தமிழக மீனவர் 106 பேர் சிறைபிடிப்பு இலங்கைக்கு இந்தியா எச்சரிக்கை!

புதுடெல்லி : தமிழக மீனவர்கள் 106 பேரை இலங்கை கடற்படை பிடித்து சென்றுள்ளதற்கு பிரதமர் மன்மோகன்சிங் கடும் கண்டனம் தெரிவித்துள்ளார். ‘இது போன்ற நடவடிக்கைகளை பொறுத்து கொள்ள முடியாது’ என்று இலங்கை அரசுக்கு எச்சரிக்கை விடுத்தார். கச்சத்தீவு அருகே மீன்பிடிக்கச் செல்லும் தமிழக மீனவர்கள் மீது இலங்கை கடற்படையினர் தாக்குதல் நடத்தும் சம்பவங்கள் தொடர்ந்து நடக்கின்றன. சமீபத்தில் இலங்கை கடற்படையால் 2 மீனவர்கள் படுகொலை செய்யப்பட்டனர். இந்நிலையில், தமிழகத்தின் நாகை மாவட்டம் மற்றும் காரைக்காலை சேர்ந்த 106 மீனவர்கள் விசைப்படகில் மீன்பிடிக்க நேற்று முன் தினம் கடலுக்கு சென்றனர்.

இந்திய கடல் எல்லையில் மீன் பிடித்து கொண்டிருந்த அவர்களை இலங்கை கடற்படையினர் சிறைபிடித்து கொண்டு சென்றனர். இதனால், மீனவர்களிடையே கொந்தளிப்பு ஏற்பட்டுள்ளது. இந்நிலையில், டெல்லியில் நேற்று காலை 11 மணியளவில் தொலைக்காட்சி சேனல்களின் ஆசிரியர்களுக்கு பிரதமர் மன்மோகன்சிங் அவரது இல்லத்தில் பேட்டியளித்தார். அப்போது, அவரிடம் தமிழக மீனவர்கள் 106 பேரை இலங்கை கடற்படையினர் சிறை பிடித்து சென்றது பற்றி சன் டி.வி. செய்தியாளர் ராமகிருஷ்ணன் கேள்வி எழுப்பினார். அதற்கு பிரதமர் அளித்த பதில் வருமாறு:

தமிழக மீனவர்கள் 106 பேர் பிடித்து செல்லப்பட்டது பற்றி எனது கவனத்துக்கு வந்துள்ளது. இதை முக்கிய பிரச்னையாக கவனித்து நடவடிக்கை எடுப்போம்.
இது குறித்து இலங்கை அரசுடன் பேசுவோம். இலங்கை கடற்படையின் இது போன்ற நடவடிக்கைகளை பொறுத்து கொள்ள முடியாது என்று ஏற்கனவே இலங்கை அரசிடம் கடுமையாக எச்சரிக்கப்பட்டுள்ளது. இவ்வாறு பிரதமர் கூறினார்.

இதற்கிடையே, இலங்கையில் உள்ள இந்திய தூதரகம் மூலம் மீனவர்களை மீட்க மத்திய அரசு நடவடிக்கை எடுத்து வருகிறது. தமிழ்நாடு, கேரளா உள்பட 5 மாநில சட்டப்பேரவை தேர்தல் குறித்தும் பிரதமரிடம் கேள்வி கேட்கப்பட்டது. அதற்கு அவர் பதிலளிக்கையில், தமிழகத்தில் ஆளும் திமுக கூட்டணி மீண்டும் வெல்லும் என்றும், கேரளாவில் மீண்டும் ஆட்சியை பிடிக்க காங்கிரசுக்கு பிரகாசமான வாய்ப்பு உள்ளது என்றும் தெரிவித்தார்.