குகநாதன் மீதான தாக்குதலின் பின்னணியில் பிரபல சட்டத்தரணி

உதயன் பத்திரிகையின் செய்தியாசிரியர் ஞா. குகநாதன் தாக்கப்பட்ட சம்பவத்துடன் தொடர்புடைய மேலும் மூன்று பேரிடமிருந்து பொலிஸார் வாக்கு மூலங்களைப் பதிவுசெய்துள்ளனர். களுபோவில வைத்தியசாலையில் அனுமதிக்கப்பட்டுள்ள பாதாள உலக நபர் வழங்கிய தகவலின்படி பிரதான சூத்திரதாரி குடாநாட்டின் பிரபல சட்டத்தரணி என்பதும் ஆரம்பகட்ட விசாரணைகளிலிருந்து தெரியவந்திருப்பதாக பொலிஸார் தெரிவித்தனர். 56 பலதரப்பட்ட குற்றச்செயல்களுடன் தொடர்புடையவரும், பல வழக்குகளில் தேடப்படும் நபருமான நல்லூரைச் சேர்ந்த இரத்தினசிங்கம் சந்திரகுமார் என்பவரை பிணையில் விடுதலை செய்வதற்கு தானே முன்வந்து, கட்டணமின்றி ஆஜரான சட்டத்தரணி ஒருவரே குகநாதனைத் தாக்குமாறு கூறியதாக சந்தேகநபர் பொலிஸாருக்கு வாக்குமூலம் அளித்துள்ளார்.

இலவசமாக ஆஜராகி பிணையில் விடுதலை செய்கிறேன். அதற்குப் பதிலாக ஊடகவியலாளர் குகநாதனைத் தாக்கவேண்டும் என்று தன்னுடன் செய்த ஒப்பந்தத்தின் பிரகாரமே இந்தத் தாக்குதலை தான் மேற்கொண்டதாக சந்தேக நபர் பொலிஸாருக்கு வழங்கிய வாக்குமூலத்தில் தெரிவித்துள்ளார்.

குகநாதனைத் தாக்கிய பின்னர் வீடொன்றில் மறைந்திருந்தவேளை இனந்தெரியாத நபர்கள் சிலர் வீட்டுக்குள் புகுந்து பொல்லுகளாலும், தடிகளாலும் தன்னைத் தாக்கி காயப்படுத்திவிட்டுத் தப்பிச் சென்றதாக சந்தேகநபர் மேலும் பொலிஸாருக்கு வாக்குமூலம் வழங்கியுள்ளார்.

இதனால் காயங்களுடன் யாழ். போதனா வைத்தியசாலையில் அனுமதிக்கப்பட்ட சந்தேகநபர் மேலதிக சிகிச்சைக்காக களுபோவில வைத்தியசாலைக்கு அனுப்பப்பட்டார்.

குகநாதன் தாக்குதல் விவகாரம் தொடர்பாக விசாரணைகளை முடுக்கிவிட்ட பொலிஸார், களுபோவில ஆஸ்பத்திரியில் அனுமதிக்கப்பட்ட சந்தேகநபரிடம் தீவிர விசாரணைகளை மேற்கொண்டனர்.

சந்தேகநபர் மீது தாக்குதல் தொடுக்கப்பட்ட காலம் முதல் களுபோவில வைத்தியசாலையில் ஏன் உடனடியாக மாற்றப்பட்டார் என்பது வரை தொடர்ச்சியாக செய்த விசாரணைகளின் பின்னர் குகநாதனை தாக்கிய விடயத்தையும் அவர் ஒப்புக்கொண்டார்.

பிரதான சூத்திரதாரியான சட்டத்தரணியுடன் செய்துகொள்ளப்பட்ட ஒப்பந்தத்தின் பிரகாரமே குகநாதன் தாக்கப்பட்ட விடயமும் இந்த விசாரணைகளின் போதே தெரியவந்துள்ளது.

களுபோவில வைத்தியசாலையில் கைதுசெய்யப்பட்ட சந்தேகநபர் கங்கொடவில மஜிஸ்ரேட் முன்னி¨யில் ஆஜர்படுத்தப்பட்டார். அவரை எதிர்வரும் 29ஆம் திகதி வரை விளக்கமளியலில் வைக்குமாறு நீதவான் உத்தரவுபிறப்பி த்துள்ளார்.