ஒரு மாத காலத்துக்குள் 28 ஆயிரம் பேர் கைது

நீதிமன்ற பிடியாணை பிறப்பிக்கப்பட்ட 28000 பேர் கடந்த ஒரு மாத காலப்பகுதிக்குள் பொலிஸாரினால் கைது செய்யப்பட்டுள்ளனர். 2012 ஜுலை மாதம் முதலாம் திகதி முதல் 2012 ஜுலை மாதம் 31ம் திகதி வரையிலான ஒரு மாத காலப்பகுதிக்குள் நாடு முழுவதிலும் மேற்கொள்ளப்பட்ட விசேட சுற்றிவளைப்பு தேடுதல் நடவடிக்கை மூலமே 28 ஆயிரம் பேரும் கைது செய்யப்பட்டதாக பொலிஸ் ஊடகப் பேச்சாளர், பொலிஸ் அத்தியட்சகர் அஜித் ரோஹன தினகரனுக்குத் தெரிவித்தார். கைது செய்யப்பட்டவர்கள் அனைவரும் பல்வேறு குற்றச் செயல்களுக்காக நீதிமன்றத்தினால் பிடியாணை பிறப்பிக்கப்பட்டவர்கள் என்று தெரிவித்த அவர், இவர்களில் 7103 பேர் மேல் மாகாணத்தில் கைது செய்யப்பட்டுள்ளனர் என்றும் தெரிவித்தார்.

பல்வேறு குற்றச் செயல்களுக்காக நீதிமன்றத்தினால் பிடியாணை பிறப்பிக்கப்பட்ட நிலையில் நீதிமன்றில் ஆஜராகாது புறக்கணித்தும், தலைமறைவாகவும் இருந்து வருகின்ற குற்றவாளிகளையும், சந்தேக நபர்களையும் தேடிக் கைது செய்யுமாறு பாதுகாப்புச் செயலாளர் கோட்டாபய ராஜபக்ஷ பொலிஸ் மா அதிபர் என்.கே. இளங்ககோனுக்கு ஆலோசனை வழங்கியிருந்தார்.

இந்த ஆலோசனைக்கமைய பொலிஸ் மா அதிபரின் விசேட பணிப்பின் பேரில் அவரது நேரடி கண்காணிப்பின் கீழ் நாடு முழுவதிலும் தேடுதல் நடவடிக் கைகளை ஆரம்பித்த பொலிஸ் மற்றும் பொலிஸ் விசேட அதிரடிப்படையினர் முதற்கட்டமாக ஆயிரக்கணக்கானோரை கைது செய்து நீதிமன்றில் ஆஜர்படுத்தினர்.

இந்த தேடுதல் நடவடிக்கைகளை மேலும் முடுக்கிவிட்ட பொலிஸார், கடந்த ஒரு மாத குறுகிய காலப்பகுதிக்குள் நீதிமன்ற பிடியாணை பிறப்பிக்கப்பட்டு தேடப்பட்டு வந்த 28000 பேரை கைது செய்துள்ளதாக அவர் சுட்டிக்காட்டினார்.

கொலை, கொள்ளை, பாலியல் துஷ்பிரயோகம், சிறுவர் துஷ்பிரயோகம், பண மோசடி, பாதாள உலக குற்றச் செயல்கள் உட்பட பல்வேறு குற்றச் செயல்களுடன் தொடர்புடைய சந்தேக நபர்களும், குற்றவாளிகளும் கைது செய்யப்பட்டவர்களில் அடங்குவர்.

நீதிமன்ற பிடியாணை பிறப்பிக்கப்பட்ட நபர்களை தேடிக் கைது செய்யும் நடவ டிக்கைகளில் இராணுவத்தின் உதவியுடன் பொலிஸ் மற்றும் பொலிஸ் விசேட அதிரடிப் படையினர் தொடர்ந்தும் மேற்கொண்டு வருவதாகவும் பொலிஸ் ஊடகப் பேச்சாளர் சுட்டிக்காட்டினார்.

இதேவேளை அண்மைக்காலமாக இடம்பெற்று வருகின்ற குற்றச் செயல்கள், பாலியல் மற்றும் சிறுவர் துஷ்பிரயோக சம்பவங்களை கட்டுப்படுத்தவும், அதனுடன் தொடர்புடையவர்களை மடக்கிப்பிடித்து நீதிமன்றில் ஆஜர்படுத்தி அவர்களுக்கு எதிராக கடுமையான சட்ட நடவடிக்கைகளை எடுக்கும் நடவடிக் கைகளிலும் பொலிஸார் தொடர்ந்தும் ஈடுபட்டு வருவதாகவும் பொலிஸ் ஊடகப் பேச்சாளர் குறிப்பிட்டார்.

நாட்டில் இடம்பெற்று வரும் குற்றச் செயல்கள், துஷ்பிரயோகங்கள், கொலை மற்றும் கொள்ளைச் சம்பவங்களை கட்டுப்படுத்த பொதுமக்களின் ஒத்துழைப்பை பொற்றுக்கொள்ளும் நோக்கில் பாதுகாப்புச் செயலாளரின் ஆலோசனைக்கமைய புத்திஜீவிகள், சமயத் தலைவர்கள், முக்கி யஸ்தர்கள் அடங்கிய விசேட சிவில் குழுக்கள் நியமிக்க நடவடிக்கை எடுக்க ப்பட்டு வருகின்றமை குறிப்பிடத்தக்க தாகும்.