கடாபி குடும்பம் அல்ஜீரியாவில் தஞ்சம்,  இளைய மகன் காமிஸ் பலி

லிபிய ஜனாதிபதி முஅம்மர் கடாபியின் மனைவி, மகள் மற்றும் இரு மகன்கள் அயல் நாடான அல்ஜீரியாவில் தஞ்சமடைந்துள்ளனர். இந்த தகவலை அல்ஜீரிய வெளியுறவு அமைச்சு நேற்று உறுதி செய்தது. முஅம்மர் கடாபியின் இரண்டாவது மனைவியான சபியா, மகள் அயிஷா மற்றும் மகன்களான ஹனிபல், முஹம்மட் ஆகியோருடன் அவர்களது குழந்தைகளும் அல்ஜீரியாவுக்கு தப்பிச் சென்றுள்ளனர். இவர்கள் கடந்த திங்கட்கிழமை காலை 8 மணி அளவில் லிபிய எல்லையை தாண்டி அல்ஜீரியாவை வந்தடைந்ததாக அல்ஜீரிய வெளியுறவு அமைச்சு குறிப்பிட்டுள்ளது. இது குறித்து அல்ஜீரியாவுக்கான ஐ.நா. தூதுவர் கூறுகையில், ‘அவர்கள் மனித நேய அடிப்படையில் வரவேற்கப்பட்டுள்ளனர்’ என்றார்.

“வருவோர்களை வரவேற்பது எமது கலாசாரத்தின் முக்கிய பண்பு. குறிப்பாக பாலைவனப் பகுதிகளில் இருக்கும் எமக்கு தஞ்சம் அடைவோருக்கு உதவி அளிப்பது கடமையாகும்’ என்று ஐ.நா.வுக்கான அல்ஜீரிய தூதுவர் மவுராத் பென்மெஹதி தெரிவித்துள்ளார்.

எனினும் அல்ஜீரியாவின் நடவடிக்கைக்கு கிளர்ச்சிப் படையின், தேசிய மாற்ற கெளன்சில் கண்டனத்தை வெளியிட்டுள்ளது. இது லிபிய மக்களுக்கு எதிரான செயல் என குறிப்பிட்டுள்ள மேற்படி கெளன்ஸிலின் பேச்சாளர் மஹ்மூத் ஷம்மான் இந்த குற்றவாளிகளை மீண்டும் லிபியாவுக்கு கொண்டுவர சட்ட ரீதியான அனைத்து நடவடிக்கைளும் எடுக்கப்படும் என தெரிவித்தார்.

எவ்வாறாயினும் லிபியாவின் தேசிய மாற்ற கெளன்ஸிலை அல்ஜீரிய அரசு இன்னும் அங்கீகரிக்கவில்லை என்பது குறிப்பிடத்தக்கது.

ஏற்கனவே 6 கவச வாகனங்கள் லிபிய எல்லையை தான்டி சுல்ஜீரியாவுக்குள் சென்றதாவும் அதில் முஅம்மர் கடாபி நாட்டை விட்டு தப்பிச் சென்றிருக்கலாம் எனவும் கிளர்ச்சிப்படை இரண்டு நாட்களுக்கு முன்னர் குறிப்பிட்டிருந்தது. எனினும் அந்த தகவலை அல்ஜீரிய அரசு மறுத்தது.

இதில் அல்ஜீரியாவில் தஞ்சம் புகுந்துள்ள கடாபியின் மகன்களான முஹம்மட் மற்றும் ஹனிபல் ஆகியோர் அந்நாட்டு அரசியலில் செல்வாக்கு செலுத்தவில்லை என்பது குறிப்பிடத்தக்கது.

இதேவேளை, முஅம்மர் கடாபியின் மற்றுமொரு மகனாக காமிஸ் கடாபி கொல்லப்பட்டதாக கிளர்ச்சிப்படை குறிப்பிட்டுள்ளது. கடந்த ஞாயிற்றுக்கிழமை வடமேற்கு லிபியாவின் துருனா மற்றும் பனி லலித் கிராமப்பகுதிகளில் இடம்பெற்ற மோதலின்போது காமிஸ் கடாபி கிளர்ச்சியாளர்களின் தாக்குதலில் கொல்லப்பட்டதாக கிளர்ச்சிப்படை இராணுவ கெளன்ஸிலின் துணைத் தலைவர் மஹ்தி அல் ஹாதி தெரிவித்துள்ளார்.

28 வயதான காமிஸ் கடாபி 32 ஆவது இராணுவ பிரிவின் தளபதியாக செயற்பட்டார். கிளர்ச்சியாளர்களுடனான அண்மைக் காலப் போரில் கடாபி ஆதரவுப் படையை வழி நடத்தியவர்களுள் முக்கியமானவராவார்.

ஏற்கனவே இவர் நேட்டோ தாக்குதலில் கொல்லப்பட்டதாக கூறப்பட்டிருந்தது. எனினும் அது பின்னர் மறுக்கப்பட்டது.

இதற்கிடையில் லிபியாவில் கடாபி இராணுவத்தினர் கொன்று குவித்து புதைத்த ஆயிரக்கணக்கான நபர்கள் உள்ள 4 புதைகுழிகளை கண்டுபிடித்துள்ளதாக கிளர்ச்சியாளர்கள் தெரிவித்துள்ளனர். கடாபி ஆதரவுப் படைக்காக போர் புரிய மறுத்த இராணுவ வீரர்களே இவ்வாறு கொல்லப்பட்டிருக்கலாம் என கிளர்ச்சியாளர்கள் சந்தேகம் வெளியிட்டுள்ளனர்.

இந்நிலையில் லிபியா குறித்த ஐ.நா. ஆவணமொன்று ஊடகங்களுக்கு கசிந்துள்ளது. இதில் கடாபிக்கு பின்னரான லிபியா குறித்து ஐ.நா. தீர்மானங்கள் உள்ளடக்கப்பட்டுள்ளன.

இதில் லிபியாவின் ஸ்திரத் தன்மையை பேண ஐ.நா.வின் 200 இராணுவ மேற் பார்வை யாளர்கள் மற்றும் 190 பொலிஸாரை நிலை நிறுத்த தீர்மானிக்கப்பட்டுள்ளது.

எனினும் இந்த தீர்மானத்தை நடைமுறைப்படுத்த ஐ.நா. பாதுகாப்புச் சபையின் அங்கீகாரம் வேண்டும் என்பது குறிப்பிடத்தக்கது. இதேவேளை, திரிபோலியை கைப்பற்றிய கிளர்ச்சிப்படை கடாபி பிறந்தகமான சிர்த் நகரை நோக்கி முன்னகர்ந்து வருகிறது. அத்துடன் முஅம்மர் கடாபி இன்னும் லிபியாவிலேயே உள்ளதாக நம்பும் கிளர்ச்சியாளர்கள் அவரது ரகசிய பதுங்கு குழிகளில் தேடிவருகின்றனர்.