அலப்போ நகரில் பாரிய மோதலுக்கு தயாராகும் இராணுவம் - கிளர்ச்சியாளர்

சிரியாவின் மிகப் பெரிய நகரான அலப்போவில் தொடர்ந்தும் மோதல் இடம்பெற்று வரும் நிலையில் இரு தரப்பும் பாரிய மோதல் ஒன்றுக்கு தயாராகி வருவதாக செய்தி வெளியாகியுள்ளது. அலப்போ நகரைச் சுற்றி சுமார் 20,000 அரச படை முன்னகர்ந்து வருவதாக இராணுவ தரப்பில் கூறப்பட்டுள்ளதோடு, பலமான தாக்குதலுக்கு தயாராகி வருவதாக கிளர்ச்சியாளர்கள் அறிவித்துள்ளனர். இதில் அலப்போ நகர் மீது அரச படை எறிகணை, விமானம் மற்றும் ஹெலிகொப்டர் மூலம் தாக்குதல்களை தொடுத்து கிளர்ச்சியாளர்களை பின்வாங்கச் செய்ய முயற்சி மேற்கொண்டு வருகின்றனர். அலப்போ நகரின் அரச தொலைக் காட்சி, வானொலி தலைமையகங்களுக்கு அருகிலும் கடும் மோதல் ஏற்பட்டுள்ளது.

கிளர்ச்சியாளர்கள் கட்டுப்பாட்டிலுள்ள அலப்போவின் சலாஹுத்தீன் பகுதி மீது கடுமையான ஷெல் தாக்குதல் நடத்தப்பட்டு வருவதாக கிளர்ச்சியாளர்களின் சிரிய சுயாதீன படை குறிப்பிட்டுள்ளது.

இது இங்கு மோதல் ஆரம்பித்த ஜூலை 20 ஆம் திகதி முதல் நடத்தப்பட்ட மோசமான ஷெல் தாக்குதல் என கிளர்ச்சியாளர்கள் குறிப்பிட்டுள்ளனர்.

எனினும் அலப்போ நகர அரச தொலைக்காட்சி மற்றும் வானொலி நிலையங்களுக்கு தாக்குதல் நடத்த முற்பட்ட பல தீவிரவாதிகள் (கிளர்ச்சியாளர்கள்) கொல்லப்பட்டதோடு மேலும் பலர் காயத்திற்கு உள்ளானதாக சிரிய அரச தொலைக்காட்சி செய்தி வெளியிட்டுள்ளது.

அலப்போ நகரின் ஷார், பாப் அல் நைராப், அல் ஷகூர் என பல பகுதிகளிலும் குண்டுத் தாக்குதல்கள் பதிவாகியுள்ளதாகவும் அதில் பலருக்கு பாதிப்பு ஏற்பட்டிருப்பதாகவும் அலப்போவில் இருக்கும் அல் ஜkரா செய்தியாளர் குறிப்பிட்டுள்ளார்.

அரச படை தொடர் வான்தாக்குதல்களை இங்கு நடத்தி வருவதாக அந்த செய்தியாளர் கூறியுள்ளார்.

இதேவேளை தலைநகர் டமஸ்கஸ்ஸில் கிளர்ச்சியாளர் வசம் எஞ்சியிருந்த கடைசி பகுதியான டடாமுன் பகுதியை நேற்று முன்தினம் அரச படை கைப்பற்றியுள்ளது. கடுமையான எறிகணை தாக்குதலுக்கு பின்னரே இராணுவம் இந்த பகுதியை தனது கட்டுப்பாட்டுக்குள் கொண்டு வந்துள்ளது.

எனினும் டமஸ்கஸ்ஸின் ஜொபார் பகுதியில் மீண்டும் மோதல் ஏற்பட்டுள்ளது. இந்த வன்முறைகளால் டமஸ்கஸ்ஸில் நேற்று முன்தினம் 6 பேர் கொல்லப்பட்டுள்ளனர்.

இந்த நிலையில் சிரியா வந்த ஈரானை சேர்ந்த பக்தர்கள் 48 பேர் நேற்று முன்தினம் கடத்தப்பட்டனர். சிரியாவில் உள்ள சாயிதா ஷைனாப் மாவட்டத்தில் உள்ள ஷியா பிரிவினரின் புனித தலத்துக்கு ஆண்டு தோறும் ஈரானை சேர்ந்த ஆயிரக்கணக்கானவர்கள் வந்து செல்வது வழக்கம்.

அது போன்று அங்கு வந்த ஈரானியர்கள் புனித தலத்துக்குச் சென்று விட்டு டமஸ்கஸ் திரும்பினர். அங்கிருந்து விமான நிலையத்துக்கு ஒரு பஸ்ஸில் புறப்பட்டு சென்றனர். அந்த பஸ்சை ஆயுததாரிகள் துப்பாக்கியால் சுட்டு நிறுத்தினர். பின்னர் ஓட்டுனரை மிரட்டி பஸ்சை கடத்திச் சென்றனர்.

அவர்களை மீட்கும் நடவடிக்கையில் ஈரான் தூதரக அதிகாரிகள் ஈடுபட்டுள்ளனர்.

கடந்த மே மாதம் லெபனானைச் சேர்ந்த 11 பேர் கடத்தப்பட்டனர். பின்னர் 3 நாட்களுக்கு பின்னர் அவர்கள் விடுவிக்கப்பட்டனர்.

எனினும் ஈரான் புரட்சிப்படையைச் சேர்ந்த ஒருசிலரை தாம் பிடித்ததாக கிளர்ச்சியாளர்கள் குறிப்பிட்டுள்ளனர்.

சிரியாவில் அமைதி ஏற்படுத்துவதற்கான என்னுடைய முயற்சிக்கு போதிய ஆதரவு கிடைக்கவில்லை என கொபி அனான் வருத்தம் தெரிவித்துள்ளார்.

சிரியாவில் நடக்கும் சண்டைக்கு முற்றுப் புள்ளி வைக்க அரபு நாடுகளின் சார்பில் அமைதி நடவடிக்கை தூதராக கடந்த பெப்ரவரி முதல் கொபி அனான் செயல்பட்டார். இதற்கிடையே கடந்த வெள்ளிக்கிழமை அவர் தனது பதவியை ராஜினாமா செய்தார்.

இது குறித்து அவர் குறிப்பிடுகையில், அமைதி திட்டத்திற்காக நான் மேற்கொண்ட முயற்சிக்கு சர்வதேச சமூகம் எனக்குப் போதிய ஆதரவளிக்கவில்லை.

இது தொடர்பாக ஐ.நா. பாதுகாப்பு கவுன்சிலும் ஒத்தகருத்து ஏற்படவில்லை என்று தெரிவித்துள்ளார்.