இறுதி யுத்தத்தின் போது புலிகள் சிறுவர்களை வயது வித்தியாசமின்றி யுத்தத்தில் ஈடுபடுத்தினர் - சிரேஷ்ட புலி உறுப்பினர்

இறுதிக்கட்ட யுத்தத்தில் வயது வித்தியாசமின்றி சிறுவர்கள் பலவந்தமாகப் பிடிக்கப்பட்டு, புலிகளால் யுத்தத்தில் ஈடுபடுத்தப்பட்டதாக முன்னாள் சிரேஷ்ட புலி உறுப்பினர் ஒருவரை மேற்கோள்காட்டி பிரித்தானிய செய்தித்தாளான ‘த இன்டிப்பென்டட்’ செய்தி வெளியிட்டுள்ளது. பல சிறுவர்களுக்கு ஒருநாள் அடிப்படைப் பயிற்சி மாத்திரமே வழங்கப்பட்ட நிலையில் யுத்த களத்தில் இறக்கிவிடப் பட்டதுடன், பாதுகாப்புப் படையினரின் பகுதிக்குத் தப்பிச்செல்ல முற்பட்ட பொதுமக்கள் பலர் புலிகளால் சுட்டுக் கொல்லப்பட்டதாகவும் அச்செய்தியில் குறிப்பிடப்பட்டுள்ளது. புலிகளின் ஆயுதப் பிரிவைச் சாராத ஒரு சிரேஷ்ட புலி உறுப்பினரே இத் தகவல்களை வழங்கியிருப்பதாக பிரித்தானிய செய்தித்தாள் தனது செய்தியில் குறிப் பிட்டுள்ளது.

நிலைமை மிகவும் மோசமடையும் என எதிர்பார்த்திராத புலிகள் பலவந்தமாகப் படையில் இணைத்துக்கொண்ட 14 வயது முதல் 55 வயதுடையவர்களை யுத்த களத்தில் நேரடியாக இறக்கிவிட்டனர். 3 இலட்சம் பொதுமக்கள் புலி உறுப் பினர்களின் பாதுகாப்புக்காக வைக்கப்பட்டி ருந்தனர் என்றும் அந்தப் புலி உறுப்பினர் கூறியிருப்பதாக த இன்டிப்பென்டட் தனது செய்தியில் தெரிவித்துள்ளது.

இறுதி நேரத்தில் வயதுக் கட்டுப்பாடு எதுவும் இருக்கவில்லை. பலவந்தமாகப் படையில் இணைக்கப்பட்ட சிறுவர்கள் ஒருநாள் அடிப்படைப் பயிற்சியுடன் யுத்த களத்துக்கு அனுப்பப்பட்டனர். இறுதிக்கட்டத்தில் புலிகளால் பல யுத்தக்குற்றங்கள் மேற்கொள்ளப்பட்டன. இதனைப் பொதுமக்கள் அறிவார்கள். பொதுமக்கள் பலர் புலிகளின் கட்டுப்பாட்டிலிருந்து வெளியேற அனுமதிக்கப்படவில்லை. அவ்வாறு களவாகச் செல்ல முற்பட்டவர்கள் பலர் சுட்டுக் கொல்லப்பட்டனர் என்றும் அச்செய்தியில் தெரிவிக்கப்பட்டுள்ளது.

“புலிகளின் தலைவர் பிரபாகரன் எல்லா விடயங்களிலும் பிடிவாதமானவர். மீண்டும் ஒரு எழுச்சிக்கு தற்போது சந்தர்ப்பம் இல்லை. தற்பொழுது எந்தவொரு தலைமைத்துவமும் இல்லை. புலம்பெயர்ந்துவாழ் தமிழர்களால் அரசியல் அழுத்தமொன்றை மாத்திரமே வழங்க முடியும். அதற்கு அப்பால் அவர்களால் எதுவும் செய்ய முடியாது” என்றும் அந்தப் புலி உறுப்பினர் தமக்கு வழங்கிய செவ்வியில் குறிப்பிட்டதாக ‘த இன்டிப்பென்டட்’ செய்தித்தாள் தெரிவித்துள்ளது.

பொதுமக்கள் மற்றும் பாடசாலை மாணவர்களை இலக்குவைத்துத் தாக்குதல் நடத்தும் புலிகளின் திட்டத்துக்கு அவர்களுக்குள்ளேயே ஆதரவு இருக்கவில்லை. சிங்கள மக்கள் மத்தியில் பதற்றமான சூழ்நிலையொன்றை ஏற்படுத்துவதற்குப் புலிகள் விரும்பினர் என்றும் அவர் கூறியிருப்பதாக அச்செய்தியில் குறிப்பிடப்பட்டுள்ளது.

“எமக்கு அரசியல் தீர்வொன்றே தேவை. சிங்கள மக்களின் ஆதரவின்றி தமிழ் மக்கள் எந்தவொரு அரசியல் தீர்வையும் பெற்றுக்கொள்ள முடியாது” என்றும் அந்த முன்னாள் சிரேஷ்ட புலி உறுப்பினர் தம்மிடம் கூறியதாக பிரித்தானிய செய்தித்தாளான ‘த இன்டிப்பென்டட்’ செய்தித்தாள் குறிப்பிட்டுள்ளது.