யப்பட்டு வரும். இவற்றினை விடுதலைப்புலிகளின் எஞ்சியுள்ள ஆதரவாளர்களும் இலகுவில் விளங்கிக் கொள்வர்.

இதேவேளை சமாதான முயற்சிகளின் தோல்விக்குரிய காரணங்கள் பற்றி நோக்கினால், உண்மையில யார் பாதிக்கப்பட்டவர்கள், கவனம் செலுத்தப்படவேண்டியவர்கள் என்பதிலும் பாதிக்கப்பட்டமைக்கு பரிகாரம் மேற்கொள்வதற்காக பயங்கரவாதத்திற்கு யார் சென்றவர்கள் என்பதிலும் உள்ள சந்தேகமே சமாதான முயற்சியின் தோல்விக்கு முக்கிய காரணியாக அமைந்தது. 1987 ஆம் ஆண்டில் நடைபெற்ற சம்பவங்களின் பாதிப்புகளுக்குரிய நிறுவப்பட்ட காரணங்கள் அரசினால் ஒழிக்கப்பட்டுவிட்டது. ஆனால் நாடளாவிய ரீதியில் சமத்துவ உணர்வை மீள் நிறுத்துவதற்கு இன்னும் பல செயற்பாட்டு ரீதியான பணிகள் நிறைவேற்றப்பட வேண்டியுள்ளது.

அதேவேளை முன்னாள் பிரதமர் ரணில் விக்கிரமசிங்க விடுதலைப் புலிகளிடம் அடிமைத்தனமாக செயற்பட்டமையும் சமாதான முயற்சிகளின் தோல்விக்கு காரணி ஆகும். அதேவேளை சமாதான உடன்படிக்கையின் சில சரத்துகள் விடுதலைப்புலிகளை எதிர்க்கும் தமிழர்களை காட்டிக் கொடுப்பதாகவும் அமைந்தது. அதேவேளை, நல்லிணக்கத்தை ஏற்படுத்துவதற்குரிய தடைகள் குறித்து நோக்கினால், இப்பகுதி பரவலாக அக்கறை செலுத்தப்படவேண்டிய பகுதி ஆகும். சில இடங்களில் சட்டநடவடிக்கைகள் உரிய விதத்தில் மேற்கொள்ளப்படவில்லை. திருகோணமலையில் 5 இளைஞர்கள் படுகொலை செய்யப்பட்டமை குறித்து குற்றச்சாட்டுகள் அறிவிக்கப்பட்டிருக்க வேண்டும். ஆனால் அவ்வாறு அறிவிக்கப்படவில்லை.

அதேவேளை குறித்த ஒரு காலப்பகுதியில் கிழக்கில் தேர்தல்களை நடத்தவேண்டாமென ஐரோப்பிய ஒன்றியம் அரசை எச்சரித்துள்ளது. அத்துடன், சமாதான செயலகமானது விடுதலைப்புலிகளுக்கு நிதி வழங்கியிருந்ததுடன் ரணிலின் செயற்பாடுகள் புலிகளுக்கு நன்மை பயப்பதாகவும் அமைந்தன. ஆனால், புலிகளுக்கு நிதி வழங்கிய பின்னர் அந்நிதி மூலம் விடுதலைப் புலிகள் எவ்வாறான நடவடிக்கைகளை மேற்கொள்கின்றனரென்பதனை அப்போதைய அரசு கண்காணிக்கவில்லை. இவ்வாறாக ரணில் அரசினால் மேற்கொள்ளப்பட்ட பல தவறுகள் சமாதான உடன்படிக்கையின் தோல்விக்கு முக்கிய காரணமாக அமைந்த எனத் தெரிவித்தார்.