படுவான்கரை பிரதேசத்தை கட்டியெழுப்ப அரசியல் வேறுபாடுகளுக்கு அப்பால் ஒன்றுபடவேண்டும்

(கிருஸ்ணா)

போரினாலும் இயற்கை அனர்த்தங்களினாலும் பாதிக்கப்பட்டுள்ள படுவான்கரை பிரதேசத்தை நாங்கள் கட்டியெழுப்பவேண்டுமென்றால் அரசியல் வேறுபாடுகளுக்கு அப்பால் ஒன்றுபட்டு செயற்பட அனைவரும் முன்வரவேண்டும் என மீள்குடியேற்ற பிரதியமைச்சர் விநாயகமூர்த்தி முரளிதரன் தெரிவித்தார்.
 

மட்டக்களப்பு மேற்கு கல்வி வலயத்துக்குட்பட்ட அம்பிளாந்துறை கலைமகள் வித்தியாலயத்துக்கான ஆய்வுகூடத்துக்கான அடிக்கல் நடும் நிகழ்வில் பிரதம அதிதியாக கலந்துகொண்டு உரையாற்றும்போதே அவர் இவ்வாறு தெரிவித்தார்.

இங்கு தொடர்ந்து உரையாற்றிய அவர்,

இந்நிகழ்வுக்கு பாராளுமன்ற உறுப்பினர் பா.அரியநேத்திரனையும் அழைத்திருந்தேன். அவர் வேறு ஒரு அவசர வேலை காரணமாக வரமுடியாத நிலையென தெரிவித்தார். அவர் என்னிடம் இரண்டு கோரிக்கைகளை முன்வைத்தார். இங்கு என்னிடம் விடுத்தவேண்டுகோளை அவர் பாராளுமன்றத்தில் என்னிடம் கோரினார். இந்த பாடசாலைக்கு ஒன்றுகூடல் மண்டபம் ஒன்றும் கனிஸ்ட வித்தியாலயத்துக்கு கட்டிடங்களும் கோரியிருந்தார். அதற்கான நடவடிக்கைகளை நாங்கள் எடுத்துவருகின்றோம்.

இந்த நாட்டில் யுத்தம் முடிவுக்கு கொண்டுவரப்பட்டு ஜனாதிபதி மகிந்த ராஜபக்ஸவின் சிந்தனையின் கீழ் 5000 கனிஸ்ட பாடசாலைகளும் 1000 இடைநிலை பாடசாலைகளும் அபிவிருத்திசெய்யப்பட்டுவருகின்றன. அனைத்து மாவட்டங்களிலும் வருடாவருடம் இந்த திட்டம் அமுல்படுத்தப்படவுள்ளது.

இந்ததிட்டத்துக்கான பாடசாலைகளை தெரிவுசெய்வதில் கூட அனைத்து பாராளுமன்ற உறுப்பினர்களுடன் இணைந்தே அதனை தெரிவுசெய்தோம். மட்டக்களப்பு மாவட்டத்தில் கிட்டத்தட்ட 22 பாடசாலைகள் ஆயிரம் பாடசாலை திட்டத்தின் கீழ் அபிவிருத்தி செய்யப்படவுள்ளன.

1000 பாடசாலை அபிவிருத்தி திட்டத்தின் கீழ் நாடளாவிய ரீதியில் 300 பாடசாலைகளின் வேலைத்திட்டங்கள் ஆரம்பிக்கப்பட்டுள்ளன.இதேபோன்று ; 5000 கனிஸ்ட பாடசாலைகளை அபிவிருத்திசெய்யும் திட்டத்தின் கீழ் 700 பாடசாலைகளின் வேலைத்திட்டங்கள் ஆரம்பிக்கப்பட்டுள்ளன.கடந்த வருடம் கல்வி அபிவிருத்திக்காக 8600 மில்லியன் ரூபாவை கல்வி அபிவிருத்திக்காக ஜனாதிபதி ஒதுக்கியிருந்தார்.

அபிவிருத்திசெய்யப்படும் பாடசாலைகளை தெரிவுசெய்து கடந்த வருடம் மாகாணசபை ஊடாக அனுப்பிய கடிதத்தை பாராளுமன்றத்தில் பார்த்தபோது அந்த கடிதத்தில் தெரிவுசெய்யப்பட்ட பாடசாலையின் பெயர் இல்லை. அம்பிளாந்துறை என்ற பாடசாலை இல்லை. அதேபோன்று கிராண் பாடசாலையின் பெயரும் நீக்கப்பட்டிருந்தது. இது தொடர்பில் என்ட கிராமம் அரியநேத்திரனின் கிராமம் என்ற ரீதியில் அந்த பெயர்கள் நீக்கப்பட்டுள்ளது.

ஒரு அரசியல்வாதியை பழிவாங்குவதற்காக அந்த கிராமத்தை பழிவாங்கும் செயலை என்னவென்று கூறுவது என அங்கு தெரிவித்தேன். அந்த பாடசாலைகளை நீக்குவதற்கு எதிராக நான் குரல்கொடுத்தேன். அந்தவேளையில் நமது பாராளுமன்ற உறுப்பினர்களும் அங்கிருந்தார்கள்.

படுவான்கரை பிரதேசத்தை பொறுத்தவரையில் யுத்தத்தினால் கடுமையாக பாதிக்கப்பட்டு, இயற்கை அனர்த்தத்தினால் பாதிக்கப்பட்டு ஊர்வேறுபாடு அற்று மக்கள் வேறுபாடு அற்று அனைத்து கிராம மக்களும் துன்பப்பட்டவர்கள். கொடிய யுத்தம் காரணமாக எவ்வளவோ உயிர்களை நாங்கள் இந்த படுவான்கரையில் இழந்துள்ளோம். இதனை கட்டியெழுப்பவேண்டிய பொறுப்பு அனைவருக்கும் இருக்கின்றது. இதற்கு அரசியல்வேறுபாடுகளை பார்க்கமுடியாது.

இதனை நான் கடந்த மாகாணசபையில் இருந்தவர்களுக்கு எடுத்துக்கூறினேன். கல்வி அபிவிருத்தியென்னும் விடயங்களில் பழிவாங்கக்கூடாது என கூறியிருந்தேன்.

எமது மாணவர்களை வளர்க்கும்போதே எமது மாவட்டம் வளரும். அதனை மையமாகக்கொண்டுதான் இந்த பாடசாலைகள் இணைக்கப்பட்டு தற்போது ஆரம்பித்துவைக்கப்பட்டுள்ளது.

மட்டக்களப்பு போதனா வைத்தியசாலையில் கட்டப்பட்டுவரும் புற்றுநோயாளர் வைத்திசாலை இந்த அம்பிளாந்துறை மண்ணைச்சேர்ந்த அம்மையொருவர் என்னிடம் விடுத்தவேண்கோளின் அடிப்படையில் உருவானது என்பதை இங்கு நான் பெருமையுன் கூறுவேன்.

அதுமட்டுமன்றி இந்த கிராமம் ஓரு சிறந்த கிராமம். ஒரு பாராளுமன்ற உறுப்பினரைக்கொண்டு சிறப்புற்று விளங்கும் கிராமம். இந்த நாட்டின் முதல் வீடு என கொள்ளப்படும் இலங்கையின் உயிரிய சபைகளில் ஒன்றினான அந்த பாராளுமன்றத்தில் அரியநேத்திரன் உள்ளதையிட்டு நானும் பெருமையடைகின்றேன்.

கடந்த யுத்த காலத்தில் தமிழ் மக்களுக்காக குரல்கொடுத்து அதிலே சிக்குண்டு இன்று அந்த மக்களை வளர்க்கவேண்டும் என்பதற்காக அர்ப்பணிப்புடன் இருக்கும் ஒருவர். நாங்கள் இந்த மக்களுக்கு செய்யவேண்டும் என்பதற்காக ஒன்றுபட்டுசெயற்பட்டுவருகின்றோம்.

இந்த மாவட்டத்தில் எமது கல்வியை வளர்ப்பதற்கான அனைத்துவளங்களும் உள்ளன. கடந்த காலத்தில் எமது மாவட்டத்தில் இருந்த சிறந்த அரசியல்வாதிகளினால் அதற்கான கட்டமைப்புக்கள் சிறந்தமுறையில் உருவாக்கப்பட்டுள்ளன.