ஊழலுக்கு எதிராக ஹசாரே நடத்தும் போராட்டத்தின் தாக்கம் இலங்கையிலும்

இந்தியாவில் ஊழல் மோசடிக்கு எதிராக காந்தியவாதி அன்னா ஹசாரே நடத்திவரும் உண்ணாவிரதப் போராட்டத்தின் தாக்கம் இலங்கையிலும் ஏற்பட்டிருப்பதற்கான அறிகுறிகள் வெளிப்பட்டுள்ளன. முன்னாள் உயர்நீதிமன்ற நீதியரசர் சரத் என் சில்வா ஊழலுக்கு எதிராக மக்கள் எழுச்சிபெறுவது அவசியம் என்று அழைப்பு விடுத்திருக்கின்றார்.
ஊழல் மோசடிகள் சகல மட்டத்திலும் காணப்படுவதாக சரத் என் சில்வா ஆங்கில வாரப் பத்திரிகையொன்றுக்கு அளித்துள்ள பேட்டியில் குறிப்பிட்டிருக்கின்றார்.
கிராமசேவகர் அல்லது பொலிஸ் கான்ஸ்டபிள் மட்டத்திலிருந்து சகல மட்டங்களிலும் ஊழலுக்கு எதிரான நடவடிக்கைகளை மேற்கொள்ள முடியும். ஆனால், உயர்மட்டங்களில் இரகசியமான வடிவத்தில் அதிகளவு இவை இடம்பெறுகின்றன. அவற்றைச் சுலபமாகக் கண்டுகொள்ள முடியாது. தேர்ந்தெடுக்கப்பட்ட கொள்வனவாளர்களுக்குப் பொருத்தமான முறையில் கேள்வி மனுக்கோரலில் விசேடப்படுத்தல்கள் இடம்பெறுவது தனிப்பட்ட முறையில் எனக்குத் தெரியும். அதனால் ஏற்படும் பாதிப்புகள் அறியப்படும்வரை இந்த நடவடிக்கைகளை ஒருவராலும் பார்க்க முடியாது என்று சரத் என் சில்வா கூறியுள்ளார்.

இந்த நாட்டிலுள்ள பல திட்டங்களில் ஊழல் மோசடிகள் இடம்பெறுவது குறித்து நான் கவலையடைந்துள்ளேன். கடன்பட்ட பணத்திலிருந்து கடுமையான செலவினத்தைக் கொண்டதான பல திட்டங்கள் மேற்கொள்ளப்படுகின்றன. அவை தொடர்பான நிபந்தனைகள், விதிமுறைகள் குறித்து எவருக்கும் தெரியாமல் உள்ளது. நுரைச்சோலை அனல் மின்னுலை, அம்பாந்தோட்டை துறைமுகத்திட்டம் போன்றவை இந்த மாதிரியான திட்டங்களாகும். இதேபோன்று காலி முகத்திடல் காணி விடயமும் இடம்பெற்றுள்ளது. அதனாலேயே இந்த விடயத்தில் எனது நேரத்தைச் செலவிட வேண்டுமென நான் நினைத்தேன். நீண்டகாலப் பாதிப்பை இவை நாட்டுக்கு ஏற்படுத்தும். வர்த்தக ரீதியில் கடன்பெற்ற பணத்தின் மூலம் இந்த நடவடிக்கைகள் மேற்கொள்ளப்பட்டுள்ளன. எந்த அடிப்படையில் இவை பெறப்பட்டன என்பது தெரியாது. 2004 இல் ஊழலுக்கு எதிரான ஐ.நா. சாசனத்தில் இலங்கை கைச்சாத்திட்டுள்ளது. அரசாங்கத்தின் கொள்வனவு நடவடிக்கைகளில் வெளிப்படைத்தன்மை இருக்க வேண்டும். இந்த ஐ.நா. சாசனத்தில் கைச்சாத்திட்ட இரண்டாவது நாடு இலங்கையாகும். சந்திரிகா குமாரதுங்க ஜனாதிபதியாகவும் ரணில் விக்கிரமசிங்க பிரதமராகவும் இருந்த காலத்தில் இந்த உடன்படிக்கையில் கைச்சாத்திடப்பட்டது. பின்னர் மகிந்த சிந்தனையில் இது உள்ளடக்கப்பட்டு ராஜபக்ஷ அரசாங்கத்தினால் சட்ட ரீதியான அங்கீகாரம் வழங்கப்படுமென பிரகடனப்படுத்தப்பட்டது. இலஞ்ச ஊழலுக்கு எதிரான சட்டமாக அமையுமெனத் தெரிவிக்கப்பட்டது. ஆனால், அதனை இதுவரை பார்க்க முடியவில்லை.

 
ஏனைய பல நாடுகளைப் போன்றே நாங்களும் எப்போதுமே ஊழலைக் கொண்டிருக்கின்றோம். ஆனால் அதனைத் தடுப்பதற்கு நடவடிக்கைகள் எடுக்கப்பட்டன. முதன் முதலில் பிரிட்டிஷார் குற்றக் கோவையில் ஊழல் விவகாரத்தைக் கையாளுவதற்கான ஏற்பாட்டை அறிமுகப்படுத்தியிருந்தனர். தொடர்ந்து ஆட்சிக்கு வந்த அரசாங்கங்கள் ஊழல் மோசடிக்கு எதிராக அதிகளவில் நடவடிக்கைகளை எடுத்திருந்தன. அதேவேளை, திறந்த பொருளாதாரத்துடன் ஊழலுக்கு கதவுகள் திறந்து விடப்பட்டன.ஜே.ஆர்.ஜெயவர்த்தனாவின் ஆட்சியில் திறந்த பொருளாதாரம் அறிமுகப்படுத்தப்பட்டது. அச்சமயம் ஊழலுக்காகத் திறந்துவிடப்பட்ட கதவுகள் அதன் பின்னர் மூடப்பட்டிருக்கவில்லை. வரவுசெலவுத் திட்டத்தில் பாரிய தொகையானது நிதிச் செயலாளரால் முழுமையாக கையாளப்படுகின்றது. பாராளுமன்றத்திற்கு ஆறு மாத கால அறிக்கை சமர்ப்பிக்கப்படுகிறது.

ஆனால், பொது நிதியத்தில் பாராளுமன்றத்தின் கட்டுப்பாடு கவலைக்கிடமான நிலைமையில் உள்ளது. எதிரணி கவனத்தில் கொள்ளப்படுவதில்லை. ஆதலால் ஊழலுக்கு எதிராக பொதுமக்கள் மத்தியிலான நடவடிக்கைகள் தேவைப்படுகின்றன என்று சரத் என் சில்வா தெரிவித்துள்ளார்.
சிறியளவில் ஊழல் மோசடிகள் இல்லாமல் அபிவிருத்தியை மேற்கொள்ள முடியாதென சிலர் வாதத்தை முன்வைக்கிறார்களே? அது தொடர்பாக உங்களின் கருத்தென்ன என்று முன்னாள் பிரதமர் நீதியரசரிடம் கேட்கப்பட்டபோது, குறைந்தபட்ச சகிப்புணர்வு கூட இருக்கக்கூடாத விடயம் ஊழலாகும். ஏற்றுக்கொள்ளக்கூடிய மட்டத்துக்குக் கூட இதனைக் கொண்டிருக்கக்கூடாது. கூடாரத்துக்குள் ஒட்டகம் புகுந்த நிலைமையை இது ஏற்படுத்திவிடும். எமது முறைமையில் அநேகமான முதலீட்டாளர்கள் நம்பிக்கை கொண்டிருக்கவில்லை. ஏனென்றால் ஒளிவுமறைவான செலவினங்கள் இருக்கின்றன. ஊழலே இந்த ஒளிந்திருக்கும் செலவினமாகும். சகல அங்கீகாரங்களுக்கும் நீங்கள் கொடுப்பனவுகளைச் செலுத்த வேண்டியுள்ளது. அதனாலேயே முதலீட்டாளர்கள் இந்த நாட்டை விட்டுச் செல்கின்றனர். நாட்டிலுள்ள கணக்கு வழக்குகளை பரிசீலிக்கும் முறைமை தள்ளாடிக் கொண்டிருக்கிறது. பணம் செலவழிக்கப்படுகிறது. வரிகள் விதிக்கப்படுகின்றன. விருப்பு வெறுப்புகளுக்கு அமைய வரிகள் குறைக்கப்படுகின்றன. வாகனத்துக்கான இறக்குமதி வரிகள் திடீரெனக் குறைக்கப்பட்டு பின்னர் அதிகரிக்கப்பட்டதை நாங்கள் பார்க்கிறோம். இதற்கிடையில் பெருந்தொகை வாகனங்கள் இறக்குமதி செய்யப்பட்டன. அதிகளவானோர் ஆதாயம் பெற்றிருப்பார்கள் என்று நான் நம்புகிறேன். கட்டுப்பாடு இல்லாததே இதற்குக் காரணமாகும். கேள்விக்கிடமான பல பரிவர்த்தனைகள் உள்ளன. எந்தவொரு இடத்தில் நீங்கள் கையை வைத்தாலும் அங்கு ஏதோவொரு தவறு காணப்படுகிறது. தனிப்பட்ட விருப்பு வெறுப்புகளுக்கமைய நாடு நிர்வகிக்கப்படுகிறது என்று முன்னாள் நீதியரசர் குறிப்பிட்டுள்ளார்.

இந்தியாவில் அரசியல்வாதிகள், அரச உயர் அதிகாரிகள் மற்றும் பிரதமரையும் உள்ளடக்கியதாக வலுவான லோக்பால் சட்டமூலத்தை நடைமுறைப்படுத்துமாறு காந்தியவாதி அன்னா ஹசாரேயின் உண்ணாவிரதப் போராட்டம் பாரதம் எங்கும் பரந்தளவிலான ஆதரவைப் பெற்றுவரும் நிலையில், இலங்கையிலும் முன்னாள் பிரதம நீதியரசரின் ஊழலுக்கு கருத்துகள் இந்தியாவில் ஏற்பட்டிருக்கும் மக்கள் மத்தியிலான உணர்வலைகளின் தாக்கமாக இருக்கும் அறிகுறிகள் காணப்படுகின்றன.