கெடுபிடி யுத்த களமாக மாறிவரும் ஜெனீவா மனிதஉரிமைகள் பேரவை அமெரிக்கா தலைமையிலான மேற்குலகின் வியூகங்களை முறியடிக்கும் முயற்சியில் கொழும்பு

ஜெனீவாவில் ஐ.நா.  மனித  உரிமைகள் ஆணைக்குழுவின் கூட்டத் தொடர் நடைபெறும் நிலையில் இலங்கைக்கு பாரிய நெருக்கடியை  கொடுக்கும் நோக்குடன் அமெரிக்காவிலிருந்து 15 பேரடங்கிய உயர் மட்டக்குழுவும் பிரிட்டன் எம். பி. க்கள் 4 பேரும் ஜெனீவாவுக்கு வருகைதரவுள்ளதாக அறியவருகிறது. ஜெனீவா வந்துள்ள அரசாங்க குழுவினரே இந்தத் தகவலை அறியப்படுத்தினர். அமெரிக்க இராஜாங்க திணைக்களத்தின் பொதுமக்கள் பாதுகாப்பு, ஜனநாயகம் மற்றும் மனித உரிமைகளுக்கான பிரதிச் செயலாளரான மரியா ஒடேரா இக்குழுவில் இடம்பெறுவாரென தெரியவருகிறது. இவர் அண்மையில் இலங்கைக்கு வந்திருந்தார். ஜெனீவா மனித உரிமைகள் ஆணைக்குழுவில் இலங்கைக்கு எதிராக அமெரிக்கா முழு வீச்சுடனும்  ஏனைய நாடுகளின் ஆதரவை திரட்டும் நடவடிக்கையிலும் ஈடுபட்டுவருவதால் இலங்கை தரப்பு கடும் விசனமடைந்துள்ளது.

இலங்கைக்கு ஏற்கனவே ஆதரவு வெளியிட்ட நாடுகள் சில அமெரிக்காவின் அழுத்தங்களுக்கு உட்பட்டு குத்துக்கரணம் அடிக்கலாம் என்ற சந்தேகமும் மேலோங்கி இருப்பதால்  இலங்கை  குழுவினர் தாம் முன்னர் சந்தித்த உறுப்பு நாடுகளின் பிரதிநிதிகளை மீண்டும் சந்திக்கவேண்டியிருப்பதாக  அறியவருகிறது. எதிர்வரும் நாட்களில் அரசாங்க தரப்பினர் ஐ. நா. மனித உரிமைகள் ஆணைக்குழுவின் உறுப்பு நாட்டுப் பிரதிநிதிகளை சந்திக்கவுள்ளனர்.
இதேநேரம் இலங்கை அரசாங்க தரப்பினர் எதிர்வரும் 1,2,3 ஆம் திகதிகளில் நாடு திரும்ப திட்டமிட்டிருக்கின்றனர். எனினும் இலங்கைக்கு எதிரான அமெரிக்கா மற்றும் பிரித்தானிய  நாடுகளின் பிரசாரங்களை முறியடிக்கும் நோக்குடன் இலங்கை இராஜதந்திரிகளைக் கொண்ட குழுவொன்று மீண்டும் தொடர்ந்து ஜெனீவாவில் தங்கியிருக்கவும் வாக்களிப்பு நடைபெறும் மார்ச் 22 ஆம் திகதிக்கு முன்னதாக முக்கிய அமைச்சர் அடங்கிய குழுவொன்று ஜெனீவா வந்து பிரசாரங்களில் ஈடுபடவும் தீர்மானிக்கப்பட்டுள்ளது. 

அதேவேளை முஸ்லிம் நாடான ஜோர்தான் இதுவரை இலங்கை அரசாங்கத்திற்கு ஆதரவு வழங்க முன் வராத நிலையில் அந்நாட்டின் ஆதரவைப் பெற்றுக் கொள்வதற்காக ஜனாதிபதி மஹிந்த ராஜபக்ஷ மிக விரைவில் ஜோர்தானுக்கு பயணம் மேற்கொள்வாரெனவும் இல்லையேல் ஜோர்தான் நாட்டு மன்னருடன் பேசுவதற்கான முயற்சிகளில் ஈடுபடுவாரெனவும் ஜெனீவா அரச தரப்பு வட்டாரங்கள் தெரிவித்தன.

இலங்கையில் மனித உரிமை மீறல் சம்பவங்களுக்கு பொறுப்புக் கூறுதல் தொடர்பாக ஐ.நா. மனித உரிமைகள் ஆணைக்குழுவில் மேற்கொள்ளப்படும் முயற்சிகளுக்கு ஆதரவு தெரிவிப்பது என்று ஐரோப்பிய ஒன்றியத்தின் வெளிவிவகாரப் பிரிவு தீர்மானித்துள்ளது.  பிரசெல்சில் திங்கட்கிழமை நடை பெற்ற ஐரோப்பிய ஒன்றியத்தின் வெளிவிவகாரப் பிரிவு கூட்டத்திலேயே இந்த முடிவு எடுக்கப்பட்டுள்ளது.

ஐ.நா. மனித உரிமைகள் ஆணைக்குழுவில் மேற்கொள்ளப்படும் முயற்சிகளுக்கு ஆதரவு தெரிவிப்பது என்றும் நல்லிணக்க ஆணைக்குழுவின் பரிந்துரைகளை இலங்கை அரசாங்கம் முழுமையாக நடைமுறைப்படுத்துவதை ஐரோப்பிய ஒன்றியம் ஊக்குவிக்கும் என்றும் இந்தக் கூட்டத்தில் தீர்மானம் நிறைவேற்றப்பட்டுள்ளது.  இந்தக் கூட்டத்தில் ஐரோப்பிய ஒன்றியத்தில் அங்கம் வகிக்கும் நாடுகளின் வெளிவிவகார அமைச்சர்கள் பங்கு கொண்டுள்ளனர். இதனால் ஐ.நா. மனித உரிமைகள் ஆணைக்குழுவில் அங்கம்  வகிக்கும் ஒன்றியத்தின் சகல உறுப்பு நாடுகளும் இலங்கைக்கு எதிராக செயற்படும் நிலை ஏற்பட்டுள்ளது.

 
திங்கட்கிழமை ஜெனீவாவில் அமைந்துள்ள ஐ.நா. மனித உரிமைகள் ஆணைக்குழுவின் கூட்ட அறையில் ஆரம்ப நிகழ்வு   இடம்பெற்றது.  ஐ.நா. மனித உரிமைகள் பேரவை பிரதித் தலைவர் லோறா லசாரி, ஐ .நா. பொதுச் சபையின் தலைவர் நசீர் அப்துல் அசிஸ் அல் நாசர் , ஐ.நா. மனித உரிமைகள் உயர்ஸ்தானிகர் நவநீதம்பிள்ளை, சுவிற்சர்லாந்தின்  வெளிவிவகார திணைக்களத் தலைவர் டிட்டியர் பேர்க்ஹல்டர் ஆகியோர் இந்தக் கூட்டத்துக்கு முன்னிலை வகித்தனர். 
இலங்கையிலிருந்து வருகைதந்துள்ள அரசாங்க தரப்பினர் இதில் கலந்து கொண்ட போதிலும் சில அரசாங்க பிரதிநிதிகளும் இலங்கையிலிருந்து வந்த ஊடகவியலாளர் சிலரும் நின்று கொண்டே கூட்டத் தொடரை அவதானித்ததாக இலங்கையிலிருந்து ஜெனீவா வந்திருந்த ஆங்கில பத்திரிகை ஒன்றின் ஊடகவியலாளர் கவலை வெளியிட்டார்.