ஊழலை அம்பலப்படுத்தியது தணிக்கைத் துறை மத்திய அரசுக்கு 2 இலட்சம் கோடி ரூபா இழப்பு

2 ஜி ஸ்பெக்ட்ரம் ஒதுக்கீடு சர்ச்சை நீடிக்கையில், தொலைத்தொடர்பு துறையில் அடுத்த மெகா ஊழல் அம்பலமாகியிருக்கிறது. 2005 இல் இஸ்ரோ செயற்கைக் கோள்களில், “எஸ்-பாண்ட்” அலைவரிசையை ஒதுக்கீடு செய்ததில், அரசுக்கு 2 இலட்சம் கோடி ரூபா இழப்பு ஏற்பட்டுள்ளதாக கூறப்படுகிறது. தொலைத்தொடர்புத் துறையில் “2ஜி” ஸ்பெக்ட்ரம் அலைவரிசை ஒதுக்கீட்டில் நடந்த 1.76 இலட்சம் கோடி ரூபா ஊழலை, மத்திய தணிக்கை துறை வெளிப்படுத்தியது. இது ஏற்படுத்திய அதிர்வலைகளுடன், விசாரணை, கைது என பன்முகப்பரிமாண ஊழலாகப் பேசப்படுகிறது. தொலைத்தொடர்புத்துறையில் நடந்த மற்றொரு ஊழலை தணிக்கை துறை வெளிச்சத்திற்கு கொண்டு வந்து அனைவரையும் வாய்பிளக்க செய்துள்ளது.

இந்திய விண்வெளி ஆராய்ச்சிக் கழகம் (இஸ்ரோ), செயற்கைக்கோள்களை விண்ணில் அனுப்புகிறது. இந்த செயற்கைக் கோள்களில் உள்ள டிரான்ஸ் பாண்டர்கள், “டிவி” ஒளிபரப்பு, தொலைத்தொடர்பு சேவைகளுக்கு பயன்படுத்தப்படும். இவற்றை வர்த்தக ரீதியாக விற்பதற்கு இஸ்ரோ, ஆன்ட்ரிக்ஸ் நிறுவனத்தை தொடக்கியது. இதன் தலைமையகம் பெங்களூரில் உள்ளது.

இஸ்ரோ அனுப்பும் செயற்கைக்கோள்களில் உள்ள “எஸ்-பாண்ட்” டிரான்ஸ் பாண்டர்களை விற்கும் பொறுப்பை ஆன்ட்ரிக்ஸ் நிறுவனம் கவனித்தது. இஸ்ரோ விரைவில் ஏவ இருக்கும், ஜி சாட்-6 மற்றும் ஜி-சாட்-6 ஏ செயற்கைக்கோள்களில் உள்ள “எஸ்-பாண்ட்” டிரான்ஸ் பாண்டர்களை ஒதுக்கீடு செய்ய திவாஸ் மல்டி மீடியா நிறுவனத்துடன் ஒப்பந்தம் செய்து கொண்டது.

இந்த ஒப்பந்தம் 2005 இல் போடப்பட்டது. இதன்படி இரு செயற்கைக்கோள்களில் 70 மெகாஹேர்ட்ஸ் அலைவரிசை கொண்ட தலா 10 “எஸ்-பாண்ட்” டிரான்ஸ் பாண்டர்களை ஒதுக்கீடு செய்தது.

இதை 20 ஆண்டுகளுக்கு பயன்படுத்திக்கொள்ள திவாஸ் மல்டி மீடியா நிறுவனம், ஆயிரம் கோடியை கட்டணமாக செலுத்த ஒப்பந்தம் செய்யப்பட்டது. இதன் மூலம், ஆண்டுக்கு 50 கோடி ரூபாய் மட்டுமே திவாஸ் நிறுவனம் மூலம் ஆண்ட்ரிக்ஸ் நிறுவனத்திற்கு கிடைக்கும் “3ஜி” ஸ்பெக்ட்ரம் ஒதுக்கீடு மூலம் அரசுக்கு 67 ஆயிரத்து 717 கோடி ரூபாய் வருமானம் கிடைத்துள்ளது.

அப்படியிருக்கையில் 20 டிரான்ஸ்பாண்டர்கள் மூலம் அரசுக்கு 1,000 கோடி வருமானம் கிடைக்கிறது. இதனால் அரசுக்கு 2 இலட்சம் கோடி வருவாய் இழப்பு ஏற்பட்டுள்ளதாக மத்திய தணிக்கை துறை தன் முதல் ஆய்வில் கண்டறிந்தது.

இந்த டிரான்ஸ்பாண்டர்களை உள்ளடக்கிய இரண்டு செயற்கைக் கோள்களை இப்போது தான் “இஸ்ரோ” தயாரித்து வருகிறது. இதை தயாரித்து அனுப்புவதற்கு ஆகும் செலவு மட்டும் 2,000 கோடி ரூபாய். முறையாக ஏலம் விடாமல் திவாஸ் நிறுவனத்திற்கு டிரான்ஸ்பாண்டர்களை ஒதுக்கியது ஏன் என தணிக்கை துறை கேள்வி எழுப்பியுள்ளது.

ஜி-சாட்-6 செயற்கைக்கோளை ஐரோப்பாவின் ஏரியல் பேஸ்ரொக்கெட் மூலம் செலுத்துவதற்கு இஸ்ரோ தயாராகி வருகிறது. இதுவரை இந்த அலைவரிசை அரசிடமே இருந்து வந்தது. இதை ஏலம் விடாமல், தனியாருக்கு ஒதுக்கீடு செய்தது ஏன் என்ற கேள்வி எழுகிறது.

பிரதமரின் நேரடி பொறுப்பில் உள்ள விண்வெளி ஆணைக்குழுவின் கட்டுப்பாட்டில் இயங்கி வருகிறது இஸ்ரோ.

இந்த ஒதுக்கீடு விவகாரம் ஆணைக்குழுவுக்கு பிரதமரின் அலுவலகத்திற்கோ, மத்திய அமைச்சரவையின் கவனத்திற்கோ கொண்டுவரப்படவில்லை என்ற குற்றச்சாட்டு எழுந்துள்ளது. இது எந்த முறையில் தனியாருக்கு ஒதுக்கீடு செய்யப்பட்டது என்ற கேள்வியை தணிக்கை துறை கிளப்பியுள்ளது.

பி.எஸ்.என்.எல். மற்றும் எம்.டி.என்.எல், நிறுவனங்களுக்கு 20 மெகாஹேர்ட்ஸ் அலைவரிசையை ஒதுக்கீடு செய்த போது இதற்காக இஸ்ரோவுக்கு செலுத்தப்பட்ட தொகை 12 ஆயிரத்து 847 கோடி ரூபா. ஆனால் திவாஸ் நிறுவனம் பெற்றிருப்பது 70 மெகா ஹேர்ட்ஸ், தொகையோ, வெறும் 1,000 கோடி. இப்படியாக பலவித ஒப்பீடுகளை தணிக்கை துறை கண்டுபிடித்து இந்த முறைகேட்டை கொண்டு வந்துள்ளது.