மக்கள் எழுச்சி

அடுத்தது சவூதி அரேபியா?

துனீசியாவில் துவங்கி பல்வேறு நாடுகளில் எழுந்த எழுச்சியால் ஆட்சியாளர்கள் மாறியுள்ளனர். அவர்களின் கொள்கைகளில் மாற்றம் ஏற்படவில்லை என்றாலும், ஆட்சி மாற்றங்கள் அடுத்தடுத்துள்ள நாட்டு மக்கள் மத்தியில் நம்பிக்கையை ஏற்படுத்தியுள்ளன. பஹ்ரைன் போன்ற நாடுகளில் மக்கள் போராடியபோது, போராட் டத்தை ஒடுக்க சவூதி அரேபியா வின் மன்னர் அரசு அங்கு தங்கள் ராணுவத்தைஅனுப்பி வைத்தது. சிரியாவில் உள்நாட்டு கலகத்தை உருவாக்கும் அமெரிக்காவின் முயற்சிக்கு ஆதரவும் அளித்தது. சொந்த நாட்டில் எந்தவிதமான ஜனநாயக உரிமைக்கும் இடம் தராமல் பார்த்துக் கொள்ளும் சவூதி மன்னருக்கு எதிராகவும் போராட்டங்கள் நடந்தன. இந்தப் போராட்டங்களின் மீதான அடக்குமுறைகள் செய்திகளாக வில்லை.

இத்தகைய நிலைமை இருந்தும் சவூதி அரேபியாவில் மீண்டும் மக்கள் போராடத் துவங்கியுள்ளனர். குறிப்பாக, அந்நாட்டின் கிழக்குப்பகுதியில் லட்சக்கணக்கான மக்கள் மன்னராட்சிக்கு முடிவு கட்ட வேண்டும் என்ற முழக்கங்களை எழுப்பி வருகிறார்கள். ஏற்கெனவே போராட்டங்கள் நடந்தபோது, அதில் பங்கேற்ற மக்கள் மீது துப்பாக்கிச்சூடு நடத்தி பாதுகாப்புப் படையினர் வெறியாட்டம் நடத்தினர். இந்த அடக்குமுறையால் மக்கள் அச்சத்தால் போராட்டங்களில் பங்கேற்க மாட்டார்கள் என்பது சவூதி அரேபியா மன்னரின் கருத்தாகும். அக் கருத்தைத் தகர்க்கும் வகையில் கிழக்குப்பகுதியில் உள்ள அவாமியா என்ற நகரில் ஆயிரக்கணக்கான மக்கள் பங்கேற்ற அரசு எதிர்ப்பு ஆர்ப்பாட்டம் நடந்துள்ளது. “தியாகிகளுக்கு விசுவாசம் காட்டுவோம்” என்ற முழக்கமடங்கிய அட்டைகளுடன் மக்கள் இந்த ஆர்ப்பாட்டத்தில் பங்கேற்றனர்.

கடந்த சில வாரங்களாக நடைபெற்று வரும் போராட்டங்கள் மீது அரசுத்தரப்பில் நடத்தப்பட்ட வன்முறைத் தாக்குதல்களால் பலர் கொல்லப்பட்டனர். இது அவா மியா மற்றும் காடிப் ஆகிய நகரங் களில் உள்ள மக்கள் மத்தியில் பெரும் கோபத்தை ஏற்படுத்தியது. அதேவேளையில், நாட்டின் கிழக்குப்பகுதியில் ஏராளமான ராணுவத்தினரைக் கொண்டு வந்து அரசு குவித்தது. இந்தக்குவிப்பு மக்கள் மத்தியில் இருந்த ஆத்திரத்தை அதிகப்படுத்தியது. தங்களின் மனித உரிமை, பேச்சுரிமை மற்றும் அரசியல் கைதிகள் விடுதலை போன்றவற்றோடு ராணுவம் கிழக்குப்பகுதியிலிருந்து வெளியேற வேண்டும் என்றும் மக்கள் கோரிக்கை வைக்கத் துவங்கியிருக்கிறார்கள். பிப்ரவரி மாதத்திலிருந்து 160 பேர் கைது செய்யப்பட்டு, விசாரணை எதுவுமில்லாமல் சிறைகளில் அடைக்கப்பட்டுள்ளனர் என்பது குறிப்பிடத்தக்கது. அவாமியா நகருக்கு அடுத்தபடியாக காடிப் நகரம்தான் அரசுக்கு எதிராகத் தீவிரமான போராட்டங்களைக்கண்டு வருகிறது.

கடந்த மாத இறுதியில் நடைபெற்ற ஆர்ப்பாட்டத்தின்போது ஒன்பது வயது சிறுமியை பாதுகாப்புப் படையினர் சுட்டுக் கொன்றனர். அதே தாக்குதலில் மேலும் இருவர் கொல்லப்பட்டனர். இந்தக் கொலைகளுக்கு குறைந்தபட்ச வருத்தம் கூட மன்னர் நிர்வாகத்தரப்பில் தெரிவிக்கப்படவில்லை. ஆனால், மக்களின் போராட்டங்கள் சட்டவிரோதம் என்ற அறிவிப்பை மீண்டும் வெளியிட்டுள்ளார்கள். பிப்ரவரி மாதத்தில் மக்கள் போராடத்துவங்கினர். அதற்கு மக்கள் மத்தியில் ஆதரவு பெருகியதால், இத்தகைய போராட்டங்கள் சட்டவிரோதம் என்றும், இதைத்தடுக்க அனைத்து நடவடிக்கைகளையும் எடுக்க நிர்வாகத்துக்கு அனுமதி என்றும் சவூதி அரேபியாவின் உள்துறை அமைச்சகம் அறிவித்தது.

போராட்டம் பரவும்கிழக்குப்பகுதியில் மட்டும் லட்சக்கணக்கான மக்கள் போராடி வந்தாலும், நாட்டின் மற்ற பகுதிகளிலும் ஆங்காங்கே ஆர்ப்பாட்டங்கள் துவங்கியுள்ளன. மேற்கு ஆசியா மற்றும் வடக்கு ஆப்பிரிக்காவில் துவங்கிய போராட்டங்கள், அமெரிக்கா, ஐரோப்பிய நாடுகள் என்று பரவின. தற்போது மீண்டும் துவங்கிய இடத்திற்கே புதிய எழுச்சியுடன் போராட்டம் வந்துள்ளது. ஆட்சியாளர்கள் அகற்றப்பட்ட நாடுகளின் பட்டியலில் அடுத்ததாக இடம் பெறப் போவது சவூதி அரேபியாதான் என்கிறார்கள் போராடி வரும் குழுக்களின் தலைவர்கள்.

கிழக்கில் ராணுவமயம்

சவூதி அரேபியாவில் அவாமியா மற்றும் காடிப் உள்ளிட்ட பல்வேறு நகரங்களின் வீதிகளில் பீரங்கிகள் உள்ளிட்ட பல்வேறு ராணுவ வண்டிகள் மற்றும் நவீன ஆயுதங்களைத் தாங்கிய ராணுவத்தினர் வலம் வரும் காட்சிகள் அதிகரித்துள்ளன. இந்த அச்சுறுத்தல்களை மீறி பாதுகாப்புப் படையினரால் கடந்த மாதத்தில் கொல்லப்பட்ட ஐந்து பேரின் படங்களை ஏந்தியவாறு ஏராளமான மக்கள் ஒவ்வொரு நாளும் ஆர்ப்பாட்டங்களில் பங்கேற்று வருகிறார்கள். பிப்ரவரி மாதத்திலிருந்து கைது செய்யப்பட்டு சிறைகளில் அடைக்கப்பட்டுள்ள 160 பேரைத் தாண்டி, பல்வேறு காரணங்களைக் காட்டி கைது செய்யப்பட்டு ஆயிரக்கணக்கானவர்கள் ஏற்கெனவே சிறைகளில் உள்ளனர். அவர்களில் பெரும்பாலானவர்கள் மீது இன்னும் குற்றமே சாட்டப்படவேயில்லை. குற்றம் சாட்டப்பட்டவர்கள் மீது விசாரணை நடைபெறவில்லை. இந்த விபரங்களை அம்னெஸ்டி இன்டர்நேஷனல் உள்ளிட்ட பல மனித உரிமை அமைப்புகள் வெளியிட்டுள்ளன. சுமார் 30 ஆயிரம் பேர் வரை சவூதி அரேபிய சிறைகளில் இருக்கலாம் என்று கூறப்படுகிறது.