ஜெனீவாவில் இராஜ தந்திர சமருக்கு தயாராகும் ஆரவாரத்தில் கொழும்பு தமிழ்த்தேசியக் கூட்டமைப்பு இன்று கூடி ஆராயும் இரு தலைக்கொள்ளி எறும்பின் நிலையில் இந்தியா

ஜெனீவாவில் எதிர்வரும் 27ஆம் திகதி  ஆரம்பமாகும் ஐ.நா. மனிதஉரிமைகள் பேரவை அமர்வில் இலங்கைக்கு எதிராக அமெரிக்க ஆதரவுடன் கொண்டுவர உத்தேசிக்கப்பட்டுள்ள தீர்மானத்தை முறியடிப்பதற்கான வியூகங்களுடன் அமைச்சர்கள், இராஜதந்திரிகளடங்கிய உயர்மட்டத் தூதுக்குழுவினர் அங்கு பயணம் மேற்கொண்டுள்ள நிலையில், இந்த அமர்வு தொடர்பான தனது இறுதித் தீர்மானத்தை தமிழ்க் கூட்டமைப்பு இன்று வியாழக்கிழமை எடுக்கவுள்ளது.
இதேவேளை, இந்த விடயத்தில் இந்தியா இருதலைக் கொள்ளி எறும்பின் நிலையில் இருப்பதாக இந்துப் பத்திரிகை தெரிவித்திருக்கிறது.

தனியொரு நாட்டுக்கு எதிரான தீர்மானங்களை வழமையாக இந்தியா எதிர்த்து வரும் அதேவேளை, இலங்கை போன்ற மிக நெருங்கிய நேச அணி விவகாரமானது டில்லியின் வெளிவிவகாரக் கொள்கையில்  பாரிய அழுத்தத்தைக் கொடுத்திருக்கிறது. இலங்கைக்கு எதிரான தீர்மானத்தை எதிர்ப்பதற்கான தெரிவானது தற்போதைய நிலைமையில் வழமையான நிலைப்பாட்டின் பிரகாரம் முன்னெடுக்க முடியாத சூழ்நிலை காணப்படுகிறது. ஏனெனில், யுத்தம் முடிவடைந்த காலப்பகுதியிலிருந்து திரும்பத் திரும்ப உறுதிமொழிகள் வழங்கப்பட்டாலும் பயனுள்ள செயற்பாட்டையும் கொழும்பு எடுத்திருக்காத நிலையில் முடிவு எடுப்பதில் இந்தியா இருதலைக் கொள்ளி எறும்பின் நிலையில் இருப்பதாக"இந்து' குறிப்பிட்டிருக்கிறது.

ஜெனீவா அமர்வின்போது யுத்தத்தின் பின்னரான உள்சார் கட்டமைப்பு நடவடிக்கைகளில் ஏற்பட்ட முன்னேற்றம், புனர்வாழ்வு விடயத்தை துரிதமாக மேற்கொண்டமை, உள்ளூராட்சித் தேர்தலை வடக்கில் நடத்தியமை, பொலிஸ் பிரிவில் தமிழரை இணைத்திருக்கின்றமை போன்ற விடயங்களை அரசாங்கம் முன்வைக்கவுள்ளதாக சிரேஷ்ட அதிகாரி ஒருவர் கூறியுள்ளார்.
ஆனால் தமிழ்த் தேசியக் கூட்டமைப்பு உட்பட தமிழ்க் கட்சிகளின் பிரதிநிதிகள் எந்தவொரு விடயங்களும் இதுவரை குறிப்பிடத்தக்க அளவுக்கு வென்றெடுக்கப்படவில்லை என்று கூறியுள்ளன.

"பொலிஸ் அதிகாரம், காணிப் பயன்பாடு, ஒதுக்கீடு நிதி, வரவுசெலவுத்திட்ட அதிகாரம் உட்பட அதிகாரங்களை மாகாணசபைகளுக்கு அரசியலமைப்பின் பிரகாரம் வழங்கப்பட்டால் மட்டுமே இறுதியான அரசியல் தீர்வை எட்டமுடியும். ஆனால் அரசாங்கம் இவற்றை முடக்கி வைத்திருக்கின்றது' என்று முன்னணி இலங்கைப் பிரஜைகள் கைச்சாத்திட்டு அறிக்கையொன்றை விடுத்திருக்கின்றனர்.

"அர்த்தபுஷ்டியான நல்லிணக்கத்துக்கு எடுக்கப்படவேண்டிய யதார்த்த பூர்வமான நடவடிக்கைகள்' என்ற தலைப்பில் வெளியிடப்பட்ட இந்த அறிக்கையில் 50 பேர்வரை கைச்சாத்திட்டுள்ளனர். சிவில் நிர்வாகத்தை ஏற்படுத்தாமலும் இராணுவக்குறைப்பை மேற்கொள்ளாமலும் இடம்பெயர்ந்த தமிழ், முஸ்லிம் மக்களை மீளக்குடியமர்த்தாமலும் உள்ளூர் பொருளாதாரத்தை வலுப்படுத்தாமலும் நல்லிணக்கம் பற்றிப் பேசுவது ஏமாற்று' என்று அவர்கள் குறிப்பிட்டுள்ளனர். இந்த முக்கிய விடயத்தையே இலங்கையின் நட்பு நாடுகளான இந்தியா, அமெரிக்கா உட்பட பல நாடுகள் வலியுறுத்துகின்றன.

இதேவேளை,  ஜெனீவா மனிதஉரிமை கவுன்ஸில் கூட்டத்தொடரில் தமிழ்த் தேசியக் கூட்டமைப்பு கலந்துகொள்வது உறுதி என்ற போதிலும், கூட்டமைப்பை பிரதிநிதித்துவப்படுத்தி யார், யார் செல்வது என்பது குறித்து இதுவரை முடிவு செய்யப்படவில்லை எனவும் இந்நிலையில், இன்று இது தொடர்பில் இறுதி முடிவு எடுக்கப்படவுள்ளதோடு ஜெனீவாவில் தமது செயற்பாடுகள் குறித்தும் கூட்டமைப்பு விரிவாகக் கலந்துரையாடவுள்ளதாகவும் அறியவருகிறது.
சர்வதேச சமூகம் இலங்கைக்குப் பாரிய அழுத்தங்களைக் கொடுத்துவரும் நிலையில் தமிழ்த் தேசியக் கூட்டமைப்பின் தலைவர் இரா. சம்பந்தன் செவ்வாய்க்கிழமை ஜனாதிபதியை அலரிமாளிகையில் சந்தித்துப் பேச்சு நடத்தியமை குறிப்பிடத்தக்கது.