நாட்டின் அதிவேக நெடுஞ்சாலை செப்டம்பர் 2 ஆம் திகதி முதல் பொதுமக்கள் பாவனைக்கு

ஒரு நாடு அபிவிருத்தி அடைந்த நாடாக திகழ வேண்டுமென்றால் அந்த நாட்டின் கீழ் கட்டுமான, அடிப்படை வசதிகள் அபிவிருத்தி செய்யப்படல் வேண்டும். அதிலும் குறிப்பாக பாதை அபிவிருத்தி என்பது மிகவும் முக்கியமானது. இலங்கையில் 2005 ஆம் ஆண்டிற்கு முன்பு நாட்டின் ஒரு சில பகுதிகள் மாத்திரமே அபிவிருத்தியின் வாசனை கிட்டியிருந்தது. 2005 ஆம் ஆண்டிற்கு பின்பு ஜனாதிபதி மஹிந்த ராஜபக்ஷ ஜனாதிபதியாக பதவியேற்றதன் பின்பு இந்த நாட்டின் வரலாற்றில் கதைகளாக இருந்து வந்த பாதைகளும், பாலங்களும் நாட்டின் பிரதான பிதேசங்கள் உட்பட சகல பிரதேசங்களுக்கும் செல்ல ஆரம்பித்தது.

இவ்வாறு நீண்டநாள் திட்டங்களுக்கு மத்தியில் 1995 ஆம் ஆண்டு ஆரம்பிக்கப்பட்டு கைவிடப்பட்டிருந்த தென் பிராந்திய அதிவேக நெடுஞ்சாலை காணிகளை பொறுப்பேற்றல் மற்றும் நிர்மாணத்திற்கான பணத்தினைப் பெற்றுக்கொள்ளுதல் போன்ற பல்வேறு காரணங்களினால் இடைநிறுத்தப்பட்டிருந்தது.

இவ்வாறு இடைநிறுத்தப்பட்டிருந்த இலங்கையின் முதலாவது அதிவேக நெடுஞ்சாலை மீண்டும் ஜனாதிபதி பதவியேற்றபின் பின்பு சுமார் பத்து வருடங்களின் பின்பு அவரது ஆலோசனை வழிகாட்டலின் பேரில் கொட்டாவையிலிருந்து மாத்தறை வரையிலான நான்கு லேன்களை கொண்ட பாதையாக நிர்மாணிக்க நடவடிக்கை எடுக்கப்பட்டது.

கொட்டாவையிலிருந்து மாத்தறை வரையான 132 கிலோ மீற்றர் பாதை ஜப்பான் நாட்டு நட்புறவு நிதியத்தின் உதவித் திட்டத்தின் கீழ் 2005 ஆம் ஆண்டு செப்டெம்பர் மாதம் மீண்டும் உத்தியோகபூர்வமாக ஆரம்பித்து வைக்கப்பட்டது. இதனூடாக வெளிநாடுகளுக்கு மாத்திரமே உரித்தாகவிருந்த அதிவேக நெடுஞ்சாலை எமது நாட்டின் கனவும் நனவாக ஆரம்பித்ததோடு இதற்காக 2000 கோடி ரூபா செலவாகுமென மதிப்பிடப்பட்டிருந்தது.

இவ்வாறு ஆரம்பிக்கப்பட்ட நிர்மாணப் பணிகள் கட்டம் கட்டமாக ஆரம்பிக்கப்பட்டு முதல் கட்டமாக காலி வரைக்கும் நிர்மாணிக்கப்பட்டுள்ளதோடு ஒவ்வொரு கட்டத்திற்கும் ஆசிய அபிவிருத்தி வங்கி மற்றும் சீன நாட்டு ஏற்றுமதி இறக்குமதி வங்கி ஆகியன இத்திட்டத்திற்கு உதவியுள்ளமையும் இதன் விசேட அம்சமாகும்.

இந் நெடுஞ்சாலையின் விசேட அம்சமாவது எல்லா பிரதேசங்களிலிருந்து இப்பாதைக்கு பிரவேசிக்கவும் வெளியேறவும் முடியாது. குறிப்பிட்ட சில பிரதேசங்களிருந்து மாத்திரமே உட்பிரவேசிக்கவும், வெளியேறவும் முடியும்.

தென் பிராந்திய அதிவேக நெடுஞ்சாலைக்கு உட்பிரவேசிக்கவென கொட்டாவ, கஹதுடுவ, கெலனிகம, தொடங்கொட, வெலிபென்ன, குருதுகஹா, பத்தேகம, பின்னதூவ, தீகொட, கொக்கமாதூவ மற்றும் கொடகம ஆகிய 11 பிரதேசங்களில் விசேட உட்பிரவேச பாதைகள் பதினொன்று நிர்மாணிக்கப்பட்டுள்ளதோடு ஏழு பாலங்களும் நிர்மாணிக்கப்பட்டுள்ளது.

அதில் பெந்தோட்டை பெந்தரகங்கைக்கு குறுக்காக நிர்மாணிக்கப்பட்டுள்ள 17 மீற்றர் அகலமும் 695 மீற்றர் நீளத்தினையுமுடைய பன்தொட பாலம் இதுவரை இலங்கையில் நிர்மாணிக்கப்பட்டுள்ள மிக நீளமான பாலமாக வரலாறு படைக்கவுள்ளது. பால நிர்மாணத்திற்காக 109 கோடி ரூபாய் செலவிடப்பட்டுள்ளது.

தென் பிராந்திய அதிவேக நெடுஞ்சாலையில் பயணிக்கும் வாகனங்களுக்கும், பிரயாணிகளுக்கும் சேவைகளை வழங்குவதற்காக ஓய்வினை கழிப்பதற்காக தம் விசேட ஏற்பாடுகள் பாதை ஓரங்களில் செய்யப்பட்டுள்ளதோடு இவற்றில் சிற்றுண்டிச் சாலைகள், சுகாதார வைத்திய சேவைகள், பழுது பார்க்கும் நிலையங்கள், எண்ணெய் நிரப்பு நிலையங்கள் போன்றவற்றினையும் உள்ளடக்கியுள்ளது.

இலங்கை போக்குவரத்துச் சபை தனியார் போக்குவரத்து சேவை என்பனவற்றின் வாகனங்களுக்கும் சொந்த தனியார் வாகனங்களுக்கும் இதில் பயணிக்க அனுமதி வழங்கவுள்ளதோடு பயணத்தினை மேற்கொள்ளும் ஒவ்வொரு சந்தர்ப்பத்திற்கும் ஒரு சிறு தொகை பணம் அறவிடப்படவுள்ளது.

அத்தோடு இதில் பயணங்களை மேற்கொள்ளும் வாகனங்களுக்கு வேக அளவு நிர்ணயிக்கப்பட்டுள்ளது. இது மணித்தியாலயத்திற்கு ஆகக் குறைந்தது 60 கிலோ மீற்றலிருந்து ஆகக் கூடியது 120 கிலோ மீற்றர் வரை நிர்ணயிக்கப்படவுள்ளது. இந்நெடுஞ்சாலையின் பராமரிப்பு மற்றும் சேவைகளினை வழங்குவதற்கான அனுமதியினை இலங்கை காப்புறுதி கூட்டுத்தாபனத்திடம் ஒப்படைக்கப்படவுள்ளது.

வெளிநாடுகளில் சென்று பயணித்தது போன்று அதைப் போன்று எவ்விதத்திலும் குறைவில்லாமல் அழகிய சூழலில் கண்ணை கவரக்கூடிய விதத்தில் எமது நாட்டின் வரலாற்றில் முதல் தடவையாக தென் பிராந்தியத்தில் நிர்மாணிக்கப்பட்டுள்ள கொட்டாவையிலிருந்து பின்னதூவ வரையிலான முதலாவது கட்டப் பணிகள் ஆகஸ்ட் மாதம் 30 ஆம் திகதி நிறைவடைந்து செப்டெம்பர் 02 ஆம் திகதி மக்கள் பாவனைக்காக திறந்துவிடப்படவுள்ளதினால் இதனூடே நீண்ட தூர பயணத்தினை ஒரு குறுகிய நேரத்தில் சொகுசாக வந்து சேரக்கூடிய வாய்ப்பு எமது நாட்டு மக்களுக்கு ஜனாதிபதி மஹிந்த ராஜபக்ஷவின் முயற்சி தூரநோக்கு என்பவற்றால் கைகூடப் போகின்றது.