மன்னார் மாவட்ட அரச நியமன விவகாரம்

தமிழ் கூட்டமைப்பு எம்.பியின் குற்றச்சாட்டு தமிழர்-முஸ்லிம்களிடையே பிளவை ஏற்படுத்தும்

முன்னாள் ஜனாதிபதி சந்திரிகா குமாரதுங்க அவர்களின் தலைமையிலான அரசாங்கத்தினால் சமர்ப்பிக்கப்பட்ட அமைச்சரவை பத்திரத்தின் அடிப்படையில் நியமிக்கப்பட்ட முகாம் அதிகாரிகளே மன்னார் மாவட்டத்தில் தமது மீள்குடியேற்றத்தின் பின்னர் உரிய நேர்முகப் பரீட்சைக்கு தோற்றி அரச நியமனங்களை பெற்றுள்ளனர் என வட மாகாண மஜ்லிஸ¤ல் சூறா அமைப்பின் தலைவர் மெளலவி எம். ஏ. எம். முபாறக் றசாதி தெரிவித்துள்ளார். இந்த நியமனம் குறித்து தமிழ் தேசிய கூட்டமைப்பு பாராளுமன்ற உறுப்பினர் செல்வம் அடைக்கலநாதனால் சுமத்தப்படும் குற்றச்சாட்டுக்கள் தமிழ் - முஸ்லிம் மக்களிடையே மீண்டும் பிளவுகளை தோற்றுவித்து விடும் நிலையேற்படும் என சுட்டிக்காட்டியுள்ளார்.

இது தொடர்பாக மஜ்லிசுல் சூறா அமைப்பின் தலைவர் தெரிவிக்கையில், கூறியதாவது,வடக்கில் தமிழ் - முஸ்லிம் உறவு மீண்டும் வலுப்பெற்று வருகின்றது. இந்த நிலையில் எமது உறவை பலப்படுத்த வேண்டிய தேவை இருக்கும் நிலையில் அந்த பலத்தைவலுவிழக்கச் செய்கின்ற கைங்கரியங்களில் தமிழ் பேசும் மக்கள் பிரதிநிதிகள் ஈடுபடுவார்கள் எனில் அது எமது இரு சமூகத்துக்கும் கிடைக்கும் தீர்வினை மழுங்கடிக்கச் செய்துவிடும் ஒன்றாகவே காண முடிகின்றது.

தற்போது பேசப்பட்டுவரும் மன்னார் மாவட்டத்தில் வழங்கப்பட்டுள்ள அரச நியமனங்கள் குறித்து சில தகவல்களை தெளிவுப்படுத்த வேண்டியது எமது பொறுப்பாகும். அந்த வகையில், 1990 ஆம் ஆண்டு இடம்பெயர்ந்த மக்களது நலனை கவனிக்க முன்னாள் ஜனாதிபதி சந்திரிகா பண்டாரநாயக்க குமாரதுங்கவினால் அமைச்சரவையின் அங்கீகாரத்துடன் புத்தளத்தில் வடக்கு இடம்பெயர்ந்த முஸ்லிம்களுக்கான செயலகம் ஒன்று ஆரம்பிக்கப்பட்டது.

ந்த காலத்தில் இருந்து சுமார் 10 வருடங்களாக முகாம்களில் வாழும்மக்களின் பணிகளை இலகுபடுத்தி அரசாங்கத்தின் சகல சட்ட திட்டங்களுக்கமைய முகாம் உத்தியோகத்தர்கள் நியமிக்கப்பட்டனர். இவ்வாறு நியமிக்கப்பட்டவர் அனைவரும் வட மாகாணத்திலிருந்து இடம்பெயர்ந்தவர்களே.

இவ்வாறான நிலையில் அரசாங்கத்தின் மீள்குடியேற்ற செயற்பாடுகளுக்கமைய புத்தளத்தில் இயங்கிய அந்த செயலகத்தை மூடிவிடுவதுடன், அங்கு பணியாற்றும் உத்தியோகத்தர்களை வட மாகாணத்தில் அவர்களது சொந்த பிரதேசங்களில் பணியாற்றுவதற்கான வசதிகளை செய்து கொடுக்க நடவடிக்கை எடுக்கப்படும் என்ற வகையில் அமைச்சர்களான மில்ரோய் பெர்னாண்டோ மற்றும் ஏ. எல். எம். அதாவுல்லா ஆகியோரினால் அமைச்சரவை பத்திரம் சமர்ப்பிக்கப்பட்டது.

அதனடிப்படையில், ஒன்றிணைந்த முகாமைத்துவ சேவை திணைக்களத்தினால், உரிய தாராதரங்கள் பரிசீலிக்கப்பட்டு அந்த நியமனங்கள் அரச சட்டங்களுக்கமைய வழங்கப்பட்டுள்ளது. இதில் அரசியல் செல்வாக்கு அல்லது ஒரு இனத்துக்கு மட்டும் முன்னுரிமையென்று எவ்வித அழுத்தங்களும் பிரயோகிக்கப்படவில்லை என்பதை தெளிவாக கூறிகொள்ள விரும்புகின்றேன்.

மன்னார் மாவட்டம் 90 சதவீதமான தமிழர்களைக் கொண்ட ஒரு மாவட்டம் எனக் கூறப்பட்ட போதும் 1990 ஆம்ஆண்டிற்கு முன்னர்அங்கிருந்த முஸ்லிம்கள் புலிகளினால் பலவந்தமாக வெளியேற்றப்படுவதற்கு முன்னர், 1981 ஆம் ஆண்டு கணக்கெடுப்பின்படி 27 சதவீதமான முஸ்லிம்கள் வாழ்ந்துள்ளதாக தெரிவிக்கப்படுகின்றது.

20 வருடத்தின் பின்னர் தமது மண்ணில் முஸ்லிம்களின் மீள்குடியேற்றம் முழுமையாக இடம்பெற்றிருக்குமெனில் அதிகரித்த சதவீதத்தையே காணமுடியும். இந்த யதார்த்தத்தை அங்கு வாழும் தமிழ் மக்கள் புரிந்துள்ள நிலையில் அவர்களின் உள்ளத்தில் இன ரீதியாக பிளவுப்பட்டு மீண்டும் சந்தேகத்துடன் வாழும் நிலையை தோற்றுவிக்க முற்பட வேண்டாம் என்பதை கேட்டுக் கொள்கின்றேன்.

அதே வேளை, வடக்கில் இருந்து வெளியேற்றப்பட்டதால் கடந்த 20 வருட காலத்தில் வடக்கில் எத்தனை முஸ்லிம்களுக்கு நியமனங்கள் வழங்கப்பட்டுள்ளது என்பதை கெளரவ பாராளுமன்ற உறுப்பினர்கள் பார்க்காமல் இருப்பது வேதனை தருகின்றது. அதே போல் இடம்பெயர்ந்த நிலையில் வாழ்ந்த மக்கள், அவர்கள் வாழ்ந்த பிரதேசங்களிலும் நியமனங்களை பெற முடியாத நிலையே இருந்துவந்தது என்பதை சுட்டிக்காட்ட விரும்புகின்றேன்.

தற்போதைய மன்னார் மாவட்டத்தில் கல்வி பணிப்பாளராக நியமனம் பெற்றுள்ள எம். எம். சியான் அவர்கள் சிறந்ததொரு கல்விமான். குறிப்பாக மன்னார் மாவட்டத்தின் தாராபுரத்தை பிறப்பிடமாக கொண்டவர்.

இந்த நிலையில் எவ்வாறு இவர் வெளிமாவட்ட கல்வி பணிப்பாளராக இருக்க முடியும். பிழையான தரவுகளை தெரிவித்து, மன்னாரின் இயல்பு நிலையை சீர்குலைக்க வேண்டாம். மக்கள் பிரதிநிதிகள் மிகவும் நேர்மையாக நிதானமாக செயற்பட வேண்டும். அப்பாவிமக்களை உசுப்பேத்தி மீண்டும் அவர்களை பலிக்கடாக்களாக ஆக்கும் கைங்கரியத்தை அத்தோடு நிறுத்திக் கொள்ளுமாறு மிகவும் கெளரவமாகக் கேட்டுக் கொள்கின்றேன்.

இம்மாவட்டத்தில் பிறந்து வளர்ந்த முஸ்லிம்கள் புலிகளினால் வெளியேற்றப்பட்டனர். இன்று அந்த பணியினை தமிழ்தேசிய கூட்டமைப்பு செய்கின்றது. மன்னாரில் பிறந்தவன் மன்னாரில் அரச அதிகாரியாக கடமையாற்ற முடியாதா என கேட்க விரும்புகின்றேன். வரலாறு தெரியாமல் குறுகிய இனவாதத்துடன் செயற்படுவதை தவிர்த்துக் கொள்ளுமாறு வேண்டிக் கொள்கின்றோம்.

கல்விப் பணிப்பாளர் எம். எம். சியானின் நியமனம் முறையாக இடம்பெற்றதொன்று. சகல தராதரங்களையும் தன்னகத்தே கொண்ட ஒருவர், ஒரு அரசாங்க அதிகாரி அரசாங்கம் எப்பகுதிக்கு சென்று பணியாற்றுமாறு கூறுகின்றதா, அப்பகுதியில் அவர்சென்று கடமையாற்ற வேண்டும் என்பது பொதுநியதியாகும்.

எந்த மாவட்டமோ மாகாணமோ ஒரு தனி குழுவுக்கு என பிரித்து வழங்கப்படவில்லை. அவ்வாறான பிரிவினைவாத கருத்துக்களை விதைப்பதனால், எமது மாவட்டம் இன்னும் பின்தங்கிய பிரதேசமாகவே இருக்குமே தவிர எவ்வித நன்மையையும் அடைந்து கொள்ளாது என்பதை சுட்டிக்காட்ட விரும்புகின்றேன். இவ்வாறு அவர் தெரிவித்துள்ளார்.