அவசரகால சட்டத்தை முழுமையாக நீக்க அரசாங்கம் முடிவு

தற்போது அமுலிலுள்ள அவசரகாலச்சட்டத்தை முழுமையாக நீக்குவதற்கு அரசாங்கம் நடவடிக்கை எடுத்துவருவதுடன் மிகவிரைவில் இதற்கான பிரேரணையை பாராளுமன்றத்தில் சமர்ப்பிக்கவுள்ளதாக பிரதமர் டி. எம். ஜயரட்ண நேற்று பாராளுமன்றத்தில் தெரிவித்தார். அவசரகாலச் சட்டத்தை நீக்குவது தொடர்பாக பாதுகாப்பு சபையின் ஆலோசனை பெறப்பட்டுள்ளது. இதற்கமைய இதற்கான பிரேரணையை பாராளுமன்றத்தில் சமர்ப்பிப்பதற்கான நடவடிக்கைகளையும் அரசாங்கம் எடுத்து வருகிறது என்றும் பிரதமர் கூறினார். நேற்று பகல் ஒரு மணிக்கு சபாநாயகர் சமல் ராஜபக்ஷ தலைமையில் பாராளுமன்றம் கூடியது. வழமையான சபை நடவடிக் கைகளின் பின்னர் பிரதமர் டி. எம். ஜயரட்ண அவசரகாலச் சட்டத்தை மேலும் ஒரு மாதகாலத்திற்கு நீடிப்பதற்கான பிரேரணையை சமர்ப்பித்து பேசினார். 2005ஆம் ஆண்டு மே மாதம் 13ஆம் திகதி அமுலு க்கு கொண்டு வந்த அவசரகாலச் சட்டத்தின் 35 கட்டளைகள் 2010ஆம் ஆண்டு மே 23ம் திகதி நீக்கப்பட்டு ஏழு கட்டளைகள் திருத்தப்பட்டும், ஒரு கட்டளை நீக்கப்பட்டு அதற்கு பதிலாக ஒரு கட்டளை உட்புகுத்தப்பட்டும் அமுல்படுத்தப்பட்டு ள்ளது.

அவசரகாலச்சட்டத்தின் மிக முக்கிய கட்டளைகள் நீக்கப்பட்டு பெயரளவிலான ஒரு அவசரகாலச் சட்டமே இன்று அமுலில் இருக்கிறது. இலங்கையின் பொருளாதார மத்திய நிலையங்களாக கருதப்படும் பெரும்பாலும் அதன் சுற்றுப்புறங்களிலுமுள்ள இடங்களை அவசரகால சட்டத்தில் சில திட்டமுறைகளாக கொண்டு பாதுகாப்பு வழங்கப்பட்டது. எனினும், தற்போது அமுலிலுள்ள அவசரகாலச்சட்டத்தை நீக்குவது தொடர்பாக பாதுகாப்பு சபையின் ஆலோசனை பெறப்பட்டுள்ளது. இதன் ஆலோசனைக்கமைய சட்டத்தை நீக்குவதற்கான நடவடிக்கையை அரசாங்கம் எடுத்து வருகின்றது. கைதுசெய்யப்பட்டு தடுத்து வைக்கப்பட்டு புனர்வாழ்வளிக்கப்பட்ட 8491 பேர் சமூகத்துடன் இணைக்கப்பட்டுள்ளனர். இவர்களில் 2122 பெண்களும், 594 சிறுவர்களும் அடங்குவர். மேலும் 3173 பேர் புனர்வாழ்வு பெற்று வருகின்றனர். இவர்கள் மிகவிரைவில் சமூகத்துடன் இணைக்கப்படுவார்கள்.

புலிகள் இயக்கம் இலங்கையில் இப்போது இல்லாதபோதும் புலிகளை மீண்டும் தலைதூக்குவதற்கு வெளிநாட்டு சக்திகள் முயன்று வருகின்றன. இலங்கையை இக்கட்டான சூழ்நிலைக்குத் தள்ளுவதற்கும் சில வெளிநாட்டு சக்திகள் முயற்சிக்கின்றன. எஸ். ஜே. எமானுவல், ஜீ. ரி. எல். வீ. ருத்ரகுமாரன், பிரிட்டிஷ் தமிழ் போரம், தமிழ் நஷனல் கவுன்சில் போன்ற வெளிநாட்டு சக்திகள் இலங்கையில் அமைதியின்மையையும், அவப்பெயரையும் ஏற்படுத்த முயற்சிக்கின்றன.

மனிதாபிமான நடவடிக்கையின்போது வெளிநாட்டுக்குத் தப்பிச்சென்ற புலிகளை மீண்டும் ஒன்றிணைக்க முயற்சிக்கின்றன. அத்துடன் தென்னிந்தியாவில் தமிழ் நாட்டில் புலிகளுக்காக குரல் கொடுக்கின்றவர்கள் மக்களையும் நினைத்துக்கொண்டு இலங்கைக்கு பொருளாதார தடைகளை எடுக்க முயற்சி செய்து வருகின்றார்கள்.