கிழக்குக்கு காணி அதிகாரம் வழங்குவதில் ஆட்சேபனையில்லை ஆனால் பொலிஸ் அதிகாரம் வழங்குவதை ஆட்சேபிக்கிறேன் - சிரேஷ்ட அமைச்சர் பி. தயாரத்னா மனந்திறக்கிறார்

1970களில் தேசிய அரசியலில் பிரவேசித்து தொடர்ச்சியாக 07 தடவைகள் பாராளுமன்ற உறுப்பினராக தெரிவுசெய்யப்பட்டு இன்று உணவு போஷக்குத்துறை அமைச்சராக திகழும் சிரேஷ்ட அமைச்சர் பி.தயாரத்னாவுடனான பேட்டி

கேள்வி: கிழக்கு மாகாணசபைக்கு பொலீஸ் காணி அதிகாரங்கள் வழங்குவது தொடர்பில் உங்கள் அபிப்பிராயம் என்ன?

பதில்: காணி அதிகாரம் வழங்குவதில் எனக்கு உடன்பாடுண்டு ஆனால் பொலீஸ் அதிகாரம் வழங்குவதை எதிர்கின்றேன். அதற்கு நியாயமான காரணங்களுள்ளன.

காணி அதிகாரங்கள் கிழக்குமாகாணசபைக்கு வழங்கலாம் ஆனால் அதில் நிபந்தனையும் தேவை. அதாவது மாகணத்திலுள்ள காடுகள், வனஜீவ நிலங்கள் போன்றன மத்திய அரசின் கட்டுப்பாட்டில் இருக்கவேண்டும். நான் இருவருடங்கள் அனைத்துகட்சி சம்மேளனத்தில் உறுப்பினராக இருந்தபோது காணி அதிகாரம் பரவலாக்கப்பட வேண்டுமென்று ஆலோசனை வழங்கினேன். ஆனால் பலர் எதிர்த்தனர்.

இலங்கை ஒரு சிறியநாடு. அதற்குள் பிராந்தியத்திற்கு பொலீஸ் அதிகாரிகளை வழங்குவதென்பது ஆபத்தானது. சிரேஷ்டத்துவத்தைப்பின் பற்றியே பொலீஸ் உயரதிகாரிகள் நியமிக்கப்படுகிறார்கள். பொலீஸ் அதிகாரப்பரவலாக்கம் மாகாண நிலைமையை சீரழிக்கும். உங்களுக்கே ஆபத்தாக மாறும்.

கேள்வி: அம்பாறை கரையோர மாவட்டம் பற்றி பேச்சடிபடுகிறதே அது பற்றி உங்கள் அபிப்பிராயமென்ன?

பதில்: நான் அதற்கு பரிபூரண எதிர்ப்பு. சிங்களஇனம் என்பதற்காக நான் அதனை எதிர்க்கவில்லை. மாறாக கரையோர தமிழ்ச்சமுகம் மேலும் சிறுபான்மையாகி துன்பப்பட நேரிடும் மற்றது. நீரப்பாசனம் தொடக்கம் அனைத்தும் கேள்விக் குறியாகும். பிரச்சினைகளே மிஞ்சும்.

கேள்வி: அப்படியானால் அம்பாறை மேலதிக அரச அதிபராக தமிழ்பேசும் அதிகாரியை ஏன் நியமிக்கக்கூடாது?

பதில் : இது நியாயமான கேள்வி. அதற்குநானும் உடன்பாடு.

கேள்வி : பாராளுமன்ற தெரிவுக்குழு இனப்பிரச்சினைக்கு தீர்வாகுமா?

பதில்: எந்தக்குழுவானாலும் அது தூய்மையானதாக இருக்கவேண்டும். இரு தரப்பினரும் இதயசுத்தியுடன் பேச்சுவார்த்தைக்கு வரவேண்டும். மறைகரம் அல்லது மறைநிகழ்ச்சித்திட் டத்துடன் பேசினால் தோல்வியிலே முடிவடையும். மூவினமும் ஏற்கத்தக்கதாக தீர்வு இருப்பின் மட்டுமே நிரந்தரசமாதானம் நிலைக்கும். தமிழ்க் கட்சிகளும் இதயசுத்தியுடன் ஒத்துழைக்க வேண்டும். மக்களுக்காகவே எதுவும் என்ற சிந்தனை வந்தால் தீர்வு அண்மிக்கும்.

கேள்வி: கிழக்கு மாகாணசபைத் தேர்தல் பற்றிக் கூறுங்கள்.

பதில்: மட்டு, திருமலையைப்பற்றி நான் என்றும் கூற விரும்ப வில்லை. ஆனால் அம்பாறை மாவட்டத்தில் ஐக்கியமக்கள் சுதந்திரமுன்னணி நிச்சயம் வெற்றிபெறும். தமிழ், முஸ்லிம் மக்களிடையே செல்வாக்குப் பெற்ற தமிழ் தேசியக்கூட்டமைப்பு, ஸ்ரீ லங்கா முஸ்லிம் காங்கிரஸ் தேர்தலில் நிற்கிறது. அதேவேளை அந்தவாக்குகள் இரண்டாக மூன்றாக பிரிபடவும் வாய்ப்புள்ளது. ஐ.ம.சு. முன்னணியே வெற்றிகொள்ளும்.

கேள்வி: கல்முனை (தமிழ்) பிரதேசசெயலகம் வழங்குவதிற்கு நீங்கள் உடன்பாடென்று கூறப்படுகின்றதே! அப்படியானால் அது இழுத்தடிக்கப்படுவது ஏன்?

பதில்: நிச்சயமாக கல்முனை பிரதேசசெயலகம் வழங்குவதில் எனக்குப் பூரண உடன்பாடுண்டு 17 கிராம சேவை பிரிவுகளுள்ள ஊருக்கு ஒரு பிரதேசசெயலகம், 11 கிராமசேவை பிரிவுகளுள்ள இறக்கா மத்திற்கு ஒரு பிரதேச செயலகம் என்றால் 29 கிராம சேவை பிரிவுகளுள்ள கல்முனை (தமிழ்) பிரதேசத்திற்கு ஏன் தனியான செய லகம் வழங்க முடியாது? தாரானமாக வழங்கமுடியும். ஆனால் சில அரசியல்வாதிகளின் எதிர்ப்புகாரணமாக இழுபடுகிறது.

கேள்வி: இன்றைய பிரச்சினைக்குக் காரணம் என்ன?

பதில்: உண்மையில் கூறப்போனால் வறுமைதான் பிரதான காரணம். அடுத்தது மொழி.

சிங்களவர் சிங்களத்தில் பேசுவது தமிழருக்கு விளங்குவதில்லை. மாறாக சிங்களவருக்கு தமிழ் விளங்குவதில்லை அந்த இடத்தில் சந்தேகம், ஐயம் ஆரம்பமாகிறது. சிங்களவர் பலர் நாம்தான் இலங்கைக்குச் சொந்தக்காரர்கள் நாம் தான் ஆளவேண்டும். நாம்தான் பெரியவர்கள் என நினைக்கின்றனர்.

தமிழர்பலர் நாம் பூர்வீகமாக பாரம்பரியமாக வாழும் தமிழர் இனம் என்று நினைக்கிறனர். இதன்காரணமாக ஒரு இனத்தை மற்றொரு இனம் விரோதமாக பார்க்கும் வறுமையால் தான் ஒருவர் மீது ஒருவர் பொறாமை கொள்வதும், களவுகள், லஞ்சம் அதிகரிப்பதும் வெளிநாடுகள் போல அனைவருக்கும் போதுமான நிதி, வசதிகள் இருந்தால் பிரச்சினையே இல்லை.

கேள்வி: அழிந்த வட-கிழக்கு அரசாங்கம் செய்யும் சேவை பற்றிக் கூறுங்கள்?

பதில்: கடந்த 30 வருடங்களை அவர்கள் உயிரைத் தவிர எவற்றை இழந்தார்களோ அவற்றையெல்லாம் படிப்படியாக வழங்கி வருகிறது. நாட்டின் ஏனையபகுதிகளைப் போல் வட-கிழக்கையும் பாரிய அபிவிருத்தி செய்து வருகிறது. நாட்டின் சகல பிரதேசங்களையும் ஒரே மட்டத்தில் கொண்டுவர முயற்சிக்கின்றது.

வி.ரி.சகாதேவராஜா