அமைச்சர்கள் வாசு, திஸ்ஸ, டியு ஆகியோருக்கும் தமிழ் தலைவர்களுக்குமிடையில் சந்திப்பு

இலங்கை அரசாங்கத்தில் சிரேஸ்ட அமைச்சர்களாக இருக்கும் இடதுசாரிக் கட்சிகளின் தலைவர்களான தோழர் டியு குணசேகர (கம்யூனிஸ்ட் கட்சி) பேராசிரியர் திஸ்ஸ விதாரண (சமசமாஜ கட்சி) மற்றும் தோழர் வாசுதேவ நாணயக்கார (நவசமசமாஜ கட்சி) ஆகியோர் தமிழர் ஐக்கிய விடுதலை முன்னணியின் தலைவர் திரு. ஆனந்தசங்கரி, முன்னாள் வடக்கு கிழக்கு மாகாண முதலமைச்சர் திரு வரதராஜப்பெருமாள் மற்றும் தமிழீழ மக்கள் விடுதலை கழகத் தலைவர் திரு. சித்தார்த்தன் ஆகியோருடன் ஒரு கலந்துரையாடல் சந்திப்பை மேற்கொண்டனர். இந்தச் சந்திப்பு 7.8.2011 ஆம் திகதி ஞாயிற்றுக்கிழமை அன்று அமைச்சர் பேராசிரியர் திஸ்ஸ விதாரண அவர்கள் இல்லத்தில் நடைபெற்றது. இக்கலந்துரையாடல் சுமார் இரண்டரை மணித்தியாலங்கள் இடம்பெற்றது.

இச்சந்திப்பானது பிரதானமாக நாளை அதாவது 8.8.2011ம் திகதி திங்கட்கிழமை அன்று ஜனாதிபதியின் பிரேரணையின் பேரில் உருவாக்கப்படவுள்ள பாராளுமன்ற தெரிவுக்குழு தொடர்பாக பாராளுமன்றத்தில் அங்கம் வகிக்கும் கட்சிகளின் தலைவர்களுக்கிடையில் இடம்பெறவுள்ள கூட்டம் தொடர்பாக கலந்துரையாடுவதையேநோக்கமாக கொண்டிருந்தது. இந்த விடயத்தில் குறிப்பிட்ட மூன்று அமைச்சர்களும் எடுக்கவுள்ள எடுக்கவேண்டிய நிலைப்பாடுகள் தொடர்பாக இச்சந்திப்பின்போது கலந்துரையாடப்பட்டது.

இக்கலந்துரையாடலின்படி, பாராளுமன்றத் தெரிவுக்குழுவானது திட்டவட்டமாக ஆறு மாத காலத்துக்குள்ளாகவோ அல்லது குறிப்பாக குறித்துரைக்கப்பட்ட சில மாதங்களுக்குள்ளாகவோ ஓர் அரசியல் தீர்வுக்கான திட்டத்தை ஜனாதிபதிக்கு பாராளுமன்ற சபாநாயகர் ஊடாக சமர்ப்பிக்கும் வகையில் பரிந்துரைக்க வேண்டும் எனவும் அத்துடன் பாராளுமன்ற தெரிவுக்குழுவில் மேற்கொள்ளப்படுகின்ற கலந்துரையாடல்கள் புதிய பிரேரணைகள் புதிய கருத்துக்கள் திரட்டல் என்பவையாக அல்லாமல் ஏற்கனவே பல்வேறு கட்சிகளுக்கிடையிலும் நடைபெற்ற பேச்சுவார்த்தைகளின் ஊடாக அடையப்பட்ட ஒரு தீர்வுத் திட்ட பிரேரணையை அடிப்படையாகக் கொண்டே செயற்பட வேண்டும் என்ற பொதுக்கருத்தே இக்கூட்டத்தில் இடம்பெற்ற கலந்துரையாடலில் நிலவியது.

இன்றைய சந்திப்பின்போது பின்வரும் சில விடயங்களும் பிரதானமானவையாக கருத்தில் கொள்ளப்பட்டன.

1. சர்வதேச சமூகங்களின் மத்தியில் இலங்கை அரசாங்கம் தொடர்பாக தொடர்ச்சியாக அதிகரித்துவரும் அழுத்தங்கள் இலங்கை அரசுக்கு ஒரு பெரும் அரசியல் ராஜதந்திர நெருக்கடியை ஏற்படுத்தவுள்ளன என்பதை இக்கூட்டம் அடையாளம் கண்டது.

2. இந்திய இலங்கையின் உறவில் ஏற்பட்டு வரும் எதிரும் புதிருமான மாற்றங்கள் இந்தியாவின் அழுத்தங்களை இலங்கை அரசு குறித்து விரிவடைந்து வரும் ஒரு விடயமாக அடையாளம் காணப்பட்டது. இந்தியா என்னும் அரசியல் காரணி இலங்கையின் அரசியலில் பெரும் மாற்றங்களை ஏற்படுத்தக் கூடியது என்பதையும் இக்கூட்டம் அடையாளம் கண்டுகொண்டது.

3. கடந்த உள்ளுராட்சித் தேர்தல் முடிவுகள் இலங்கையின் இனங்களுக்கிடையிலான உறவு நிலையில் ஓர் எதிர் நிலையான துருவப் போக்கு அதிகரித்திருப்பதையே காட்டுகிறது. அந்த ஆபத்திலிருந்து மாற்றங்களைக் கொண்டு வருவதற்கு அவசியமான ஓரு முற்போக்கான இணக்க சக்திகளின் மையம் இங்கு செயற்படவேண்டியது மிகவும் அவசியம் என்பதையும் இந்தக் கலந்துரையாடல் புரிந்து கொண்டதோடு இங்கு பங்கு பற்றிய கட்சிகள் அதற்கான பங்குகளை எவ்வாறு செயற்படுத்தலாம் என்பதுவும் கலந்துரையாடப்பட்டது.

4. இலங்கையின் இனப்பிரச்சனைத் தீர்வுக்கு நியாயமான அளவில் அதிகாரப் பகிர்வு கொண்ட மாகாண சபைகளின் செயற்பாடு அவசியமாகும். அரசாங்கத்திலும் மற்றும் எதிர்க்கட்சிகளின் மத்தியிலும் அதிகாரப் பகிர்வுக்கு சாதகமாக உள்ளவர்கள் பலர் உள்ளனர். இவர்களை ஓர்அணி திரட்ட வேண்டும் என்பதும் அத்தோடு அதிகாரப் பகிர்வு தொடர்பாக சிங்கள தமிழ் மக்கள் மத்தியில் காத்திரமான பிரச்சாரங்களை முற்போக்கு சக்திகள் மேற்கொள்ள வேண்டும் என்றும் இக்கூட்டத்தில் அடையாளம் காணப்பட்டது.

மேலும் இங்கு பங்கு பற்றிய மூன்று இடதுசாரிக் கட்சிகளின் தலைவர்களும் இன்றைய அரசாங்கத்தில் அமைச்சர்களாக இருந்த போதிலும் அவர்கள் சுயாதீனமான முறையிலும் தத்தமது கட்சிகளின் சுதந்திரமான அரசியல் நிலைப்பாடுகளின் அடிப்படையிலும் மக்கள் மத்தியில் தமது அரசியல் மற்றும் ஸ்தாபன வேலைப்பாடுகளை மக்களுக்கு வெளிப்படுத்துவதோடு சிங்கள தமிழ் மக்கள் மத்தியில் உள்ள இடதுசாரி மற்றும் முற்போக்கு சக்திகளை ஒருங்கிணைத்து ஒரு முற்போக்கு ஜனநாயக அரசியலை முன்னெடுப்பதற்கான வேலைத்திட்டங்களை மேற்கொள்வது பற்றியும் இங்கு கலந்துரையாடப்பட்டது. அத்துடன் இன்றைய கூட்டத்தைப்போல தொடர்ந்தும் கூட்டங்களை தொடர்வது என முடிவு செய்யப்பட்டது.