'சமத்துவமான நிலையை உருவாக்குவதே எமது இலக்கு'

சகல மக்களுக்கும் சகல பிரதேசங்களுக்கும் சமத்துவமான நிலையை உருவாக்குவதே எமது இலக்கு என தேசிய மொழிகள் மற்றும் சமூக ஒருமைப்பாடு அமைச்சர் வாசுதேவ நாணயக்கார தெரிவித்தார். கிளிநொச்சி மாவட்டத்திற்கான விஜயத்தை இன்று ஞாயிற்றுக்கிழமை மேற்கொண்ட அமைச்சர் வாசுதேவ நாணயக்கார, மாவட்ட செயலகத்தில் அரசாங்க அதிபர் ரூபவதி கேதீஸ்வரன் தலைமையில் நடைபெற்ற தேசிய மொழிகள் மற்றும் ஒருமைப்பாடு தொடர்பான கலந்துரையாடலில் பங்குபற்றினார்.  இதன்போது உரையாற்றுகையிலேயே அவர் இவ்வாறு கூறினார்.

இலங்கையில் வெவ்வேறு மொழிகளைப்  பேசுகின்ற மக்களுக்கிடையில் இருக்கும் வேறுபாடுகளையும் முரண்பாடுகளையும் களைந்து, அவர்களுடைய தனித்துவங்களின் அடிப்படையில் சமத்துவமாக நிலைமைகளை உருவாக்குவதே எமது நோக்கமாகும் எனவும் அவர் கூறினார்.

வடக்கு, கிழக்கில் வாழும் மக்களின் உணர்வுகளையும் அவர்களுடைய நிலைமையையும நாங்கள் புரிந்திருக்கிறோம். அமைதிக்கும் ஒற்றுமைக்கும் தேவையான அடிப்படைகளை உருவாக்குவதில் நான் நிச்சயமாக நேர்மையாக உழைப்பேன் எனவும் அமைச்சர் தெரிவித்தார்.

இதேவேளை அமைச்சர் வாசுதேவ நாணயக்கார, கிளிநொச்சி மாவட்ட மக்கள் அமைப்புகளின் பிரதிநிதிகளைச் சந்தித்து அவர்களுடைய அபிப்பிராயங்களைக் கேட்டறிந்துகொண்டார்.

இதன்போது கருத்துத் தெரிவித்த மக்கள் பிரதிநிதிகள், மொழி அமுலாக்கத்தில் பல நெருக்கடிகள் தொடர்ந்தும் நிலவுகின்றன. பல கசப்பான அனுபவங்களை தொடர்ந்தும் சந்திக்கும் நிலைமையே ஏற்படுகிறது. இந்த நிலைமை தொடருமானால் தமிழ் மக்களிடம் எதிர்மறையான எண்ணங்களே வளர்ச்சியடையும். ஆகவே இதைப்போக்க வேண்டிய கடப்பாட்டை அரசாங்கம் கொண்டிருக்கிறது. தேசிய மொழிகள் மற்றும் சமூக ஒருமைப்பாட்டை அடிப்படையாகக் கொண்டு செயற்படும் அமைச்சர் என்ற வகையில் இந்த நிலைமையில்  மாற்றத்தைக் கொண்டு வரவேண்டும் எனக் கூறினர். 

இதற்குப் பதிலளித்த அமைச்சர் வாசுதேவ நாணயக்கார, 30 வருட யுத்தத்திற்குப் பின்னர் நிறைய மாற்றங்கள் ஏற்பட்டுள்ளன. பல விடயங்களில் முன்னேற்றம் ஏற்பட்டுள்ளது. குறைபாடுகளை நிவர்த்தி செய்து வருகிறோம். மொழிசார்ந்த நடவடிக்கைகளில் சமூகங்களுக்கிடையில் இருக்கும் முரண்பாடுகளையும் மனக்குறைகளையும் நான் அறிவேன். அவற்றைத் தீர்த்து வைக்கும் நடவடிக்கைகள் தொடர்ச்சியாக மேற்கொள்ளப்பட்டு வருகின்றன. நிச்சயமாக நல்லதொரு மாற்றத்தை நாம் எட்டுவோம் எனக் கூறினர்.