“எனது அரசை சுதந்திரமாகச் செயல்பட விடுங்கள். இல்லையென்றால் பதவியிலிருந்து விலகிவிடுவேன்.” -இப்படி பிரதமர் நரேந்திர மோடி எச்சரிக்கை விடுத்திருக்கிறாராம். அவரது கட்சியின் தலைமைப் பீடமாகிய ஆர்எஸ்எஸ் உள்ளிட்ட இந்து மதவாத அமைப்புகளின் தலைவர்களும் அவரது கட்சியின் மேல்மட்டத் தலைவர்களும் கலந்துகொண்ட ஒரு கூட்டத்தைக் கூட்டிய பிரதமர் இப்படிப் பேசியிருப்பதாகக் கூறப்படுகிறது.
“மக்கள் நம்மை வளர்ச்சிக்காகவும் நல்ல நிர்வாகத்துக்காகவும்தான் தேர்ந்தெடுத்திருக்கிறார்கள். இந்த நிலைமையில் நீங்கள் சர்ச்சைகளைக் கிளப்புவது அரசின் திட்டங்களுக்கு முட்டுக்கட்டையாக இருக்கிறது.” என்று அவர் பேசினாராம்.

இந்து அமைப்பு ஒன்று நடத்திய மதமாற்றச் சடங்கு, வெங்கய்யா நாயுடு சொன்ன மதமாற்றத் தடைச்சட்டம், ஒரு அமைச்சர் சாமியாரினி பாஜக-வினர் அல்லாத மற்றவர்களெல்லாம் முறைதவறிப் பிறந்தவர்கள் என்று கண்டுபிடித்துச் சொன்னது, பள்ளிகளில் குரு உத்ஸவ் திணிப்பு, சமஸ்கிருத வாரத்தின் பெயரால் மதவாத சிந்தனைகளைப் பள்ளிக் குழந்தைகள் மனங்களில் புகுத்தும் முயற்சி, ஆர்எஸ்எஸ் தலைவர் இந்தியர்கள் என்றால் இந்துக்களே என்று பேசியது, மற்றொரு அமைப்பு 2021ம் ஆண்டுக்குள் இந்தியாவிலிருந்து இந்துக்கள் அல்லாதவர்கள் அனைவரும் வெளியேற்றப்படுவார்கள என்று அறிவித்திருப்பது, இந்து மதவாத அமைப்புகள் முத்தபபோராட்டம் நடத்தியவர்களைத் தாக்கியது உள்ளிட்ட வன்முறைகளில் இறங்கியது, விவாதங்களில் பங்கேற்கும் இந்து அமைப்புகளின் தலைவர்கள் ஏதோ இந்து சமுதாயம் பெரும் நெருக்கடிக்கு உள்ளாகியிருப்பது போன்ற தோற்றத்தை ஏற்படுத்தும் வகையில் நச்சுக் கருத்துகளைக் கூறுவது...

இப்படியான சங்கதிகள் மோடி ஆட்சிக்கு வந்த பிறகு அதிகரித்திருக்கின்றன. இப்படி அதிகரித்திருப்பதுதான் “வளர்ச்சியா,” அதிகரிக்க விட்டிருப்பதுதான் “நல்ல நிர்வாகமா” என்று நாடாளுமன்றத்தில் எதிர்க்கட்சிகள் கேட்கின்றன. பாஜக-வின் கடந்தகால அமளி உத்தி தற்காலத்தில் அவர்களுக்கு எதிராகவே திரும்ப, நாடாளுமன்றம் முடங்கியிருக்கிறது.
இப்படிப்பட்ட மதவெறிப் பேச்சுகள், செயல்கள் பற்றி, சிறந்த பேச்சாளரான மோடி ஏன் ஒரு வார்த்தை கூட சொல்ல மாட்டேனென்கிறார் என்று எதிர்க்கட்சிகள் மட்டுமல்லாமல் பல ஊடகங்களும் பல்வேறு பொது அமைப்புகளும் கேட்கின்றன. நாடாளுமன்றத்தில் இதைப் பற்றிப் பேசாத பிரதமர், இப்போது ஆர்எஸ்எஸ் கூடாரத்திற்குள் மேற்கண்டவாறு பேசியிருப்பதாக உறுதிப்படுத்தப்படாத செய்தியொன்று தெரிவிக்கிறது.
ஆர்எஸ்எஸ் பீடத்தை இப்படிக் கண்டிப்பதற்கான துணிவு மோடியிடம் உண்டா, அவரே ஒரு ஆரஎஸ்எஸ் தொண்டர்தானே, இந்த வேலைக்கு லாயக்கானவர் என்று ஆர்எஸ்எஸ் தலைமையால் கண்டெடுக்கப்பட்டவர்தானே என்று சிலர் கேட்கிறார்கள். அவர்களுடைய ஐயத்திற்கு பதிலளிப்பது போல் அந்தச் செய்தியின் மிச்சத் துண்டு இதைத் தெரிவிக்கிறது. “மக்களைப் பிளவுபடுத்துகிற வேலைகளை நிறுத்த வேண்டும் - தற்காலிகமாகவாவது என்று அவர் கேட்டுக்கொண்டதாகக் கூறப்படுகிறது.” (செய்தி ஆதாரம்: ‘ஒன் இந்தியா’ வலைத்தள ஏடு)

மேற்படி கூட்டம் நடந்ததும், அதில் மோடி இப்படிப் பேசியதும் உண்மைதான் என்றால் - அவர் ஒன்றும் இந்தியாவின் அடையாளமாகிய உண்மையான மதச்சார்பின்மைக்காகவோ நல்லிணக்கத்திற்காகவோ பேசவில்லை, தற்காலிகத் தந்திரமாகத்தான் அடங்கியிருக்கச் சொல்கிறார் என்றுதானே அர்த்தம்?

கடவுளும் மதமும் அவரவர் தனிப்பட்ட நம்பிக்கை. எந்தக் கடவுளை வணங்குவது, எந்த மதத்தைப் பின்பற்றுவது, எந்தக் கடவுளையுமே நம்பாமல் இருப்பது என்பதெல்லாம் அவரவர் சொந்த விருப்பம். இந்த உரிமையை வழங்கியிருப்பது நாட்டின் அரசமைப்பு சாசனப் பெருமை. நம்பிக்கைகளைப் பொது விவகாரங்களாக்கி மக்களைக் குழப்புவதும், மந்தைகள் போல் நடத்துவதும், அடிப்படைப் பிரச்சனைகள் பற்றி சிந்திக்க விடாமல் திசைதிருப்புவதும் அரசியல் அக்கிரமமல்லவா?

சிந்திக்க முடியாமல் போவது மக்களின் நிலைமை.
சிந்திக்க வைப்பது மக்கள் இயக்கங்களின் கடமை.

அமைதி சமாதானம் ஜனநாயகம்

www.sooddram.com