பற்றி எரியும் லண்டன், மற்ற நகரங்களுக்கும் பரவுகிறது

பொதுமக்கள் மீது பிரிட்டன் காவல்துறை துப்பாக்கிச்சூடு நடத்தியதில் இரண்டு பேர் கொல்லப்பட்டதால் ஆத்திரமடைந்த மக்களுக்கும், காவல்துறையினருக்கும் இடையில் மோதல் அதிகரித்திருக்கிறது. லண்டன் மாநகர் தெருக்கள் போர்க்களமாகக் காட்சியளிக்கும் வகையில் இருக்கிறது. ஏராளமான வாகனங்கள் எரிக்கப்பட்டுள்ளன. காவல்துறை அடக்குமுறையை ஏவிவிட்டு மக்களின் கோபத்தைக் கட்டுப்படுத்த முயற்சி செய்து வருகிறது. கடந்த சில மாதங்களாகவே ஐரோப்பிய நாடுகளில் மக்கள் மீதான தாக்குதல்கள் அதிகரித்து வருகின்றன. பெரும் பொருளாதார நெருக்கடியை சமாளிப்பதற்காக மக்கள் மீது சுமையை ஏற்றும் அரசுகளுக்கு எதிராக ஏராளமான போராட்டங்கள் நடைபெற்று வருகின்றன. தங்களின் நடவடிக்கை களை மீறி பொருளாதார நெருக்கடி கை மீறிப்போய்க் கொண்டிருப்பதால் மக்களின் போராட்டங்களை ஒடுக்கும் வேலையை பல ஐரோப்பிய அரசுகள் செய்து வருகின்றன.

லண்டனின் வடக்குப்பகுதியில் உள்ள டாட்டன்ஹாமில் கடந்த வியாழக்கிழமையன்று காவல் துறையினரால் மார்க் துக்கன் என்பவர் சுட்டுக் கொல்லப்பட்டார். சனிக்கிழமையன்று இங்கு நடைபெற்ற ஆர்ப்பாட்டம், வன்முறையாக மாறியது. இது குறித்து விளக்கம் தர வேண்டும் என்று மக்கள் கோரியதைத் தொடர்ந்தே பிரச்சனை துவங்கியது. இந்தக் கோரிக்கைக்கான ஆர்ப்பாட்டம் கடுமையான அடக்குமுறையைச் சந்தித்தது. 12 மணிநேரத்தில் பெரும் போராட்டமாக மாறியது. கடந்த மூன்று நாட்களாக இரவு மற்றும் பகல் என்று 24 மணி நேரமும் காவல்துறையினருக்கும், பொதுமக்களுக்கும் இடையிலான வன்முறை நடவடிக்கையாக மாறிவிட்டது. இத்தகைய சூழ்நிலையை கலவரக்காரர்களும் பயன்படுத்திக் கொண்டுள்ளார்கள். இதனால் பல இடங்களில் கொள்ளைகள் அடிக்கப்பட்டுள்ளன.

லண்டனின் தென் பகுதியில் உள்ள பெக்காம், லெவிஷாம், கிராய்டோன் மற்றும் டெப்ட்ஃபோர்டு ஆகிய மாவட்டங்கள் இந்த கலவரங்களால் பாதிக்கப்பட்டிருக்கின்றன. லண்டனின் கிழக்குப்பகுதியில் உள்ள ஹாக்னி என்ற நகரிலும் கலவரம் பரவியிருக்கிறது. பெக்காம் மாவட்டத்தில் கடைகள் தீக்கிரையாகியுள்ளன. கிராய்டோன் மாவட்டத்தில் ஒரு கட்டிடத்திற்கே தீ வைத்துள்ளனர். லெவிஷாம் மற்றும் டெப்ட்ஃபோர்டு ஆகிய மாவட்டங்களில் ஏராளமான கார்கள் எரிந்து சாம்பலாகியிருக்கின்றன. இந்நிலையில் சுமார் 160 பேரைக் கைது செய்துள்ளதாக காவல்துறை வட்டாரங்கள் கூறியுள்ளன. இவர்கள் கலவரக்காரர்களா அல்லது அப்பாவி மக்களா என்ற கேள்வி ஆத்திரமடைந்துள்ள மக்கள் மத்தியில் எழுந்துள்ளதாகும்.

மூன்று நாட்களுக்கு முன்பாகத் துவங்கிய இந்தப் பிரச்சனை, முதன்முறையாக திங்கட்கிழமை யன்று லண்டனுக்கு வெளியிலும் பரவியது. இத்தகைய நிலைமையை நாங்கள் எதிர்நோக்கியிருந்தோம் என்று காவல்துறையினர் கூறியிருந்தாலும் அதைத் தடுப்பதற்கான வேலைகள் எதையுமே எடுக்கவில்லை. பல பகுதிகள் கிட்டத்தட்ட முழு கடையடைப்பு போன்று காட்சியளிக்கின்றன. இதுதான் அரசுத்தரப்பில் எடுக்கப்பட்ட நடவடிக்கையாகும்.

இந்த சம்பவங்கள் லண்டன் ஒலிம்பிக் போட்டிகள் நடக்கப்போகும் இடத்திற்கு அருகில் நடந்து வருகின்றன. இதனால் ஒலிம்பிக் போட்டிகளை நடத்துவதில் ஏதேனும் சிக்கல்கள் ஏற்படுமா என்ற கேள்வியும் எழுந்திருக்கிறது. 2012 ஆம் ஆண்டில் இந்தப் போட்டிகள் நடக்கப்போகின்றன. சில கிலோ மீட்டர்கள் தூரத்தில் இருக்கும் ஒலிம்பிக் போட்டிகள் பகுதி, லட்சக்கணக்கான பார்வையாளர்களை இன்னும் ஒரு ஆண்டுக்குள் வரவேற்கவிருக்கிறது. ஆனால் போட்டி ஏற்பாட்டாளர்கள் கருத்து தெரிவிக்கையில், பொருளாதார நெருக்கடியும் சரி, அதற்கு எதிராக மக்களின் கருத்து மற்றும் எதிர்ப்பு நடவடிக்கைகளும் சரி, இவற்றால் ஒலிம்பிக் போட்டிகள் பாதிக்கப்படாது என்று கூறியுள்ளனர்.