ஊறணிச் சம்பவத்துடன் தமிழ்த் தேசியக் கூட்டமைப்பை தொடர்புபடுத்துவது விஷமத்தனம் நிறைந்ததாகும் சட்ட நடவடிக்கை எடுப்பது குறித்தும் ஆராய்வு

தமிழ்த்தேசியக் கூட்டமைப்பு தொடர்பில் காத்தான்குடி நகரசபை தலைவர் தெரிவித்திருக்கும் கருத்துக்கு எதிராக தமிழ்த் தேசியக் கூட்டமைப்பு சட்ட நடவடிக்கை எடுப்பது குறித்த ஆராய்ந்து வருவதாகக் கூட்டமைப்பு விடுத்துள்ள அறிக்கையில் தெரிவிக்கப்பட்டுள்ளது.

இது குறித்து மேலும் தெரிவிக்கப்பட்டுள்ளதாவது,
மட்டக்களப்பு மாவட்டத்தில் தற்போது உருவாகியுள்ள மர்மமனிதன் செயற்பாடு சார்பான பீதி, அதன் பின் இடம்பெற்ற வன்முறையின் பின்னணியில் தமிழ்த் தேசிய கூட்டமைப்பு இருப்பதாக காத்தான்குடி நகரசபை தலைவர் எஸ்.எச்.எம். அஸ்வர் ஊடகங்களுக்கு வெளியிட்டுள்ள கருத்தானது தமிழ், முஸ்லிம் மக்களுக்கிடையில் உள்ள நல்லுறவையும், ஐக்கியத்தையும் பாதிக்கும் ஒரு செயலாகும். இதனை தமிழ்த் தேசியக் கூட்டமைப்பு வன்மையாகக் கண்டிக்கின்றது.
மட்டக்களப்பு மாவட்ட தமிழ்த் தேசிய கூட்டமைப்பு பாராளுமன்ற உறுப்பினர்களான பொன் செல்வராசா, சீ. யோகேஸ்வரன் மற்றும் பா.அரியநேத்திரன் ஆகியோர் இது தொடர்பாக ஊடகங்களுக்கு நேற்று ஞாயிற்றுக்கிழமை வெளியிட்டுள்ள அறிக்கையில் இவ்வாறு குறிப்பிட்டுள்ளனர்.
மர்மமனிதன் பீதி காரணமாக தமிழ்  முஸ்லிம் பிரதேசங்களில் தொடர்ந்தும் ஒருவித அச்சநிலை காணப்படுகின்றது. இதன் காரணமாக மக்களின் இயல்புநிலையும் பாதிக்கப்பட்டுள்ளது. சில இடங்களில் பாதுகாப்பு தரப்பினருக்கும், பொது மக்களுக்கும் இடையில் முறுகல் நிலை ஏற்படுகின்றது. மக்கள் தாக்கப்படுகின்றனர். உடமைகள் சேதமாக்கப்படுகின்றன. இப்படியான சம்பவங்கள் தமிழ் பகுதியிலும், முஸ்லிம் பகுதியிலும் இடம்பெற்று வருகின்றன.
குறிப்பாக தமிழ்ப் பிரதேசங்களில் இப்படியான சம்பவங்கள் இடம்பெறும் போது தமிழ் மக்கள் எமது கவனத்துக்கு இந்த விடயங்களை கொண்டு வருகின்றார்கள். இதனையடுத்து பாராளுமன்ற உறுப்பினர்களாகிய நாங்கள் அந்த இடங்களுக்கு சென்று பொலிஸார், பாதுகாப்பு தரப்பினருடன் பேசி பதற்றத்தை நீக்கி அங்கு இயல்பு நிலையை ஏற்படுத்தியிருக்கின்றோம். இதனை பொலிஸ் உயர் அதிகாரிகள், இராணுவ அதிகாரிகள் நன்கு அறிவார்கள். இது இப்படியிருக்கும் போது காத்தான்குடி நகரசபை தலைவர் உண்மையை அறியாமல் இந்தச் சம்பவங்களின் பின்னணியில் தமிழ்த் தேசியக் கூட்டமைப்பு பாராளுமன்ற உறுப்பினர்கள் இருப்பதாக ஊடகங்களுக்கு வெளியிட்டுள்ள கருத்து எம்மை பெரும் அதிர்ச்சிக்கும், ஆச்சரியத்துக்கும் உள்ளாக்கியுள்ளது.
கடந்த 17.08.2011 ஆம் திகதியன்று பிற்பகல் மட்டக்களப்பு ஊறணியில் மர்மமனிதனின் கீறல் காயத்துக்கு பெண் ஒருவர் உள்ளானதாகவும், இதனை அடுத்து அந்த பகுதி மக்கள் வீதிகளில் இறங்கி ஆர்ப்பாட்டங்களில் ஈடுபட்டதாக நாம் அறிந்தோம். நாங்கள் அங்கு சென்ற போது ஒரு பதற்ற நிலை காணப்பட்டது. மக்கள் மத்தியில் அச்சநிலை காணப்பட்டது. பொலிஸாரும் இராணுவமும் அங்கு காணப்பட்டார்கள். இவ்வேளை எங்களுக்கு முன்னதாக அந்த இடத்தில் கிழக்கு மாகாண சபை உறுப்பினரான தமிழ் மக்கள் விடுதலை புலிகள் கட்சியை சேர்ந்த பூ.பிரசாந்தன் தனது வாகனத்துடன் காணப்பட்டார். ஐக்கிய தேசியக் கட்சி மாகாணசபை உறுப்பினர் அ.த.மாசிலாமணியும் அங்கு வந்திருந்ததை எங்களால் காணமுடிந்தது.
ஊறணி சம்பவத்தின் போது தமிழ்த் தேசியக் கூட்டமைப்பு பாராளுமன்ற உறுப்பினர்கள் வந்து நின்று பொலிஸாரையும் இராணுவத்தையும் தாக்குங்கள் என்று கூறியதை தான் நேரில் கண்டதாகவும் ஊடகங்களுக்கு தெரிவித்துள்ளார். இக் கருத்தானது மிகவும் பாதகமான கருத்து என்றே நாம் கருதுகின்றோம். இக்கருத்து தமிழ்  முஸ்லிம் மக்களின் நல்லுறவில் ஒரு பாதிப்பை ஏற்படுத்தும் ஒரு பாரதூரமான விடயம் என்பதையும் நாம் சுட்டிக்காட்ட விரும்புகின்றோம்.
இச் சம்பவத்தின் போது தான் அங்கு நின்றதாக நகரசபை தலைவர் கூறுகின்றார். அப்படியானால் ஏன் அவர் அங்கு வரவேண்டும்? இச் சம்பவத்தின் பின்னணியில் அவர் உள்ளாரா? என்ற கேள்வி தமிழ் மக்கள் மத்தியில் எழுந்துள்ளது.
நகரசபை தலைவரினால் வெளியிடப்பட்ட தமிழ்த் தேசிய கூட்டமைப்பு தொடர்பான இக்கருத்து தொடர்பாக காத்தான்குடி பகுதியில் அரசியல்வாதிகள், சமய, சமூக, பிரமுகர்களின் கவனத்துக்கு நாம் கொண்டு வந்தபோது அவர்கள் தங்கள் கவலையை வெளியிட்டனர். அதற்காக அவர்களுக்கு எமது நன்றிகளை தெரிவிக்கின்றோம்.
எதிர்வரும் புதன்கிழமை தமிழ்த் தேசியக் கூட்டமைப்பு பாராளுமன்றக் குழு கொழும்பில் கூடவுள்ளது. கிழக்கு மாகாணத்தில் மக்கள் மத்தியில் தற்போது உருவாகியுள்ள அச்ச நிலை மற்றும் பதற்றமான சூழ்நிலை குறித்து அக்கூட்டத்தில் ஆராயப்படும் போது, காத்தான்குடி நகரசபை தலைவரினால் தமிழ்த் தேசியக் கூட்டமைப்பை தொடர்புபடுத்தி ஊடகங்களுக்கு வெளியிட்ட கருத்துக்கு சட்டநடவடிக்கை எடுப்பது குறித்தும் ஆலோசிக்கப்படும்.
தற்போது இஸ்லாமிய மக்கள் புனித றம்ழான் நோன்பை அனுஷ்டித்துக் கொண்டிருக்கும் இவ்வேளையில் காத்தான்குடி நகரசபை தலைவர் வெளியிட்டுள்ள அப்பட்டமான பொய்யானது றம்ழான் நோன்பின் புனிதத்தன்மைக்கு களங்கத்தை ஏற்படுத்தியதாகவே கருதுவதாகவும் அந்த அறிக்கையில் தெரிவிக்கப்பட்டுள்ளது.