நவாஸ் ஷெரீப் அரசுக்கு நெருக்கடி முற்றுகிறது: பேச்சுவார்த்தைக்கு இம்ரான் கட்சி மறுப்பு!

பாகிஸ்தான் பிரதமர் நவாஸ் ஷெரீப் பதவி விலகக் கோரி, இம்ரான் கான் கட்சியினர் நடத்தி வரும் நாடாளுமன்ற முற்றுகை போராட்டம் மேலும் தீவிரமடைந்துள்ள நிலையில், பேச்சுவார்த்தைக்கு வருமாறு நவாஸ் விடுத்த அழைப்பை ஏற்க இம்ரான் கட்சி மறுத்துள்ளது. பிரதமர் நாவஸ் ஷெரீப் கடந்த தேர்தலில் பல்வேறு முறைகேடுகளை செய்து ஆட்சியைப் பிடித்துள்ளார். எனவே, நாடாளுமன்றத்தை கலைத்துவிட்டு மறுதேர்தல் நடத்த வேண்டும் என்பன உள்பட 14 அம்ச கோரிக்கைகளை முன்வைத்து, அந்நாட்டு எதிர்க்கட்சி தலைவரான இம்ரான்கான் மற்றும் பழமைவாத தலைவர் தாஹிர் உல் காத்ரி ஆகியோர் போராட்டம் நடத்தி வருகின்றனர்.

இந்நிலையில், நேற்று (19ஆம் தேதி) நள்ளிரவில் இம்ரான் கட்சியைச் சேர்ந்த 10 ஆயிரத்திற்கும் மேற்பட்டோர் முகமூடி அணிந்து கொண்டு இம்ரான் கான் தலைமையில் பிரம்மாண்ட பேரணி நடத்தினர். பேரணியில் கலந்து கொண்டவர்கள், முட்கம்பிகளையும், கண்டெய்னர்களை பூட்ட பயன்படுத்தும் மிகப்பெரிய பூட்டுகளையும் தங்கள் கைகளில் கொண்டு வந்தனர். மேலும், கண்டெய்னர்களை அகற்ற பயன்படும் கிரேன்களையும் அவர்கள் கொண்டு வந்தனர்.

இதைத் தொடர்ந்து, பேரணியில் கலந்து கொண்டவர்கள் அந்நாட்டு நாடாளுமன்றத்தை முற்றுகையிட்டு போராட்டம் நடத்தினர். இதையடுத்து அங்கு ராணுவம் குவிக்கப்பட்டது.

நாடாளுமன்றத்திற்கு வெளியே போராட்டக்காரர்கள் குவிந்ததையடுத்து, ராணுவத்தினர் அப்பகுதியை தங்கள் கட்டுக்குள் கொண்டுவந்துள்ளனர். இருப்பினும் போராட்டக்காரர்கள் இன்றும் அணி அணியாக திரண்டுவந்ததால் இஸ்லாமாபாத்தில் பதற்றம் நிலவுகிறது.

இந்நிலையில் நாடாளுமன்றத்திற்குள் யாரையும் உள்ளே செல்லவோ அல்லது உள்ளிருந்து வெளியே செல்லவோ அனுமதிக்காதீர்கள் என பழமைவாத தலைவர் தாஹிர் உல் காத்ரி தமது ஆதரவாளர்களை கேட்டுக்கொண்டார்.

இதனிடையே இந்த நாடாளுமன்ற முற்றுகையை தொடர்ந்து இம்ரான் மற்றும் உல் காத்ரி ஆகிய இருவரையும் நேரில் ஆஜராகுமாறு பாகிஸ்தான் உச்ச நீதிமன்றம் இன்று உத்தரவிட்டது.

இத்தகைய பரபரப்பான சூழ்நிலைக்கு இடையே பேச்சுவார்த்தைக்கு வருமாறு இம்ரான் கான் கட்சிக்கு பிரதமர் நவாஸ் ஷெரீப் அழைப்பு விடுத்தார். ஆனால் அதனை ஏற்கமறுத்துவிட்ட இம்ரான் கட்சி, நவாஸ் ராஜினாமா செய்ய வேண்டும் என்பதில் தாங்கள் உறுதியாக உள்ளதாக தெரிவித்துள்ளது.

இதனால் நவாஸ் ஷெரீப் அரசுக்கு நெருக்கடி முற்றியுள்ளது. இந்நிலையில் நடக்கும் நிகழ்வுகளை உன்னிப்பாக கவனித்து வரும் பாகிஸ்தான் ராணுவம், கடந்த காலங்களைப் போன்று ஆட்சியை கைப்பற்றிவிடுமோ என்ற அச்சமும் அந்நாட்டு அரசியல் தலைவர்கள் மத்தியில் எழுந்துள்ளது.


இந்த போராட்டம் குறித்து பிரதமர் நவாஸ் ஷெரீப் கூறுகையில், அவர்களை பேச்சுவார்த்தைக்கு வருமாறு அழைத்துள்ளேன். இதற்காக நான் பதவி விலகுவது என்ற பேச்சுக்கே இடமில்லை என்றார்.