பிரதேச செயலகங்களையும் உள்ளுராட்சி சபைகளையும் உருவாக்க தமிழ் அமைச்சர்கள் நடவடிக்கை எடுக்கவேண்டும் - இரா.துரைரெட்ணம்(பத்மநாபா ஈ.பி.ஆர்.எல்.எப்).

மட்டக்களப்பு மாவட்டத்தில் உள்ள கிரான் பிரதேச செயலகத்திற்கு உட்பட்ட பகுதிகளுக்கு உள்ளுராட்சி சபையை உருவாக்குதல் தொடர்பாகவும், அம்பாறை மாவட்டத்தில் உள்ள கல்முனை தமிழ் பிரிவு உப பிரதேச செயலகத்தை முழு அதிகாரமுள்ள பிரதேச செயலகமாகவும் அதற்கான உள்ளுராட்சி சபையையும் உருவாக்குதல் தொடர்பாகவும் பல காலமாக பல முயற்சிகள் மேற்கொண்டும் பயனளிக்கவில்லை. இவ்வாறான நிலையில் அரசுடன் சேர்ந்த தமிழ் அமைச்சர்கள் அபிவிருத்தியோடு எமது உரிமையையும் கருத்தில் கொண்டு செயல்படவேண்டும் என பிரதேச செயலகங்களையும் உள்ளுராட்சி சபைகளையும் உருவாக்க தமிழ் அமைச்சர்கள் நடவடிக்கை எடுக்கவேண்டும் என்ற தலைப்பில் மீள் குடியெற்ற பிரதி அமைச்சருக்கு கிழக்கு மாகாண சபை உறுப்பினர் இரா.துரைரெட்ணம் அனுப்பிவைத்துள்ள கடிதத்தில் தெரிவித்துள்ளார்.

அவர் அனுப்பி வைத்துள்ள அக் கடிதத்தில் நீண்ட காலமாக பாரம்பரிய தமிழர் பகுதி திட்டமிட்டு அபகரிக்கப்படுவதனையும் தமிழர் வணக்கத்தலங்கள் திட்டமிட்டு அழிக்கப்படுவந்துள்ளமையையும் சுட்டிக்காட்டியுள்ளார்.அக் கடிதத்தில் தெரிவித்துள்ளதாவது,

1989 ஆம் ஆண்டு கல்முனை தமிழ் உப பிரதேச செயலகம் உருவாக்கப்பட்டு 23 வருடங்களாக காணி ,நிதி மற்றும் ஏனைய அதிகாரங்கள் வழங்கப்படாமல் இன்று வரைசெயல்படுகின்றது.

3-12-2005ஆம் ஆண்டு கிரான் பிரதேச செயலகப்பிரிவிற்கு (கோரளைபற்று தெற்கு) தனியான பிரதேசசபை உருவாக்குவதற்கு மாகாண உள்ளுராட்சி அமைச்சு பிரதேசசெயலாளர் தலைமையில் குழு நியமிக்கப்பட்டும் இன்று வரையும் அது உருவாக்கப்படவில்லை.

30 வருடங்களுக்கு மேலாக தமிழ் பிரதேசங்களில் இயங்கிய மத்தியஅரசு, மாகாணசபைகளினது நிர்வாகம், அபிவிருத்தி, உள்ளுராட்சி போன்ற செயல்பாடுகளில் அக்கறை இல்லாதவர்களாகவும் (அக்கறை இருந்தாலும் கூட) தமிழ் மக்களுக்கு அவசியமானதாக உணரப்பட்ட புதிய பிரதேச செயலகங்களையும், உள்ளுராட்சி சபைகளையும் உருவாக்கக் கூடிய அரசியல்பலம் அற்றவர்களாகவும் தமிழ் அரசியல் தலைவர்கள் காணப்பட்டனர்.

இந்நிலைமைகளை மத்திய அரசும் அதன் அடிவருடிகளும் சாதகமாகப்பயன்படுத்தி தமிழர்களின் பாரம்பரிய பிரதேசங்களை சூழச்சியானமுறையில் அபகரித்துக்கொண்டனர்.

புனிதத்தலங்கள் அழிப்பு கல்முனைகுடி பிரதானவீதியில் (முன்னாள் எம்-பி சம்சுதீன் அவர்களின் வீட்டிற்கருகில்) இருந்த பறையர் கோயில் என்று அழைக்கப்படும் இந்துக்களின் வழிபாட்டுத்தலம், கல்முனைகுடி சாய்ந்தமருது சாகிறா கல்லூரிக்கு போகும் சந்தியில் இருந்த பெரியபிள்ளையார் கோயில் ,மீனோடை கட்டுக் கோயில், ஓட்டமாவடி பொதுசந்தை உள்ள இடத்தில் இருந்த பிள்ளையார் கோயில்,என்பன இருந்தஇடமும் இல்லாமல் ஆக்கப்பட்டுள்ளன.

தொடர்சியான நிலப்பிரதேசம் பறிக்கப்பட்டது

மட்டக்களப்பு மாவட்டத்தில் உள்ள ஒட்டமாவடி பாலத்திலிருந்து கொழும்பு நோக்கி செல்லும் வீதியில் இருமருங்கிலும் இருந்த தியாவெட்டுவான், மைலங்கரச்சி, நாவலடிசந்தி ஆகிய தொடற்சியான பாரம்பரிய தமிழ் கிராமங்கள் கபளீகரம் செய்யப்பட்டுள்ளன.

அம்பாறை மாவட்டத்தில் மீனோடைகட்டு மடத்தடி ஒலிவில் அட்டப்பள்ளம் திராய்மடு, ஆகிய தமிழர்கள் இருந்த கிராமங்களில் குறிப்பிடத்தக்க அளவு நிலப்பிரதேசங்கள் இல்லாமல் போகும் நிலை ஏற்பட்டுள்ளது.

ஒரு சமுகத்திற்கு காணி இல்லாத பட்சத்தில் அதை மத்திய அரசிடம் இருந்து பெற்றுக்கொள்வது முறைமையும் அவர்களின் உரிமையும் ஆகும் அதைவிடுத்து இன்னோர் இனத்தின் பாரம்பரிய வாழ்விடங்களை அபகரிப்பது அடாத்தான செயலாகும்.

ஆகவே தமிழர் அல்லாத பகுதிகளுக்கு அதிகமான அரச வளங்களையும் அரசியல் செல்வாக்கையும் பயன்படுத்தி இனங்களை பாதிக்கும் வகையில் செயல்படுவதை தடுப்பதற்கும் பிரதேச நிர்வாகங்களை அதிகாரம் உள்ளவையாக மாற்றி ஏனைய இனங்கள் பாதிக்கப்படாமல் நிர்வகிப்பதற்கும் புதிய பிரதேச செயலகங்களையும் உள்ளுராட்சி சபைகளையும் உருவாக்குவதற்கும் அரசுடன் சேர்ந்த மாகாண முதலமைச்சர் தொடக்கம் மத்திய பிரதி அமைச்சர்கள் வரையும் எதிர்கட்சி;,ஆளும் கட்சி என்ற பேதம் இல்லாமல் விரைவாக நடவடிக்கை எடுக்க முன்வருதல் வேண்டும்.

இதேவேளை அரசுடன் சேர்ந்த தமிழ் அமைச்சர்கள் அபிவிருத்தியோடு எமது உரிமையையும் கருத்தில் கொண்டு செயல்படவேண்டும் எனவும் தெரிவித்துள்ளார்..