கெவிளியாமடு கறுவாச்சோலையில் அத்துமீறி வேளாண்மை செய்வதைத் தடை செய்ய வேண்டும் - பத்மநாபா-ஈ.பி.ஆர்.எல்.எப்.கட்சியின் தலைவரும், கிழக்கு மாகாணசபை உறுப்பினருமான - துரைரட்ணம்!

மட்டக்களப்பு கெவிளியாமடு கறுவாச்சோலைக் கண்டத்தில் அத்துமீறி வேளாண்மை செய்வதைத் தடை செய்து உரிமையாளர்களிடம் காணிகளை வழங்க உடனடி நடவடிக்கை எடுக்குமாறு கோரி கிழக்கு மாகாண ஆளுனருக்கு மாகாண சபை உறுப்பினர் இரா.துரைரத்தினம் அவசர கடிதம் ஒன்றை அனுப்பியுள்ளார்.

அக்கடிதத்தில் மேலும் தெரிவிக்கப்பட்டுள்ளதாவது பட்டிப்பளை பிரதேச செயலாளர் பிரிவிற்குட்பட்ட கச்சைக்கொடி சுவாமிமலை கிராம சேவையாளர் பிரிவிலுள்ள கெவிளியாமடு கறுவாச்சோலைக் கண்டம் 1977 ஆம் ஆண்டு தமிழ் மக்களுக்கு அரசால் வழங்கப்பட்டது. இக்காணிகளில் விவசாயக்காணியும், மேட்டு நிலப்பயிர்ச்செய்கைக்காணியுமாக 150 ஏக்கருக்கும் மேற்பட்ட காணிகள் உள்ளடங்கும்.

இவை அனைத்துக்கும் காணி ஒப்பம் வழங்கப்பட்டு விவசாயம் செய்து வந்தனர்.
1986, 1990 ஆம் ஆண்டும் ஏற்பட்ட இனக்கலவரம், யுத்தம் காரணமாக நூற்றுக்கணக்கான குடும்பங்கள் இடம்பெயர்ந்தமை குறிப்பிடத்தக்கதாகும்.

இடம்பெயர்ந்த மக்கள் அரச அதிபர், பிரதேச செயலாளர், மக்கள் பிரதிநிதிகள் எடுத்துக்கொண்ட நடவடிக்கைகள் காரணமாக சமாதான சூழ்நிலை ஏற்பட்டதன் பின்னர் 01.11.2009 ஆம் திகதியின் பின் மீண்டும் தங்களுடைய பகுதிக்குச் சென்று விவசாயச் செய்கையை ஆரம்பித்தனர்.

இவ்வேளையில் இதில் குறிப்பாக கறுவாச்சோலை கண்டத்தில் முழுமையாக 150 ஏக்கருக்கு மேற்பட்ட விவசாயக் காணிகளில் பெரும்பான்மையினரைச் சேர்ந்த ஒரு சிலர் அத்துமீறி தமிழர்களின் காணிகளில் விவசாயம் செய்வதற் கான உழவு வேலைகளை ஆரம்பித்துவிட்டனர். இதன் காரணமாக இருசாராருக்குமிடையில் சில முரண்பாடுகளும் ஏற்பட்டன.

காணி உரிமையாளர் அத்துமீறி விவசாயம் செய்தவர்களுடன் தொடர்பு கொண்டு வினவிய போது இந்தப் போகத்துடன் நாங்கள் உங்கள் காணியை விட்டுத்தருவோம் எனக்கூறியதற்கிணங்க முரண்பாடுகள் வரக்கூடாது என்பதற்காக விட்டுக் கொடுத்து பொறுத்திருந்தனர்.

2010 ஆம் ஆண்டு பெரும்போகச் செய்கையை தமிழர்கள் ஆரம்பித்தனர்.
இதேவேளை மீண்டும், இரவோடு இரவாக இக்காணிகளில் அத்துமீறி சிலபெரும்பான்மையினர் நெல் விதைத்து விட்டனர்.
இது விடயமாக உரிமையாளர்கள் தொடர்பு கொள்ளும் போது பல பிரச்சினைகள் எழுகின்றன.

இவர்களுடன் பேசுவதனால் பிரச்சினைகள் அதிகரிக்கும் என்பதைக் கருத்தில் கொண்டு காணி உரிமையாளர்கள் 11.11.2010 வக்கியல்ல பொலிஸ் நிலையத்தில் முறைப்பாடு செய்தனர். அதைத் தொடர்ந்து பொலிசாரினால் அத்துமீறி விவசாயம் செய்தவர்களின் பிரச்சினையை தீர்க்க முடியாது. அரச அதிகாரிகளிடம் அதாவது பிரதேச செயலாளடம் சொல்லி உங்கள் பிரச்சினையை தீர்த்துக்கொள்ளுங்கள் என காணி உரிமையாளர்களான தமிழர்களிடம் ஆலோசனை சொல்லப்பட்டது.

காணி உரிமையாளர்களான சின்னத்தம்பி சோமசுந்தரம், சோமசுந்தரம் மாணிக்கவாசகம், இரத்தினம் அருளானந்தராசா, செல்லத்துரை யோகானந்தன், மார்க்கண்டு செல்லத்துரை, ஆறுகன் சண்முகநாதன், சின்னத் தம்பி கனகசூரியம், சின்னத்தம்பி வசந்தராசாபிள்ளை, மார்க்கண்டு பாக்கியராசா, மார்க்கண்டு சதாசிவம், சின்னத்தம்பி இளையத்தம்பி, சின்னத்தம்பி கோபாலப்பிள்ளை, காசுபதி சீனித்தம்பி, கந்தப்பன் சிவஞானம், வேலுப்பிள்ளை திலகேஸ்வரன், வேலுப்பிள்ளை யோகேஸ்வரன், கந்தப்பன் இராசதுரை, தங்கவேல் சிவசம்பு, வேலுப்பிள்ளை சின்னத்தம்பி, சின்னத்தம்பி இரத்தினசிங்கம், துரையப்பா இளங்கோ, கணபதிப்பிள்ளை, கணபதிப்பிள்ளை சோமசுந்தரம், கேசவிநாயகலிங்கம், மாசித்தார், இராசரெத்தினம், கனகரெத்தினராசா, சின்னத்தம்பி நேசராசா, இரத்தினம் துரைராசா இவர்களுடன் இன்னும் பலர் உள்ளனர்.

இவர்களுடைய காணிகளில் விதைப்பு வேலைகள் முடித்து உரம் எறியத் தொடங்கி விட்டனர். அத்துமீறி ஒரு சில வெளிப்பகுதியிலிருந்து வரும் பெரும்பான்மையினத்தைச் சேர்ந்தவர்கள் மட்டுமே விவசாயச் செய்கையை ஆரம்பித்துள்ளனர். இப்பகுதியில் தமிழ் சிங்களக்குடும்பங்கள் மிக ஒற்றுமையாக வாழ்ந்து வருவது குறிப்பிடத்தக்கதாகும்.

எனவே தாங்கள் இதனைத் தடுத்து நிறுத்தி காணி உரிமையாளர்களுக்கு குத்தகையை வழங்க நடவடிக்கை எடுப்பதோடு அடுத்த போகம் செய்வதற்கு முன் காணி உரிமையாளர்களான தமிழர்கள் வேளாண்மை செய்வ தற்கு காணியை மீட்டுக் கொடுக்க நடவடிக்கை எடுத்து இவர்கள் விவசாயம் செய்வதற்கும் குடியிருப்பதற்கும் தேவையான சகல நடவடிக்கையையும் மேற்கொள்ளுமாறு தங்களைக் கேட்டுக் கொள்கின்றேன். என தனது கடிதத்தில் குறிப்பட்டுள்ளார்.