ஆஸ்திரேலியாவில் பொதுமக்களை 17 மணி நேரம் துப்பாக்கி முனையில் சிறைபிடித்து வைத்திருந்த ஈரானைச் சேர்ந்த ஹரோன் மோனிஸ் என்பவரை அதிரடிப்படை வீரர்கள் சுட்டுக் கொன்றனர். இந்தியர் இருவர் உள்பட பிணைக் கைதிகள் பத்திரமாக மீட்கப்பட்டனர். ஆஸ்திரேலியாவின் சிட்னி நகரின் மையப்பகுதியில் மார்ட்டின் பிளேஸ் என்ற இடத்தில் உள்ள ஒரு வணிக வளாகத்தில் லிண்ட் கபே என்ற ஓட்டல் உள்ளது. மேலும் அந்த பகுதியில் நியூசவுத் வேல்ஸ் மாகாணத்தின் நாடாளுமன்றம், ஆஸ்திரேலிய ரிசர்வ் வங்கி, அமெரிக்க, இந்திய தூதரகங்கள், இந்திய சுற்றுலா கழக அலுவலகம், பாரத ஸ்டேட் வங்கி, பரோடா வங்கி மற்றும் பல வர்த்தக நிறுவனங்கள் அமைந்து உள்ளன.

இந்நிலையில், லிண்ட் கபே ஓட்டலில் உள்ளூர் நேரப்படி நேற்று காலை 10 மணி அளவில் ஆண்கள், பெண்கள் என வாடிக்கையாளர்கள் பலர் அமர்ந்து சிற்றுண்டி சாப்பிட்டுக் கொண்டு இருந்தனர். அப்போது தீவிரவாதி ஒருவன் துப்பாக்கியுடன் அந்த ஓட்டலுக்குள் புகுந்தான். துப்பாக்கியை காட்டி மிரட்டி ஓட்டலை தனது கட்டுப்பாட்டுக்குள் கொண்டு வந்த அவன், அங்கிருந்தவர்களை பிணைக் கைதிககளாக சிறை பிடித்தான். ஓட்டலுக்குள் 2 இடங்களில் குண்டு வைத்து இருப்பதாகவும், நகரில் 2 இடங்களில் குண்டுகள் வைக்கப்பட்டுள்ளதாகவும் அவன் கூறினான்.

இதுபற்றிய தகவல் கிடைத்ததும், ஆஸ்திரேலிய போலீசாரும் துணை ராணுவ படையினரும் அங்கு விரைந்து வந்து, அந்த பகுதி முழுவதையும் 'சீல்' வைத்தனர். அந்த கட்டிடத்தை சுற்றிலும் துப்பாக்கி ஏந்திய அதிரடிப்படை போலீசார் நிறுத்தப்பட்டனர். பாதுகாப்பு பணிக்கு ஹெலிகாப்டர்களும் வரவழைக்கப்பட்டன. அந்த கட்டிடத்தில் ஓட்டலுக்கு மேலே உள்ள தளங்களில் இருந்தவர்களை போலீசார் ஏணிகளின் உதவியுடன் பத்திரமாக மீட்டனர்.

பிணைக் கைதியாக பிடித்தவர்கள் மூலம் தீவிரவாதி, ஓட்டலின் ஜன்னல் கண்ணாடி வழியாக கருப்புநிற கொடி ஒன்றை காட்டினான். அந்த கொடியில் வெள்ளை நிற எழுத்துகளில் அரபி மொழியில் எழுதப்பட்டு இருந்தது. ஆஸ்திரேலிய பிரதமர் டோனி அபோட்டிடம் தான் நேரடியாக பேச விரும்புவதாக அந்த தீவிரவாதி தெரிவித்தான். மேலும் ஐ.எஸ்.ஐ.எஸ். இயக்கத்தின் கொடி தனக்கு வேண்டும் என்று கேட்டான். ஆனால், அவன் எதற்காக அங்கிருந்தவர்களை சிறை பிடித்தான்? அவனுடைய கோரிக்கை என்ன என்பது பற்றி எதுவும் தெரிவிக்கவில்லை.

இதற்கிடையே, தீவிரவாதியின் பிடியில் இருந்து 5 பேர் நைசாக தப்பி வெளியே ஓடிவந்து விட்டனர். அவர்களிடம் ஓட்டலுக்குள் நிலவும் சூழ்நிலை குறித்து போலீசார் விசாரணை நடத்தினார்கள். அதைத் தொடர்ந்து, ஓட்டலுக்குள் புகுந்த தீவிரவாதி யார் என்பது பற்றி போலீசாருக்கு அடையாளம் தெரிந்தது.

மேலும், ஓட்டலுக்குள் தீவிரவாதியிடம் பிணைக் கைதியாக சிக்கி இருப்பவர்களில் 2 பேர் இந்தியர் என்றும், அவர்களில் ஒருவரது பெயர் விஸ்வகாந்த் (வயது 30) என்றும் மற்றொரு இந்தியரின் பெயர் புஷ்பேந்து கோஷ் என்றும் தெரியவந்தது. இதில், விஸ்வகாந்த் பெங்களூருவில் உள்ள இன்போசிஸ் நிறுவனத்தில் கம்ப்யூட்டர் என்ஜினீயராக பணியாற்றி வருபவர் என்பதும் விசாரணையில் தெரியவந்தது.

இன்போசிஸ் நிறுவனத்தின் பணிக்காக அவர் 7 ஆண்டுகளுக்கு முன் ஆஸ்திரேலியாவுக்கு சென்றார். அங்கு மனைவி மற்றும் குழந்தையுடன் வசித்து வருகிறார். என்ஜினீயர் விஸ்வநாத் ஆந்திர மாநிலம் குண்டூர் அருகே உள்ள கங்கிரெட்டிபாலம் என்ற கிராமத்தை சேர்ந்தவர். அவரது பெற்றோர் குண்டூரின் புறநகர் பகுதியான சம்பத் நகர் என்ற இடத்தில் வசித்து வருகிறார்கள்.

அப்பாவி மக்களை தீவிரவாதி பிணைக் கைதிகளாக சிறைபிடித்த சம்பவம் குறித்து ஆஸ்திரேலிய பிரதமர் டோனி அபோட், தேசிய பாதுகாப்பு குழுவை கூட்டி அவசர ஆலோசனை நடத்தினார். பின்னர், அரசியல் நோக்கம் கொண்ட இந்த சம்பவம் மிகுந்த கவலை அளிப்பதாக கூறிய அவர், பிணைக் கைதிகளை பத்திரமாக மீட்க நடவடிக்கை எடுத்து வருவதாக தெரிவித்தார். மக்களின் கவலையை புரிந்துகொள்வதாக கூறிய அவர், ஆஸ்திரேலியா அமைதியான நாடு என்றும், அந்த நிலை தொடர நடவடிக்கை எடுக்கப்படும் என்றும் தெரிவித்தார்.

லிண்ட் கபே ஓட்டலில் இருந்து சுமார் 400 மீட்டர் தூரத்தில்தான் இந்திய தூதரகம் அமைந்து உள்ளது. இந்த சம்பவத்தை தொடர்ந்து, முன்னெச்சரிக்கை நடவடிக்கையாக இந்திய தூதரக அலுவலகம் உடனடியாக மூடப்பட்டது. அங்கிருந்த அதிகாரிகள் வெளியேற்றப்பட்டு பாதுகாப்பாக அனுப்பி வைக்கப்பட்டனர். பாதுகாப்பு கருதி 12 மணி அளவில் அலுவலகத்தை மூடிவிட்டு பாதுகாப்பான இடங்களுக்கு செல்லுமாறு அதிகாரிகளை கேட்டுக்கொண்டதாக அங்குள்ள இந்திய தூதர் சஞ்சய் சுதிர் தெரிவித்தார்.

இதேபோல் அந்த பகுதியில் உள்ள ஆஸ்திரேலிய மத்திய வங்கி, அமெரிக்க தூதரகம் மற்றும் சிட்னி ஒபேரா ஹவுஸ், அரசு நூலகம், கோர்ட்டுகள் உள்ளிட்ட பிற அலுவலகங்களும் மூடப்பட்டன. சில கட்டிடங்களில் இருந்தவர்களை போலீசார் வெளியேற்றி பாதுகாப்பாக அனுப்பி வைத்தனர். பாதுகாப்பு கருதி நகரில் ரயில் சேவையும் நிறுத்தப்பட்டது.

இந்நிலையில், பிணைக் கைதிகளை மீட்கும் அதிரடி நடவடிக்கையில் ஆஸ்திரேலிய பாதுகாப்பு படையினர் ஈடுபட்டனர். நேற்று இரவு ஓட்டலுக்கு மின்சார சப்ளையை துண்டித்தனர். இதனால், ஓட்டல் இருளில் மூழ்கியது. பின்னர் அவர்கள் ஓட்டலுக்குள் அதிரடியாக நுழைந்து தாக்குதல் நடத்தினார்கள். அப்போது பிணைக் கைதிகளில் சிலர் தப்பி வெளியே ஓடி வந்தனர். தீவிரவாதியும் பதில் தாக்குதல் நடத்தினான். இதனால் அந்த இடமே போர்க்களம் போல் காட்சி அளித்தது.

தாக்குதலின் போது, வெடிகுண்டுகளை கண்டுபிடிப்பதற்காக ஒரு ‘ரோபோ’வையும் ஓட்டலுக்குள் போலீசார் அனுப்பினார்கள். போலீசார் துப்பாக்கியால் சுட்டதில் அந்த தீவிரவாதி குண்டு பாய்ந்து பலியானான். மேலும், இந்த தாக்குதல் சம்பவத்தில் 2 பேர் பரிதாபமாக உயிர் இழந்தனர். 3 பேர் படுகாயம் அடைந்தனர்.

தீவிரவாதி கொல்லப்பட்டதை தொடர்ந்து, ஓட்டலுக்குள் இருந்த மற்ற பிணைக் கைதிகளும் வெளியே வந்தனர். இந்த சம்பவத்தில் இந்தியர்களான விஸ்வகாந்த், புஷ்பேந்து கோஷ் ஆகியோரும் பத்திரமாக மீட்கப்பட்டனர். காயம் அடைந்தவர்களை போலீசார் உடனடியாக சிகிச்சைக்காக மருத்துவமனைக்கு அனுப்பி வைத்தனர்.

தீவிரவாதியுடன் 17 மணி நேரம் நீடித்த இந்த பிரச்னை, உள்ளூர் நேரப்படி நேற்று இரவு 2 மணிக்கு முடிவுக்கு வந்தது. மேலும், போலீசார் நடத்திய விசாரணையில், சுட்டுக்கொல்லப்பட்ட தீவிரவாதியின் பெயர் ஹரோன் மோனிஸ் என்றும், 50 வயதான அவர் ஈரான் நாட்டைச் சேர்ந்தவன் என்றும், 1996 ஆம் ஆண்டு ஈரானை விட்டு வெளியேறி ஆஸ்திரேலியாவுக்கு வந்து அரசியல் தஞ்சம் அடைந்ததாகவும் தெரியவந்துள்ளது.

அமைதி சமாதானம் ஜனநாயகம்

www.sooddram.com