தாய்லாந்து குண்டு வெடிப்பு தொடர்பில் இரு ஈரானியர் கைது: இந்தியா, ஜோர்ஜியா சம்பவத்துடன் தொடர்பு - ஈரானை குற்றம் சாட்டுகிறது இஸ்ரேல், ஈரான் மறுக்கின்றது

இந்தியா, ஜோர்ஜியா மற்றும் தாய்லாந்தில் இடம்பெற்ற குண்டு வெடிப்புச் சம்பவங்களைத் தொடர்ந்து இஸ்ரேல், ஈரானுக்கிடையிலான முறுகல் நிலை மேலும் அதிகரித்துள்ளது. இந்த குண்டுவெடிப்புச் சம்பவங்களின் பின்னணியில் ஈரான் இருப்பதாக இஸ்ரேல் குற்றம் சாட்டியுள்ளது. எனினும் இந்த குற்றச்சாட்டை ஈரான் அரசு முற்றாக மறுத்துள்ளது. கடந்த திங்கட்கிழமை இடம்பெற்ற குண்டு வெடிப்புச் சம்பவங்களில் இஸ்ரேல் ராஜதந்திரிகள் மீது இலக்கு வைக்கப்பட்டிருந்தது. டெல்லியில் இஸ்ரேல் தூதரகத்திற்கு அருகில் இஸ்ரேல் தூதரக அதிகாரியின் கார் வெடித்ததில் அந்த அதிகரிக்கு காயம் ஏற்பட்டது. அதேபோன்று அன்றைய தினத்திலேயே ஜோர்ஜியாவிலும் இஸ்ரேல் இராஜதந்திரிகளை இலக்குவைத்து குண்டுத் தாக்குதல் இடம்பெற்றது.

பாங்கொக்கில் மூன்று குண்டு வெடிப்பு

இந்நிலையில் தாய்லாந்து தலைநகர் பாங்கொக்கில் நேற்று முன்தினம் 3 வெடிகுண்டுகள் வெடித்தன. இதில் 4 பேர் படுகாயமடைந்தனர். இதில், வெடிகுண்டு வைத்ததாக சந்தேகிக்கப்படும் நபரும் காயமடைந்திருக்கலாம் என்று கூறப்பட்டது. இது தொடர்பாக 2 ஈரானியர்களை கைது செய்து பொலிஸார் தீவிரமாக விசாரித்து வருகின்றனர்.

முதல் குண்டுவெடிப்பு தலைநகரின் தெற்குப் பகுதியில் உள்ள ஒரு வாடகை வீட்டில் மதியம் 2 மணி அளவில் வெடித்தது. இதில் தங்கியிருந்தவர்கள் 3 பேரும் ஈரான் நாட்டைச் சேர்ந்தவர்கள். அவர்களில் 2 பேர் தப்பித்துக் கொண்டனர். ஒருவர் படுகாயமடைந்தார். அவரை ஒரு டாக்ஸியைப் பிடித்து மருத்துவமனைக்கு அழைத்துச் செல்ல அவர்கள் முயன்றுள்ளனர். ஆனால், அந்த டாக்ஸி ஓட்டுநர் அந்த மனிதரை அழைத்துச் செல்ல மறுத்துள்ளார். இதில் கோபமடைந்த நபர் ஒரு வெடிகுண்டை எடுத்து காருக்குள் வீசியுள்ளார். அது, கீழே உருண்டு, காருக்கு அடியில் சென்று வெடித்துள்ளது. இதில் கார் சேதமடைந்துள்ளது.

அடுத்து, அந்த மனிதன் ஒரு வெடிகுண்டை எடுத்து கசேம் பித்தாயா பள்ளிக்கூடத்துக்கு அருகில் இருந்த பொலிஸார் மீது வீச முயற்சி செய்திருக்கிறான். ஆனால் அது அவன் கையில் இருந்து நழுவி கீழே விழுந்து வெடித்துள்ளது. இதில், அந்த நபருக்கு இரு கால்களும் துண்டாகியுள்ளன. இதை அடுத்து அவர் சுலாலங்கோம் மருத்துவமனைக்கு தூக்கிச் செல்லப்பட்டுள்ளார்.

இந்த நபர் சார்ப் மொராபி என்றும் அவர் கைது செய்யப்பட்டதாகவும் பொலிஸார் தெரிவித்தனர். இந்த சம்பவத்துடன் தொடர்புடைய ஈரான் நாட்டைச் சேர்ந்த மற்றுமொரு நபர் தாய்லாந்து விமான நிலையத்தில் வைத்து கைது செய்யப்பட்டுள்ளார். இவர் மலேசியாவுக்கு தப்பிச் செல்ல முயற்சித்த போதே தாய்லாந்து பொலிஸாரிடம் சிக்கியுள்ளார். இவர் 42 வயதான ஈரான் நாட்டைச் சேர்ந்த மொஹம்மத் ஹஸன் என அடையாளம் காணப்பட்டுள்ளது. மேலும் ஒருவர் மீது பொலிஸார் சந்தேகம் தெரிவித்துள்ளனர்.

தனிநபர் இலக்கு

இந்நிலையில் தாய்லாந்து பொலிஸாரால் கைது செய்யப்பட்ட இரு ஈரான் நாட்டவர்களும் தனிநபரை இலக்கு வைத்தே தமது செயற்திட்டத்தை முன்னெடுத்திருக்கலாம் என தாய்லாந்து பொலிஸார் சந்தேகம் வெளியிட்டுள்ளனர். அத்துடன் இந்தியா, ஜோர்ஜியாவைப் போன்று தாய்லாந்திலும் இஸ்ரேல் இலக்குகளை தாக்க முயற்சித்திருக்கலாம் எனவும் தாய்லாந்து தேசிய பாதுகாப்பு கவுன்சில் தலைவர் ஊடகங்களுக்கு தெரிவித்தார்.

இதில் இந்தியா, ஜோர்ஜியாவில் பயன்படுத்திய அதே வெடிபொருட்களே பாங்கொக்கில் இடம்பெற்ற குண்டு வெடிப்பு சம்பவங்களின் போதும் பயன்படுத்தப்பட்டிருந்ததாக தாய்லாந்துக்கான இஸ்ரேல் தூதரகம் குற்றம் சாட்டியுள்ளது.

பாங்கொக் குண்டு வெடிப்புக்கு பயன்படுத்தப்பட்ட வெடி பொருட்கள் பெரிய கட்டடங்களையோ அல்லது சனநெரிசல் நிறைந்த கூட்டங்களையோ இலக்கு வைத்து தயாரிக்கப்பட்டவை அல்ல. அவை தனி நபர் இலக்குகளை தாக்குவதற்காக பயன்படுத்தப்படுபவை. பாங்கொக் இலக்கு இஸ்ரேல் இராஜதந்திரிகளாக இருக்க வாய்ப்பு உள்ளது என தாய்லாந்து தேசிய பாதுகாப்பு கவுன்ஸில் தலைவர் விச்சின் பெடபோஸ்ட்ரி தெரிவித்துள்ளார்.

ஏற்கனவே பாங்கொக்கில் தாக்குதலொன்று இடம்பெற வாய்ப்பு இருப்பதாக அமெரிக்க தூதரகம் கடந்த மாதம் எச்சரித்திருந்தது. இந்த எச்சரிக்கையை தொடர்ந்து வெடி பொருட்களுடன் லெபனானைச் சேர்ந்த ஹிஸ்புல்லா அமைப்பைச் சேர்ந்தவர் என சந்தேகிக்கப்படும் ஒருவர் தாய்லாந்தில் கைது செய்யப்பட்டார்.

இஸ்ரேல் முழுவதும் பலத்த பாதுகாப்பு

வெளிநாடுகளில் உள்ள இஸ்ரேல் தூதரகங்களைக் குறிவைத்து தாக்குதல் நடத்தப்பட்டுள்ள நிலையில், இஸ்ரேல் நாடு முழுவதும் பாதுகாப்பு அதிகரிக்கப்பட்டுள்ளது. இதனையடுத்து இஸ்ரேலில் உள்ள வெளிநாட்டுத் தூதரகங்கள், விமான நிலையங்கள், சுற்றுலாத் தலங்கள் உள்ளிட்ட முக்கிய இடங்களில் தீவிரமாக கண்காணிப்பு பணிகள் மேற்கொள்ளப்பட்டுள்ளன என்று அந்நாட்டு காவல்துறை செய்தித் தொடர்பாளர் தெரிவித்துள்ளார்.

டமஸ்கஸ்ஸில் கார்குண்டு தாக்குதல் மூலம் கொல்லப்பட்ட ஹிஸ்புல்லா அமைப்பின் தலைவர் இமாத் முக்னியாவின் நான்காமாண்டு நினைவு தினம் கடந்த ஞாயிற்றுக்கிழமை அனுஷ்டிக்கப்பட்டது. இந்த தாக்குதலுக்கு ஹிஸ்புல்லா அமைப்பு இஸ்ரேல் மீது குற்றம் சாட்டி இருந்தமை குறிப்பிடத்தக்கது.

ஈரான் மீது குற்றச்சாட்டு

இந்நிலையில் இந்தியா, ஜோர்ஜியா மற்றும் தாய்லாந்தில் இடம்பெற்ற சம்பவங்களின் பின்னணியில் ஈரான் மற்றும் ஹிஸ்புல்லா அமைப்புகள் இருப்பதாக இஸ்ரேல் குற்றம் சாட்டியுள்ளது. பாங்கொக் சம்பவம் மூலம் ஈரான் மற்றும் அதன் முகவர்கள் தொடர்ச்சியான தீவிரவாத செயல்களில் ஈடுபடுவது நிரூபணமாகியுள்ளது என இஸ்ரேல் பாதுகாப்புத் துறை அமைச்சர் எஹ¤ட் பராக் குறிப்பிட்டுள்ளார். ஈரான் மற்றும் ஹிஸ்புல்லா அமைப்பின் தீவிரவாத செயல்கள் பிராந்தியத்தினதும் சர்வதேசத்தினதும் ஸ்திரத்தன்மைக்கு பாதகமாக அமைந்திருப்பதாகவும் எஹ¤ட் பராக் குறிப்பிட்டார்.

கடந்த திங்கட்கிழமை நடந்த இந்தியா மற்றும் ஜோர்ஜியாவில் இடம்பெற்ற குண்டுத் தாக்குதலுக்கு ஈரானுக்கு தொடர்பிருப்பதாக இஸ்ரேல் பிரதமர் பென்ஜமின் நெதன்யாஹ¤ கூறியிருந்தார்.

ஈரான் மறுப்பு

எனினும், இஸ்ரேலின் குற்றச்சாட்டை ஈரான் அரசு முற்றாக மறுத்துள்ளது. சியோனிஸ சக்திகள் தாய்லாந்து- ஈரான் உறவில் பாதிப்பை ஏற்படுத்த முயற்சிக்கின்றன என்று ஈரான் வெளியுறவு அமைச்சின் பேச்சாளர் குறிப்பிட்டுள்ளார்.