சுற்றுலா விஸாவில் வந்து அரசியல் ரீதியாக கள ஆய்வுகளை செய்தாராம்!

அரசிற்கு எதிராக சர்வதேச ஆதரவுடன் ஆர்ப்பாட்டம் நடத்த TNA யைத் தூண்ட முயற்சியும் செய்தாராம்

சுற்றுலா விஸாவில் இலங்கை வந்திருந்த தான், இங்கு அரசியல் செயற்பாடுகளில் ஈடுபட்டமையை கைது செய்யப்பட்டு நோர்வேக்கு நாடு கடத்தப்பட்ட கவிஞரும் நடிகரு மான ஜெயபாலன் ஒப்புக் கொண்டுள் ளார். இலங்கை அரசாங்கத்தை விமர்சித்துவரும் சில புலம்பெயர் புலி சார்பு தமிழ் இணையங்கள் சிலவற்றிற்கு அவர் தெரிவித்திருக்கும் கருத்துக்கள், பேட்டிகள், அறிக்கைகள் அதனை உறுதி செய்துள்ளன. சுற்றுலா விஸாவில் இலங்கை வந்திருந்த இலங்கையின் பூர்வீகப் பிரஜையும், நோர்வே நாட்டு பிரஜாவுரிமை பெற்றவருமான ஜெயபாலன் தான் இலங்கை வந்திருந்த போது இலங்கை இராணுவத்திற்கு எதிராகச் சில அறிக்கைகளைத் தயாரித்திருந்ததாகவும், எனினும் அதனை வட மாகாண முதலமைச்சரிடம் சமர்ப்பிப்பதற்கு முன்னதாகவே தான் கைதாகி நாடு கடத்தப்பட்டுவிட்டதாகவும் அதனால் அந்த அறிக்கையை இணையங்களில் வெளியிடுவதாகவும் தெரிவித்து அவற்றைப் பிரசுரம் செய்திருக்கிறார்.

தான் இலங்கையில் கள ஆய்வுகளை நடத்தியதாகவும், அதுதொடர்பாக வடமாகாண அமைச்சர் ஐங்கரநேசனுடன் கலந்துரையாடியதாகவும் தெரிவித்துள்ள அவர், தமிழ்த் தேசியக் கூட்டமைப்பு சர்வதேச ஆதரவுடன் இலங்கையில் பாரிய ஆர்ப்பாட்டத்தை நடத்த வேண்டும் என வலியுறுத்தியிருந்ததாகவும் குறிப்பிட்டிருக்கிறார் என்றும் இணையத்தளங்களில் அவர் அறிக்கைவிட்டிருக்கிறார். முதல்வர் விக்னேஸ்வரனுக்கு பகிரங்க கடிதம் எனும் தலைப்பில் அவரது செய்தி வெளியிடப்பட்டுள்ளமை குறிப்பிடத்தக்கது.

இதிலிருந்து ஜெயபாலன், தான் சுற்றுலா விஸாவில் இங்கு வந்து குற்றமிழைத்ததனை அவரே ஒப்புக் கொண்டுள்ளார். இவர் தான் கைது செய்யப்பட வேண்டும் என்பதையும், அதனை வைத்து ஒரு திரைப்படத்தில் நகைச்சுவை நடிகர் வடிவேலு நடித்தது போன்று தான் பிரபல்யம் அடைய வேண்டுமென்பதுடன் புலம்பெயர் புலிகளது சர்வதேசப் பிரசாரத்திற்கு உதவ வேண்டும் என்பதையும் குறிக்கோளாகக் கொண்டு செயற்பட்டதும் தெளிவாகியுள்ளது.

இலங்கையில் அவர் மேற்கொண்ட பொய்ப் பிரசாரம் மூலமாக அவர் தென்னிந்தியாவில் திரைப்பட வாய்ப்பை எதிர்பார்த்திருந்த போதும் தென்னிந்தியாவில் எவருமே இவரைக் கண்டு கொள்ளவில்லையாம். இதனால் மனமுடைந்த நிலையில் உள்ள ஜெயபாலன் நோர்வேயில் ஒரு குறுந்திரைப்படம் ஒன்றைத் தயாரிக்கும் முயற்சியில் ஈடுபட்டுள்ளதாக நோர்வே தகவல்கள் தெரிவிக்கின்றன.