அடுத்த பொதுத் தேர்தலில் பா.ஜ.க., காங்கிரஸ் அல்லாதவர் பிரதமராக வாய்ப்பு

நாட்டில் பா.ஜ.க., காங்கிரஸ் அல்லாத ஒருவர் இவ்விரு கட்சிகளில் ஏதாவதொரு கட்சியின் ஆதரவில் பிரதமராக வாய்ப்புள்ளது என்று பா.ஜ.க. மூத்த தலைவர் எல்.கே. அத்வானி கருத்துத் தெரிவித்துள்ளார்.

பா.ஜ.க. தலைமையிலான தேசிய ஜனநாயகக் கூட்டணியின் பிரதமர் பதவிக்கான வேட்பாளராக குஜராத் முதல்வர் நரேந்திர மோடியை நிறுத்தக்கூடாது என்று ஐக்கிய ஜனதா தளத்தின் மூத்த தலைவரும், பிகார் முதல்வருமான நிதீஷ் குமார் கூறியுள்ள நிலையில் எல்.கே. அத்வானி அதிரடியாக இப்படியொரு கருத்தை வெளியிட்டுள்ளது குறிப்பிடத்தக்கது. இது தொடர்பாக தனது வலைப்பூவில் எல்.கே. அத்வானி மேலும் கூறியுள்ளதாவது:

அடுத்த தேர்தலில் "பா.ஜ.க. மற்றும் காங்கிரஸ் கட்சியைச் சாராத ஒருவர், இவ்விரு கட்சிகளில் ஒன்றின் ஆதரவுடன் பிரதமராக சாத்தியமுள்ளது. கடந்த காலங்களில் இதுபோன்று நடந்துள்ளது.

எனினும் பா.ஜ.க. காங்கிரஸ் அல்லாத ஒருவர் பிரதமராக வந்தாலும் அவர் எத்தனை நாள் அப்பதவியில் தாக்குப் பிடிப்பார் என்பதை கணித்துச் சொல்ல முடியாது. சரண் சிங், சந்திரசேகர், தேவ கெளடா, ஐ.கே. குஜ்ரால் போன்றோர் காங்கிரஸ் ஆதரவுடன் இதற்கு முன்பு பிரதமராக இருந்துள்ளனர். பா.ஜ.க. ஆதரவுடன் வி.பி. சிங் பிரதமராக இருந் துள்ளார். ஆனால் அவர்களால் நிலையான ஆட்சியைத் தரமுடியவில்லை.

மத்தியில் காங்கிரஸ் அல்லது பா.ஜ.க. கட்சியைச் சேர்ந்தவர் பிரதமராக இருந்தால் தான் நிலையான ஆட்சி அமையும். கடந்த 25 ஆண்டு கால தேசிய அரசியல் நிகழ்வுகளால், காங்கிரஸ், பா.ஜ.க. ஆதரவு இல்லாமல் மத்தியில் ஆட்சி அமைக்க முடியாது என்ற நிலை ஏற்பட்டுள்ளது.

அந்த அடிப்படையில் 2014 ஆம் ஆண்டு மக்களவைத் தேர்தலில் மூன்றாவது அணியால் ஆட்சியைப் பிடிக்க முடியாது.

சமீபத்தில் 2 மத்திய அமைச்சர்களுடன் உரையாடியபோது அடுத்த மக்களவைத் தேர்தலில் காங்கிரஸ், பா.ஜ.க. கூட்டணி களால் பெரும்பான்மை பெற்று ஆட்சி யமைக்க முடியாது. அத்தகைய சூழ்நிலையில் மூன்றாவது அணிதான் ஆட்சியமைக்கும் என்று தோன்றுகிறது என்ற கருத்துத் தெரிவித்தனர். ஆனால், அவர்களின கருத்தில் எனக்கு உடன்பாடில்லை என்று அத்வானி குறிப்பிட்டார்.

அண்மையில் மும்பையில் பா.ஜ.க. தேசிய செயற்குழு கூட்டம் நடைபெற்ற போது கட்சியின் தலைவர் நிதின் கட்கரி யும், குஜராத் முதல்வர் நரேந்திர மோடி யும் ஒருமித்த கருத்தை வெளிப்படுத்தினர். இது அத்வானிக்குப் பிடிக்கவில்லை. பாரதிய ஜனதா கட்சிக்குள் நடக்கும் சில விவ காரங்கள் தனக்கு அதிருப்தி அளிப்பதாகக் கூறி கட்சிக்கு அத்வானி தர்மசங்கடத்தை ஏற்படுத்தினார்.

2014 பொதுத் தேர்தலில் நரேந்திர மோடியை தேசிய ஜனநாயகக் கூட்டணியின் பிரதமர் வேட்பாளராக நிறுத்தமாட்டோம் என பா.ஜ.க. உறுதியளிக்க வேண்டும் என்று பிகார் முதல்வர் நிதீஷ் குமார் கோரி வருகிறார். இது குறித்து இன்னும் எந்த முடிவும் எடுக்கப்படவில்லை என்று நிதின் கட்கரியும் பதில் கூறியிருந்தார். அத்வானிக்கும் மோடியை பிரதமர் வேட்பாளராக அறிவிப்பதில் உடன்பாடி ல்லை என்று சொல்லப்படுகிறது. இந் நிலையில் அவர் புதிய கருத்தை அதிரடி யாகத் தெரிவித்துள்ளார்.

தோல்வியை ஒப்புக்கொண்டார் அத்வானி. காங்கிரஸ், மக்களைத் தேர்தல் நடைபெறுவதற்கு முன்பே தனது கட்சி யின் தோல்வியை அத்வானி ஒப்புக் கொண்டுள்ளார் என்று காங்கிரஸ் உள்ளிட்ட கட்சிகள் கருத்துத் தெரிவித் துள்ளனர்.

இது குறித்து காங்கிரஸ் கட்சியின் செயலாளரும், நாடாளுமன்ற விவகாரங் களுக்கான மத்திய இணையமைச்சருமான ராஜீவ் சுக்லா தில்லியில் கூறியது: பா.ஜ.க. அல்லாதவர் பிரதமராக வாய்ப் புள்ளது என்று அத்வானி தெரிவித்துள்ளதன் மூலம் தேர்தல் எனும் ஓட்டப்பந்தயம் தொடங்குவதற்கு முன்பே தோல்வியை ஒப்புக்கொண்டுள்ளார் அத்வானி.

தயக்கத்துடன் போர்க்களத்தைச் சந்திக்கும் தளபதியால் எவ்வாறு போரில் வெற்றிபெற முடியும்? தேர்தலுக்கு முன்பே தோல்வியை ஒப்புக்கொண்டு விட்டால் அத்வானியை எந்த வகையான தளபதி எனக் கருதுவது" என்றார். சமாஜவாதி கட்சியின் பொதுச் செயலாளர் மோகன் சிங்கும் இதே கருத்தைத் தெரிவித்துள்ளார்.

"பா.ஜ.க.வுக்குள் நிலவும் உள்கட்சிப் பூசலே அத்வானியின் இக்கருத்துக்குக் காரணம்" என்று காங்கிரஸைச் சேர்ந்த எம்.பி. சத்யவிரத சதுர்வேதி தெரிவித்துள்ளார்.

இந்த விவகாரம் தொடர்பாக ஊகத்தின் அடிப்படையில் கருத்து எதையும் தெரி விக்க முடியாது என்று ஐக்கிய ஜனதா தளத் தலைவர் சரத் யாதவ் தெரிவித்துள்ளார்.

இதற்கிடையே பா.ஜ.க. துணைத் தலைவர் முக்தார் அப்பாஸ் நக்வி கூறு கையில், "நாடு முழுவதும் காங்கிரஸ¤க்கு எதிரான அலை வீசுகிறது. பா.ஜ.க. தலைமை யிலான தேசிய ஜனநாயகக் கூட்டணி வரும் மக்களவைத் தேர்தலில் பெரும்பான்மை யுடன் ஆட்சி அமைக்கும்" என்றார்.