ஐ.தே.க - சு.க ஒப்பந்தம்

ஐக்கிய தேசியக் கட்சியும் ஸ்ரீலங்கா சுதந்திரக் கட்சியும் இணைந்து தேசிய அரசாங்கமொன்றை அமைத்து இரு வருடங்க ளாக ஒன்றாக செயற் படுவதற்கான புரிந்துணர்வு ஒப்பந்தம் நேற்று ஜனாதிபதி செயலகத்தில் கைச்சாத்திடப்பட்டது. இந்த ஒப்பந்தத்தில் ஐ. தே. க. சார்பில் கட்சி செயலாளர் கபீர் ஹாசிமும் ஸ்ரீலங்கா சுதந்திரக் கட்சி சார்பில் கட்சி பதில் செயலாளர் துமிந்த திசாநாயக்கவும் கைச்சாத்திட்டனர். பொருளாதார முன்னேற்றம், சுதந்திரத்தை உறுதிசெய்தல், சுயாதீன ஆணைக்குழுக்களை ஸ்தாபித்தல், மோசடியை ஒழித்தல், கல்வி மற்றும் சுகாதார மேம்பாடு, வெளிநாட்டு உறவு, பெண்கள்மற்றும் சிறுவர் உரிமை, கலை, கலாசாரத்தை மேம்படுத்தல் அடங்கலான 10 அம்சங்கள் இதில் உள்ளடக்கப் பட்டுள்ளது.

அரசியலமைப்பை திருத்துவதற்காக பாராளுமன்றத்தை அரசியலமைப்பு சபையாக மாற்றுவதற்கும் ஜனாதிபதியின் அதிகாரங்களை மேலும் குறைத்து பாராளுமன்றத்தை பலப்படுத்தவும் கலப்பு தேர்தல் முறையொன்றை அறிமுகப்படுத்தவும் இரு கட்சிகளும் இணங்கியுள்ளன.

இரண்டு வருட காலத்துக்கு அமுலா கும் வகையிலான இரு தரப்பு புரிந்து ணர்வு ஒப்பந்தத்தின் பிரகாரம் இரு கட்சி மக்கள் பிரதிநிதிகளுக்கும் கட்சி மாறுவதற்கு இடமளிக்காதிருக்கவும் உடன்பாடு காணப்பட்டுடுளது. தேவை ஏற்பட்டால் இரண்டு வருட கால ஒப் பந்தத்தை இரு தரப்பினரின் இணக் கப்பாட்டுடன் நீடிக்கவும் ஐ. தே. க., ஐ. ம. சு. மு. ஒப்பந்தத்தில் அனுமதி வழங்கப்பட்டுள்ளது.

நடந்து முடிந்த பொதுத் தேர்தலில் எந்தக் கட்சிக்கும் பெரும்பான்மை பலம் கிடைக்காத நிலையில் தேசிய அரசாங்க மொன்றை அமைப்பது தொடர்பாக பிரதமருக்கும் ஜனாதிபதிக்குமிடையில் தேர்தலுக்கு மறுநாள் பேச்சு நடத்தப் பட்டது.

இங்கு ஏற்பட்ட இணக்கப்பாட்டை யடுத்து தேசிய அரசாங்கம் அமைப்பது தொடர்பாக ஜனாதிபதி மைத்திரிபால சிறிசேன சுதந்திரக் கட்சி மத்திய குழு வுக்கு யோசனை ஒன்றை முன்வைத்தார். இதற்கு மத்திய குழு அனுமதி வழங் கியிருந்தது.

இந்த நிலையில் புதிய பிரதமராக ரணில் விக்கிரமசிங்க பதவி ஏற்கும் நிகழ்வு நேற்று ஜனாதிபதி தலைமையில் ஜனாதிபதி செயலகத்தில் நடைபெற்ற போது இரு தரப்பினருக்குமிடையிலான புரிந்துணர்வு ஒப்பந்தமும் கைச்சாத்திடப்பட்டது. இதன்படி இன்னும் சில தினங்களில் இரு தரப்பு அமைச்சர்களும் பதவி ஏற்க உள்ளதாக அறிய வருகிறது.

புரிந்துணர்வு ஒப்பந்தம்

நேற்று கையெழுத்திடப்பட்ட புரிந்துணர்வு ஒப்பந்தத்திலுள்ள அம்சங்கள் பின்வருமாறு,

மைத்திரி ஆட்சிக்காக பலமானதும் ஸ்திரமானதுமான அரசாங்கத்தினூடாக மக்களின் பிரச்சினைகளுக்கு தீர்வு வழங்கவும் நாட்டை முன்னேற்றுவதற்காக பாராளுமன்றத்தில் இணைந்து செயற்படுத்தவும் என இரு தரப்பும் இந்த புரிந்துணர்வு உடன்படிக்கையில் கைச்சாத்திடுகின்றன.

பொருளாதார முன்னேற்றம்

விலைக் கட்டுப்பாடு, பாவனையாளர் பாதுகாப்பு ஊடாக மக்களுக்கு நிவாரணம் வழங்குதல்.

தொழிலற்றவர்களின் நலன் குறித்து கவனம் செலுத்துதல்

10 ஆயிரம் தொழில் வாய்ப்புக்களை உருவாக்குதல் மற்றும் வருமானத்தை உயர்த்த நிரந்தர வேலைத்திட்டம் தயாரித்தல்.

சுதந்திரத்தை உறுதிப்படுத்தல்

நாட்டின் ஜனநாயகத்தை உறுதிப் படுத்துவதற்காக நாட்டினுள் நியாய மானதும் நேர்மையானதுமான ஆட் சியை முன்னெடுப்பதற்காகவும் சட்டம் ஒழுங்கை சமமாக செயற்படுத்தவும் நல்லாட்சி அம்சங்களை தொடர்ந்து மேற்கொள்ளுதல்.

19 ஆவது திருத்தத்திற்கு அமைய சுயாதீன ஆணைக் குழுக்களை ஸ்தாபித்தல்

பிரதேச பிரதிநிதித்துவத்தை பலப்படுத்தி பிரதேச ஏற்றத்தாழ்வை ஒழிப்பதற்காகவும் துரித பொருளாதார அபிவிருத்தியை ஏற்படுத்தவும் சகல இனத்தவர்களினதும் உரிமைகளை பாதுகாக்கவும் இலங்கையின் தனித்துவத்தை உறுதிப்படுத்தவும் இன மத நல்லிணக்கத்தை ஏற்படுத்தவும் ஒவ்வொரு இனக் குழுவினதும் பல்லினத் தன்மையை பாதுகாக்கவும் ஜனநாயகம் மற்றும் மனித உரிமை என்பனவற்றை பாதுகாப்பதற்காகவும் என புதிய அரசியலமைப்பொன்றை உருவாக்குதல். அதற்காக பாராளுமன்றத்தை அரசியலமைப்பு சபையாக மாற்றுதல்

இந்த அரசியலமைப்பிற்கு தற்பொழுது காணப்படும் பாராளுமன்ற செயற்குழு முறைக்கு மேலதிகமாக கண்காணிப்பு குழுக்கள் மாவட்ட அபிவிருத்தி சபை அடங்கலான பாராளுமன்றத்திலுள்ள சகல கட்சிகளும் ஆட்சியில் பங்கேற்கும் வகையில் இணக்கப்பாட்டு அரசியல் பொறிமுறையொன்றை ஸ்தாபித்தல்.

சகல எம்.பிக்களுக்கும் கட்சி பேதமின்றி நிதி ஒதுக்கீடு வழங்குதல்.

19ஆவது அரசியலமைப்பினூடாக மட்டுப்படுத்தப்பட்ட நிறைவேற்று அதிகார ஜனாதிபதி முறையை திருத்தி பாராளுமன்றத்தை பலப்படுத்துதல்.

விருப்பு வாக்கு முறையை ஒழித்து சகல தேர்தல் தொகுதியிலிருந்தும் உறுப்பினர் ஒருவர் தெரிவாகும் வகையி லும் சகல இன பிரிவு அரசியல் நிலைப் பாடுகளுக்கு உகந்த பிரதிநிதித்துவம் கிடைக்கும் வகையில் தொகுதிவாரி மற்றும் விகிதாசார முறை இணைந்த கலப்பு தேர்தல் முறையொன்றை அறிமுகப்படுத்துதல்.

மோசடியை ஒழித்தல்

மோசடியை ஒழிக்க நீண்ட மற்றும் குறுங்கால நிரந்தர வழிவகைகளை அமைத்தல். மற்றும் மோசடிகளை ஒழிக்க சுயாதீன ஆணைக்குழுவொன்றை ஸ்தாபித்தல் தேசிய கணக்காய்வு சட்டம் மற்றும் தகவலறியும் சட்டம் என்பவற்றை நிறைவேற்றுவதோடு தற்பொழுதுள்ள நிதிக் குற்றச்சாட்டு, லஞ்ச ஊழல், பணப் பரிமாற்றம், சொத்து தொடர்பான சட்டங்களை மறுசீரமைத்து சட்டபூர்வமாகவும் செயற்திறன் மிக்கதாகவும் மாற்றுதல்

கல்வி மற்றும் சுகாதார மேம்பாடு

கல்விக்காக ஒதுக்கும் தொகையை மொத்தத் தேசிய உற்பத்தியில் 6 வீதமாகவும் சுகாதாரத்துக்கு ஒதுக்கும் தொகையை 3 வீதமாக உயர்த்துவதற்கு படிப்படியாக நடவடிக்கை எடுத்தல்.

வெளிநாட்டு தொடர்பு

நாட்டின் தனித்துவத்தை பாதுகாக்கும் வகையில் அணிசேரா வெளிநாட்டு கொள்கையை பின்பற்ற உலகிலுள்ள சகல இனங்களுடனும் நட்புறவானதும் பலமானதுமான தொடர்புகளை ஏற்படுத்தல்.

பெண்கள் மற்றும்சிறுவர் உரிமை

பெண்களை பலப்படுத்துதல் பெண்கள் சிறுவர் துஷ்பிரயோகங்களுக்கு எதிராக கடும் நடவடிக்கை எடுத்தல். பெண்களின் உள்ளூராட்சி பிரதிநிதித்துவத்தை 25 வீதமாகவும் பாராளுமன்ற பிரதிநிதித்து வத்தை 15 வீதமாகவும் உயர்த்த அரசிய லமைப்பினூடாக நடவடிக்கை எடுத்தல்.

பிரதான அபிவிருத்தி கொள்கைக¨ள் மற்றும் செயற்பாடுகளை அமைச்சரவை யினூடாக தீர்மானித்தல்.

மேற்குறிப்பிட்ட விடயங்கள் தொடர்பில் உடன்பாட்டை ஏற்படுத்திய பின்னர் தொடர்ந்து பேசி இணக்கப்பாட்டுக்கு வருவதற்கும் இரு தரப்பும் முடிவு செய்துள்ளன.

அமைதி சமாதானம் ஜனநாயகம்

www.sooddram.com