எகிப்தெங்கும் ஆர்ப்பாட்டம்; வன்முறை வெடிப்பு; 100 க்கும் அதிகமானவர்கள் பலி

எகிப்து தலைநகர் கெய்ரோவில் உள்ள பதவி கவிழ்க்கப்பட்ட ஜனாதிபதி மொஹமட் முர்சிக்கு ஆதரவான ஆர்ப்பாட்ட முகாம்களை பாரிய உயிர்ச் சேதத்திற்கு பின் பாதுகாப்பு படையினர் அகற்றியுள்ளனர். கெய்ரோவின் ரபா அல் அதவியா பள்ளிவாசலுக்கு முன்னால் இருந்த ஆர்ப்பாட்ட முகாம் மற்றும் கிஸாவின் நஹ்தா சதுக்க ஆர்ப்பாட்ட முகாம்களையே பாதுகாப்பு படை நேற்று அகற்றியது. இதில் 40 க்கும் அதிகமானவர்கள் கொல்லப்பட்டதாக செய்திகள் கூறியபோதும் 200 க்கும் அதிகமானவர்கள் பலியானதாக முஸ்லிம் சகோதரத்துவ அமைப்பு குறிப்பிட்டுள்ளது. இராணுவ நடவடிக்கையின்போது 200 பேரளவில் கைது செய்யப்பட்டதாக உள்துறை அமைச்சு குறிப்பிட்டுள்ளது. இதில் ரபா அல் அதவியாவில் 50 பேரளவும் நஹ்தா சதுக்கத்தில் 150 பேரளவும் கைது செய்யப்பட்டுள்ளனர்.

ஆயிரக்கணக்கான முர்சி ஆதரவாளர்கள் கூடியிருந்த நஹ்தா சதுக்கத்திற்கு மேலால் புகை மூட்டம் எழுந்திருக்கும் காட்சியை நேற்றுக் காலை எகிப்து தொலைக்காட்சி நேரடியாக ஒளிபரப்பியது. பின்னர் கண்ணீர் புகை, இரப்பர் குண்டுகளை பயன்படுத்தி ஆர்ப்பாட்டக்காரர்கள் முழுமையாக அகற்றப்பட்டதாக அரச தரப்பு கூறியது. இராணுவம் புல்டோசர்களை பயன்படுத்தி முகாமை முழுமையாக அகற்றியுள்ளது.

இந்த வன்முறையில் 2000 க்கும் அதிகமானவர்கள் காயமடைந்திருப்பதாக முஸ்லிம் சகோதரத்துவ அமைப்பு குறிப்பிட்டுள்ளது. ஆனால் இந்த தகவலை சுயாதீனமாக உறுதி செய்ய முடியவில்லை என சர்வதேச ஊடகங்கள் குறிப்பிட்டுள்ளன.

எனினும் சுகாதார அமைச்சின் தகவலின்படி குறைந்தது 7 பேரே கொல்லப்பட்டிருப்பதாக குறிப்பிடப்பட்டுள்ளது. இதில் மூன்று பாதுகாப்பு படையினர் உட்படுவதாகவும் 78 பேர் காயமடைந்திருப்பதாகவும் குறிப்பிட்டுள்ளது. முர்சி ஆதரவாளர்களின் நடமாடும் மருத்துவமனை வட்டாரம் வழங்கிய தகவலின்படி குறைந்தது 120 பேர் கொல்லப்பட்டிருப்பதாக குறிப்பிடப்பட்டுள்ளது.

இதனிடையே முஸ்லிம் சகோதரத்துவ அமைப்பின் பல தலைவர்களும் நேற்றைய பாதுகாப்பு படையினரின் நடவடிக்கையின் போது கைது செய்யப்பட்டதாக அரச தரப்பு குறிப்பிட்டுள்ளது. “நாம் முஸ்லிம் சகோதரத்துவ தலைவர்கள் பலரை கைது செய்திருக்கிறோம்.

எனினும் இப்போது அவர்களது பெயர்களை வெளியிடுவது மிக விரைவானது” என உள்துறை அமைச்சின் சிரேஷ்ட அதிகாரி ஜெனரல் அப்தல் பத்தாஹ் ஒத்மான் உள்நாட்டு தொலைக்காட்சி ஒன்றுக்கு கூறியதாக ராய்ட்டர் செய்தி வெளியிட்டுள்ளது.

ரபா அல் அதவியா, நஹ்தா சதுக்கங்களை அகற்றும் நடவடிக்கை ஆரம்பிக்கப்பட்டவுடனேயே கெய்ரோவுக்கான இரயில் மற்றும் பஸ் போக்குவரத்துகள் முடக்கப்பட்டன. ஆர்ப்பாட்டக்காரர்களின் நடமாட்டத்தை தடுக்க இந்த நடவடிக்கை எடுக்கப்பட்டதாக அரச தரப்பு குறிப்பிட்டுள்ளது.

எவ்வாறாயினும் முஸ்லிம் சகோதரத்துவ அமைப்பு நேற்று நாடெங்கும் ஆர்ப்பாட்டங்களை நடத்தியது. ரபா அல் அதவியாவுக்கான பிரதான பாதையான வீதியில் ஆயிரக்கணக்கான முர்சி ஆதரவாளர்கள் ஒன்று திரண்டனர். எனினும் இவர்கள் பிரதான ஆர்ப்பாட்ட முகாமுக்குள் நுழையாமல் இருக்க பொலிஸ் காவல் பலப்படுத்தப்பட்டிருந்தது. இந்த ஆர்ப்பாட்டக்காரர்கள் மீது பொலிஸார் கண்ணீர் புகைப் பிரயோகமும் மேற்கொண்டனர்.

எனினும் பல பகுதிகளில் இருந்தும் பேரணி நடத்தி பாதுகாப்பு தரப்பினரை குழப்பி வருவதாக முர்சி ஆதரவு ஆர்ப்பாட்டக்காரர் தமர் அல் நஷார் பி. பி. சி. உலக சேவைக்கு தெரிவித்துள்ளார். “நாம் பல பகுதிகளில் இருந்து பேரணிகளை ஆரம்பித்து பல பகுதிகளில் இருந்து பாரிய மக்களை ஒன்று திரட்ட ஏற்பாடு செய்திருக்கிறோம். இது ரபா அல் அதவியாவை தாக்கிய பொலிஸ் மற்றும் இராணுவத்திற்கு குழப்பத்தை ஏற்படுத்தும்” என்றார்.

இது தவிர அலக்சான்ட்ரியா நகரின் பிரதான வீதியை முடக்கி முர்சி ஆதரவாளர்கள் ஆர்ப்பாட்டத்தில் ஈடுபட்டுள்ளதோடு சுயேஸ், அஸ்ஸியூட் என நாடெங்கிலுமுள்ள பல நகரங்களிலும் ஆர்ப்பாட்டங்கள் வெடித்துள்ளன. இதில் முர்சி ஆதரவாளர்கள் பல அரச அலுவலகங்களை தாக்கி இருப்பதாகவும், பல பொலிஸ் வானங்களை தீக்கிரையாக்கியதாகவும் உள்துறை அமைச்சு குறிப்பிட்டுள்ளது.

இது குறித்து அலக்சான்ட்ரியா நகரைச் சேர்ந்த அஹ்மத் பதி பி. பி. சி.க்கு வெளியிட்ட தகவலில், “இங்கு நடப்பது நாம் நினைப்பதை விடவும் பாரதூரமாக உள்ளது. அலக்சான்ட்ரியாவுக்கான மூன்று பிரதான பாதைகளையும் அவர்கள் முடக்கியுள்ளனர். ஒரு சில கார்கள் தீக்கிரையாக்கப்பட்டுள்ளன.

ஆர்ப்பாட்டக்காரர்கள் அலக்சான்ட்ரியாவுக்கு அனைத்து பக்கங்களில் இருந்தும் வருகிறார்கள். இவர்கள் முர்சிக்கு ஆதரவாகவும் கெய்ரோவில் நடந்ததற்கு கண்டனம் வெளியிட்டும் வருகிறார்கள்” என்று குறிப்பிட்டுள்ளார். இதனிடையே எகிப்தின் சிறுபான்மை மக்களான கொப்டிக் கிறிஸ்தவர்களின் பல தேவாலயங்களும் தாக்கப்பட்டிருப்பதாக அங்கிருந்து வரும் செய்திகள் தெரிவிக்கின்றன.

இதேவேளை எகிப்து பாதுகாப்பு படையினரின் நடவடிக்கைக்கு சர்வதேச அளவிலும் கண்டனங்கள் வெளியாகியுள்ளன. ஆர்ப்பாட்டக்காரர்கள் மீத படைகளை ஏவிவிட்டதற்கு கட்டார் கடும் கண்டனத்தை வெளியிட்டுள்ளது. இதனை ஒரு படுகொலையாக விபரித்து ஈரானும் கண்டனம் வெளியிட்டுள்ளது. எகிப்து படுகொலைக்கு சர்வதேச சமூகம் உடன் நடவடிக்கை எடுக்க வேண்டும் என துருக்கி வலியுறுத்தியுள்ளது.

அதேபோன்று உயிர் பலிகள் குறித்து கடும் கவலையை வெளியிட்டிருக்கும் ஐரோப்பிய ஒன்றியம் அனைத்து தரப்பையும் அமைதி காக்கும்படி கேட்டுள்ளது. எகிப்தின் முன்னணி இஸ்லாமிய நிறுவனமான அல் அஸ்ஹர் இரத்தம் சிந்தப்பட்டது மற்றும் படையினர் பயன்படுத்தப்பட்டதற்கு கண்டனத்தை வெளியிட்டுள்ளது. அல் அஸ்ஹர் தலைமை இமாம் ஷெய்க் அஹ்மட் அல் தய்யிப் எகிப்து வானொலியில் வெளியிட்ட அறிவிப்பில், “வன்முறைகள் பேச்சுவார்த்தைக்கு மாற்றாக அமையாது. அனைத்து தரப்பும் சுய கட்டுப்பாட்டை கடை பிடிக்க வேண்டும்” என்றார்.

இராணுவ சதிப்புரட்சி மூலம் பதவி கவிழ்க்கப்பட்ட ஜனாதிபதி மொஹமட் முர்சியை மீண்டும் பதவியில் அமர்த்துமாறு கோரியே முஸ்லிம் சகோதரத்துவ அமைப்பு உட்பட முர்சி ஆதரவாளர்கள் ஒரு மாதத்திற்கு மேலாக ஆர்ப்பாட்டத்தில் ஈடுபட்டு வருகின்றனர்.

இந்த பதற்றத்தை தணிக்கும் சர்வதேச நாடுகளின் இராஜதந்திர முயற்சிகளும் வெற்றியளிக்கவில்லை. ஏற்கனவே இடம் பெற்ற வன்முறைகளில் 250 க்கும் அதிகமானவர்கள் கொல்லப் பட்டுள்ளனர். அதிலும் முர்சி ஆதரவாளர்களே அதிகம் பேர் பலியாகியுள்ளனர்.