ஐக்கிய தேசிய கட்சியின் சவாலை ஏற்பதற்கு தயார்

1994ஆம் ஆண்டு நடைபெற்ற ஜனாதிபதி தேர்தலின் போது ஐ.தே.க. வேட்பாளரான காமினி திஸாநாயக்க வின் தேர்தல் உபாயங்களை ஜனாதிபதி சந்திரிகா பண்டாரநாயக்க குமாரதுங்கவுக்கு வெளியிட்டது ரணில் விக்ரமசிங்க என நான் விடுத்திருந்த அறிவிப்பை இயலுமாயின் நிரூபித்துக் காட்டட்டும் என்ற ஐ.தே.க. பொதுச் செயலாளர் திஸ்ஸ அத்தநாயக்க விடுத்த சவாலை தான் ஏற்றுக்கொள்வதாக சுகாதார அமைச்சர் மைத்திரிபால சிறிசேன தெரிவித்தார். திஸ்ஸ அத்தநாயக்க விடுத்த சவாலை தகுந்த ஆதாரங்களுடன் நிரூபிக்க தான் தயாராகவுள்ளதாகத் தெரிவித்த அமைச்சர், இதனால் ஐ.தே.க.வுக்குள் ஏற்படும் பாரிய பிரச்சினைக்கு தான் பொறுப்பு இல்லை என்றும் குறிப்பிட்டார்.

ஸ்ரீலங்கா சுதந்திரக் கட்சி ஏற்பாடு செய்த விஷேட செய்தியாளர் மாநாடு கொழும்பிலுள்ள மகாவலி கேந்திரநிலையத்தில் நேற்றுக்காலை நடைபெற்றது. சிரேஷ்ட அமைச்சர் ஏ. எச். எம். பெளஸி, பிரதியமைச்சர் ரோஹித்த அபேகுணவர்த்தன ஆகியோர் கலந்துகொண்ட இந்த செய்தியாளர் மாநாட்டில் அமைச்சர் மேலும் உரை யாற்றுகையில்,

காமினி திஸாநாயக்கவின் தேர்தல் உபாயங்கள் தொடர்பாக எதிர்க்கட்சித் தலைவர் ரணில் விக்ரமசிங்க தகவல்களை வழங்கினாரென்று நான் கூறியதை அடுத்து ஐ.தே.க.வின் முக்கியஸ்தர்கள் பலர் தன்னுடன் தொலைபேசி மூலம் தொடர்புகொண்டு பல்வேறு தகவல்க ளையும் தெரிவித்தனர்.

அத்துடன் இந்த விடயம் தொடர்பாக விவாதங்களில் பங்குபற்றுமாறும் அவர்கள் என்னைக் கேட்டுக்கொண்டனர் என்றும் அமைச்சர் தெரிவித்தார்.

விடுக்கப்பட்ட சவால் தொடர்பில் விவாதம் நடக்கும்போது எங்களுக்குத் தெரிந்த பல்வேறு வகையான தகவல்க ளையும் கொண்டுவந்து வழங்க முடியும் என்றும் தெரிவித்தனர்.

அதேநேரம் நான் பொலனறு வையிலிருந்து வீட்டுக்கு வந்தபோது மேற்படி விடயங்கள் தொடர்பிலான தகவல்கள் அடங்கிய இரண்டு கடிதக் கோவைகள் கிடைத்தன. அவற்றை ஐ.தே.க. முக்கியஸ்தர்களே அனுப்பி வைத்திருந்தனர் என்றார்.

மேற்படி விடயங்கள் தொடர்பாகவும் அதனை நிரூபிக்க தேவையான எழுத்துமூல தகவல்கள் தன்னிடம் உண்டு என்று தெரிவித்த அமைச்சர், அந்த சந்தர்ப்பத்தில் கடமையில் ஈடுபட்டிருந்த பொலிஸாரிடமிருந்து கிடைக்கப்பெற்ற பல்வேறு தகவல்களும் அடங்கும் என்றார்.

இந்நிலையில், கட்சியின் ஜனாதிபதி வேட்பாளரை தோற்கடிப்பதற்கு ரணில் விக்ரமசிங்க அன்று செயற்பட்ட முறையை முழுமையாக வெளிச்சத்துக்குக் கொண்டு வந்த பின்னர் ஐ.தே.க.வுக்கு ஏற்படும் நிலைமையை பற்றி தன்னால் எதுவும் செய்ய முடியாது என்றார்.

ஐ.தே.க இந்த நாட்டு அரசியலில் இருக்க வேண்டிய ஒரு கட்சி என்பதனால் இந்தப் பிரச்சினையை குழப்பிக்கொண்டு கட்சியை அழிப்பதிலிருந்து தவிர்த்துக்கொள்ளுமாறும் ஐ.தே.க. பொதுச் செயலாளரை கேட்டுக் கொள்வதாகவும் அமைச்சர் வேண்டு கோள் விடுத்தார்.

இந்த பிரச்சினையினால் கட்சிக்கு நேரிடும் பாரதூரமான நிலையை போக்க வேண்டுமானால் மெளனமாக இருப்பதே சிறந்த வழி என்றும் அமைச்சர் சுட்டிக்காட்டினார்.

ஐ.தே.க.வின் ஜனாதிபதி வேட்பாளர் காமினி திஸாநாயக்க உட்பட அக்கட்சியின் முக்கியஸ்தர்கள் பலர் தொட்டலங்க பகுதியில் நடைபெற்ற கூட்டத்தின்போது புலிகளால் நடத்தப்பட்ட குண்டுத் தாக்குதலில் கொல்லப்பட்டனர்.

தமது ஜனாதிபதி வேட்பாளர் காமினி திஸாநாயக்க வருகைதரும்வரை காத்திருக்காமல் அதற்கு முன்னரே ரணில் விக்ரமசிங்க அங்கு உரை யாற்றிவிட்டுச் சென்றது ஏன் என்றும் அமைச்சர் அமைச்சர் மைத்திரிபால கேள்வி யெழுப்பினார்.