இலங்கை மீதான ஐ.நா விசாரணை ஆரம்பம்

இலங்கையில் இடம்பெற்றதாகக் கூறப்படும் போர்க்குற்றச்சாட்டுக்கள் மற்றும் மனித உரிமை மீறல்கள் தொடர்பில், ஐக்கிய நாடுகள் மனித உரிமைகள் ஆணையாளர் அலுவலகம் நியமித்த ஆணைக்குழு, தனது விசாரணையை ஆரம்பித்துள்ளது. இந்த விசாரணைக் குழுவிடம் சமர்ப்பிப்பதற்காக தகவல் மற்றும் ஆதாரங்கள் வைத்திருப்பவர்கள், எதிர்வரும் ஒக்டோபர் மாதம் 30ஆம் திகதிக்கு முன்னர் அவற்றை சமர்ப்பிக்க வேண்டும் என்று ஐ.நா மனித உரிமைகள் ஆணைக்குழு கேட்டுக்கொண்டுள்ளது.

இது தொடர்பாக மனித உரிமைகள் ஆணையகம் வெளியிட்டுள்ள அறிக்கையில் மேலும் தெரிவிக்கப்பட்டுள்ளதாவது,

விசாரணை நியதிகள்

பணிப்பாணை மற்றும் அறிக்கைப்படுத்தல் கடப்பாடுகள்  இலங்கையில் நல்லிணக்கம், பொறுப்புக்கூறல் மற்றும் மனித உரிமைகளை மேம்படுத்தல் என்பது தொடர்பாக மார்ச் 2014இல் நிறைவேற்றப்பட்ட A/HRC/25/1  இலக்க பிரேரணையில், நல்லிணக்க ஆணைக்குழு கருத்திலெடுத்த காலத்தில் இரண்டு தரப்பினரும் மேற்கொண்டதாக கூறப்படும் கடும் மனித உரிமை மீறல்கள், துஷ்பிரயோகங்கள் பற்றி முழுமையான விசாரணை ஒன்றை மேற்கொள்ளுமாறு ஐ.நா. மனித உரிமை பேரவை, ஐக்கிய நாடுகள் மனித உரிமை ஆணையாளரை கேட்டிருந்தது.

இவ்வாறான குற்றங்கள், அவை நடந்ததாக கூறப்படும் சூழ்நிலை என்பவற்றை உறுதி செய்யுமாறும் குற்றமிழைத்தவர்கள் தண்டனையிலிருந்து தப்பாது இருப்பதையும் தொடர்புள்ள நிபுணர்கள் மற்றும் அதிகாரமளிக்கப்பட்டவர்களின் உதவியுடன் உறுதி செய்யுமாறு அவரிடம் கேட்கப்பட்டுள்ளது.

மனித உரிமைகள் பேரவை அதன் 27ஆவது அமர்வின்போது ஒரு வாய்மொழி இற்றைப்படுத்தலை செய்யுமாறும் 28ஆவது அமர்வில் விசாரணை பற்றிய முழுமையான அறிக்கையை சமர்ப்பிக்குமாறும் மனித உரிமைகள் ஆணையாளரை கேட்டது.

இந்த பணிப்பாணைக்கு அமைய ஐக்கிய நாடுகள் மனித உரிமைகள் ஆணையாளர் அலுவலகத்தால் இலங்கை மீது ஜெனீவாவை தளமாக கொண்ட விசாரணை நிர்ணயிக்கப்பட்டுள்ளது.

கால எல்லை

நல்லிணக்க ஆணைக்குழு செயற்பட்ட காலம் அதாவது பெப்ரவரி 21, 2002 முதல் நவம்பர் 15, 2011 வரையான காலப்பகுதியையே ஐ.நா.விசாரணையும் கவனிக்கும். சில சமயம் தேவையை பொறுத்து இந்த கால எல்லைக்கு அப்பாலும் சில விடயங்களை விசாணைக்குழு கருத்தில் எடுக்கும்.

சட்ட வேலைச் சட்டகம்

இந்த விசாரணையின் பணிப்பாணை, யுத்தத்தில் பங்குபற்றிய இரண்டு தரப்பினராலும் மேற்கொள்ளப்பட்ட மனித உரிமை மீறல்கள் தொடர்பான குற்றச்செயல்களை விசாரிப்பதாகும்..

இலங்கை சர்வதேச மனித உரிமைகள் ஒப்பந்தங்களில் மூலம் ஒப்புக்கொண்ட கடப்பாடுகளும் வழமையான சர்வதேச சட்டங்களும் இந்த விசாரணைக்கு அடிப்படையாக அமையும்.

அரசல்லாத குழு அல்லது ஸ்தாபனம் மனித உரிமைகள் ஒப்பந்தத்தில் முறைமையான ஒரு தரப்பினராக முடியாது. எனினும் ஒரு நாட்டின் ஒரு பகுதி மீது உண்மை அதிகாரம் செலுத்தும் அரசல்லாத ஸ்தாபனங்களும் அமைப்புகளும் தமது கட்டுப்பாட்டுப் பகுதியில் மனித உரிமைகள் கடப்பாடுகளை மதிக்க வேண்டும் என்பது இப்போது பரவலாக ஏற்கப்படுகின்றது.

நல்லிணக்க ஆணைக்குழு கடைப்பிடித்த சட்ட வேலை சட்டகத்தையே ஐ.நா. விசாரணையும் கடைபிடிக்கும்.

நிபுணர்கள்

பின்லாந்தின் முன்னாள் ஜனாதிபதி மாட்டி அற்றிசாரி, நியூசிலாந்து மேல்நீதிமன்ற நீதிபதி சில்வியா காட்ரைட், பாகிஸ்தானின் முன்னாள் மனித உரிமைகள் ஆணையாளர் அஸ்மா ஜஹன்கீர் ஆகிய மூன்று நிபுணர்களையும் மனித உரிமைகள் ஆணையாளர், கடந்த 2013 ஜூன் மாதத்தில் நியமித்தார்.

தேவைக்கேற்ப சட்டத்துக்கு அப்பாலான கொலைகள், காணாமல்போனமை, உள்நாட்டில் இடம்பெயர்ந்தோர், எதேச்சதிகாரமான தடுத்து வைத்தல்கள், பெண்களுக்கு எதிரான வன்முறை, சித்திரவதை என்பவை அடங்கலான பல்வேறு விடயங்களில் விசேடமான குறிப்பான பணிப்பானை உடையவர்களின் உதவியையும் இந்த விசாரணை பெற்றுகொள்ளும்.

தொழிற்படும் முறைகள்

இலங்கை மீதான ஐ.நா.வின் இந்த விசாரணை, தற்போதுள்ள ஆவணங்களின் பரிசீலனை, அரச, சிவில் சமூக அறிக்கைகள், பாதிக்கப்பட்டவர்களின் சாட்சியங்களை பெறுதலும் ஆவணப்படுத்தலும், உயிர் தப்பியோரின் சாட்சியங்களின் மற்றும் குற்றமிழைத்தவர்கள் என கூறப்படுவோரின் கதைகள், செய்மதிப் படங்கள் உண்மையானதாக நிறுவப்பட்ட வீடியோ, புகைப்படங்கள் மற்றும் உத்தியோகபூர்வ ஆவணங்கள் என்பவற்றை பயன்படுத்தும்.

இலங்கை அரசாங்கத்துடன் தொடர்பை பேணும் உயர்ஸ்தானிகர் இந்த விசாரணைக்காக இலங்கைக்கு வந்து உத்தியோகத்தர்களையும் ஏனையோரையும் சந்திப்பதற்கு வசதி செய்யுமாறு  இலங்கை அரங்சாங்கத்தை இந்த விசாரணை தொடர்ந்தும் கேட்கும்.

இந்த ஐ.நா.  விசாரணையானது ஐ.நாவின் வேறு நிறுவனங்களுடனும் விசேட முகவர்களுடனும் அக்கறையுள்ள நிறுவனங்களுடனும் அரச சார்பற்ற நிறுவனங்களுடனும் தொடர்பிலிருக்கும்.

இவ்விசாரணைக்கு தகவல் வழங்குவதற்கான விலாசம் oislsubmission@ohchr.org எனும் மின்னஞ்சல் முகவரியாகும்.  இந்த விசாரணை சுதந்திரம், நடுநிலைமை, புறவயத்தன்மை, வெளிப்படைத்தன்மை, நேர்மை தீங்கு செய்யாமல் ஆகிய கோட்பாடுகள் வழிப்படுத்தும்.

சாட்சியங்களை பாதுகாத்தல்

சாட்சியமளிப்போர், பாதிக்கப்பட்டோர் பாதுகாப்பு தொடர்பாக பொருத்தமான நடவடிக்கைகள் எடுக்கப்படும். சாட்சியங்கள், பாதிக்கப்பட்டவர்களை பாதுகாப்பதில் இலங்கை அரசாங்கத்துக்கும் கடப்பாடு உண்டு.

இரகசிய காப்பு

வழங்கப்பட்ட தகவல்களையும், தனிப்பட்டோர் பெயர்களையும் பாதுகாப்பதற்கு தேவையான நடவடிக்கைகளை இந்த விசாரணையமைப்பு மேற்கொள்ளும். இதன் வேலை முடியும் போது விசாரணை அமைப்பு நியாயமான ஐ.நா முறைக்கு அமைய சகல ஆவணங்களையும் இரகசியமாக ஆவணப்படுத்தும்.